Ŵakolosai 3 - Chiyawo Bible

¹ Sambano naga mwajimwice pampepe ni Klistu,* myoyo ŵikani mtima wenu pa yindu ya kwinani kwele Klistu atemi pa citengu ca ucimwene wakwe ku mkono wamlyo wa Mlungu.

² Msoseje yindu ya kwinani ngaŵa ya cilambo capasi cino.

³ Pakuti mwawile, nipo umi wenu uli wakusisika pampepe ni Klistu mwa Mlungu.

⁴ Klistu ni umi wenu usyesyene sambano, myoyo pa ndaŵi jitaciwonecela Jwalakwejo, jemanja soni timciwonecela mu lumbili pampepe najo.

Ya umi wakala ni wasambano

⁵ Myiwulaje sambano yakumbila ya mtima wenu ya cilambo capasi yayili mwa jemanja, mpela cikululu, ya usakwa, yakusaka yangalumbana, ni umbombo soni wele uli yalumo kulambila milungu jine.

⁶ Ligongo lya yindu yamti myiyi Mlungu akusiŵatumbilila ŵandu ŵangampikanila.

⁷ Jemanja soni ndamo syenu kala syaliji myoyo, nipo mwatendaga iyoyo.

⁸ Nambo sambano mkasimtenda yosopeyi, mpela kutumbila, lupuso ni misece. Pakamwa penu pakusakolangaga maloŵe gakutukana kapena gakusakala.

⁹ Kasimtendaga unami, pakuti mlesile ndamo syenu syakala pamo ni yitendo yakwe yangalumbana,

¹⁰ nipo m'wete umi wasambano. Umi welewu, Mlungu jwenu akuwukolosya mwangalecesya kuti cimum'manyilile kusyesyene ni kulandana najo.

¹¹ Mu umi wasambanowu pangali kulekanganya pasikati pa Ayuda ni ŵangaŵa Ayuda, ŵawumbale kapena ŵangawumbala, acalendo, ŵangalijiganya, acikapolo ni alukosyo, nambo Klistu ni jwapundile wosope, nipo akusatama mwa wosope.

¹² Pakuŵa jemanja mli ŵandu ŵa Mlungu, nipo Jwalakwe ŵamnonyele nipo soni ŵamsagwile kuŵa ŵakweŵakwepe, mŵeje ŵandu ŵacanasa, ŵambone mtima, ŵakulinandiya, ŵakuweŵa ni kupilila.

¹³ Mtendelaneje canasa, nipo mkululucilaneje jwine ni mjakwe naga jwine amlemwecesye mjakwe. Mpela mwele Ambuje ŵamkululucile, ni jemanja soni mkululucilaneje.

¹⁴ Konjecesya pa yosopeyi mŵeje ni cinonyelano, pakuti cele cikusataŵa yosope pampepe kusyesyene.

¹⁵ Mtendele wa Klistu umlongoleleje m'mitima mwenu. Mlungu ŵamŵilasile kuti mŵe nawo mtendele welewu, pakuti jemanja ni yiŵalo ya cilu cimope, ni soni mŵeje ŵakutogolela.

¹⁶ Maloŵe ga Klistu gatamilicice kusyesyene m'mitima mwenu. Mjiganyaneje ni kusalilana jwine ni mjakwe ni umanyilisi wosope. Mumjimbileje Mlungu nyimbo sya masalimo, nyimbo sya usimu mwakumtogolela Mlungu.

¹⁷ Cilicose cele campaka mcitende, mwine pakuŵeceta, kapena pakamula masengo, mcitendeje mu lina lya Ambuje Yesu,* pakumtogolela Mlungu Atati kupitila mwa Jwalakwe.

Ya umi wasambano mwiŵasa

¹⁸ Jemanja acakongwe, mwapikanileje aciŵamkwenu, pakuti yeleyi ni yakwenela kutenda ŵali mwa Ambuje.

¹⁹ Jemanja acalume, mwanonyeleje aciŵamkwenu, nipo kasimwatendelaga ngalwe.

²⁰ Jemanja ŵanace, mwapikanileje acinangolo ŵenu mu yosope, pakuti yeleyi yikusasangalasya Ambuje.

²¹ Acinangolo, mkasimwatumbilisyaga ŵanace ŵenu, ligongo tacijasa mtima.

²² Ŵakutumicilamwe, mwapikanileje mu yosope acambuje ŵenu pasi pano. Mkasimgambaga kuyitenda yeleyi pamli nawo pameso kuti mwanonyelesye, nambo mwapikanileje ni mtima wosope, ligongo lya kwajogopa Ambuje.

²³ Cilicose cele cicimtendeje, mcitendeje ni mtima wosope, mpela kuti mkwatendela Ambuje, ngaŵa ŵandu iyayi.

²⁴ Mkumbucile kuti Ambuje tacimpa mbote jele jiŵasunjile ŵandu ŵakwe. Pakuti Klistu ni Ambuje ŵimkwatumicilawo.

²⁵ Nambo mundu juŵatesile yangalumbana, tiyicimwujila msyene, ligongo Mlungu jwangali lusagu pakuŵeceta magambo.