Ŵakolosai 2 - Chiyawo Bible

¹ Ngusaka m'manyilile kuti ngulimbana mnope ligongo lya jemanja pamo ni ŵandu wa ku Laodikeya, ni ŵane soni ŵanganituwonegane pameso ni meso citandilile.

² Ngusaka kuti yeleyi yalimbisye mitima jawo, nipo soni kuti aŵe pampepe mu cinonyelano, ni kuŵa ŵalunda lwakupikanicisya yindu. Myoyo timcipakombola kumanyilila ya kusisika ya Mlungu yakwamba Klistu.*

³ Mwa jwalakweju timcipata cipanje cosope cisisice ca Mlungu cicili lunda ni umanyilisi.

⁴ Nguŵeceta yeleyi, kogopa kuti mundu jwine tacimlambusya ni maloŵe ga unami.

⁵ Pakuti atamose nganimba ni jemanja mcilu, nambope ndili pampepe ni jemanja mu msimu. Nipo sangalele kulola kuti mkuyilongosola yosope cenene, nipo soni kuti cikulupi cenu mwa Klistu cili cangatenganyika kose.

Ya umi usyesyene wakutama ni Klistu

⁶ Sambano pakuti mwajiticisye kuti Klistu Yesu* ni Ambuje ŵenu, umi wenu wosope uŵe wakulumbikana ni Jwalakwe.

⁷ Mŵe ŵatitimice miciga mwa Jwalakwe, nipo mtaŵe umi wenu pa Jwalakwe. Mpitilisye kulupilila mpela mwele mwalijiganicisye, nipo mŵeje ŵakutogolela mnope.

⁸ Mlolecesye kuti pakasawoneka jwine jwalijose jwampaka amsokonesye ni maloŵe ga umanyilisi waunami, gele gakusatyocela ku misyungu ja ŵandu, nipo soni ku ulamusi wa misimu ja cilambo capasi ngaŵaga kwa Klistu iyayi.

⁹ Pakuti mcilu ca Klistu umlungu wosope ukusatamamo kusyesyene.

¹⁰ Nipo mwa Jwalakwe, jemanja mwapocele umi usyesyene. Soni Jwalakwe ni mtwe jwakulamulila ayimwene wosope ni macili gangawoneka.

¹¹ Mwa Klistu jemanja mwawumbele, ngaŵa kuwumbala* kwakutendekwa ni ŵanduku iyayi, nambo kuwumbala kwakutendekwa ni Klistu kwele kuli kutyoka m'macili gakunonyela ulemwa.*

¹² Pandaŵi jiŵam'batisyaga mwatesile mpela msicidwe mwilembe pamo ni Klistu, nipo ni ubatisowo mwajimwice najo pamo, pakulupilila macili ga Mlungu jwele juŵamjimwisye ku ŵawe.

¹³ Jemanja kala mwaliji ŵawe ligongo lya ulemwa wenu, nipo soni ligongo mwaliji ŵandu ŵa mitundu jine* ŵangali malamusi. Nambo sambano Mlungu ampele umi pamo ni Klistu. Ŵatukululucile ulemwa wetu wosope.

¹⁴ Mlungu ŵamasisye magambo getu gele gapali ligongo lyangagapikanila malamusi ga Mose.* Ŵagatyosisye pakugakomela pa msalaba.

¹⁵ Nipo pa msalaba pala Klistu ŵasumwile macili ga ayimwene ni maulamusi gawo gosope, soni pameso pa wosope ŵajendesisye mwakwaŵika pasogolo mpela acikayidi pa cindimba cakusangalalila kupunda kwakwe.

¹⁶ Myoyo mkasimkunda kuti mundu jwalijose amlamulile pa yakulya kapena yakumwa, kapena pa masiku gacindimba ca pa caka, kapena mwesi wagamba kopoka kwene kapena pa lisiku lyakupumula* lya Ayuda.

¹⁷ Yosopeyi yili yiwulili cabe ya yindu yisyesyene yele yikwisayo, nambo yisyesyene yakwe ni Klistu.

¹⁸ Akamsumula jwine mbote jenu. Jemanjajo akusanonyela kulilosya mpela ŵakulinandiya acimsyene, ni pakulambila malayika,* ligongo lya yindu yele yiŵayiweni m'mesomkulola, soni akusalikwesyaga pali pangali ligongo pakuti akusagamba kuyaga lunda lwa ŵandu,

¹⁹ nipo ngakwegamila Klistu jwele jwali mtwe wa cilu. Nambo pakulongoleledwa ni Klistu cilu cosope cikusapocela cakulya ni kulumbikana pampepe ni mbindi syakwe ni mitasi jakwe. Myoyo cilu cikusakula mpela mwele mwakusacila Mlungu kuti cikule.

Ya kuwa ni kwimuka pampepe ni Klistu

²⁰ Mwawile pampepe ni Klistu, nipo kuti ngasimlamulidwa soni ni ulamusi wa cilambo capasi. Sambano ligongo cici mkutenda mpela kuti umi wenu ukulupililape ya cilambo capasi? Nambi uli mkupikanilape malamusi mpela aga gakuti,

²¹ “Mkasimkamula camti,” “Mkasimcipasya celeco,” “Mkasimcikwaya camtico?”

²² Malamusi gelega ni yijiganyo yeleyi yili ya ŵandu basi, nipo yikusakwaya yindu yele yikusamala ŵandu ali amasile kamulicisya masengo.

²³ Kusyene gele malamusiga gakuwoneka mpela kuti gakutyocela mlunda lwalukwacisya kugalambila malayika, ni unami wa pakulinondiya ni kucisawusya cilu cawo. Nambo nganiyikola macili kose gakulekasya ndamo sya cilu syakunonyela yangalumbana.