Ŵafilipi 4 - Chiyawo Bible

Paulo akwasalila ŵakulupilila ŵa ku Filipi yakwenela kutenda

¹ Ŵakunonyeledwa ŵakulupilila acimjangu, ngusacilisya mnope kuŵa ni jemanja. Jemanja mkusandendekasya une kuti mbeje jwakusengwa. Amu ni mumkwenela kwimila nji ni umi wenu mwa Ambuje.

² Yuwodiya ni Sintike, conde ngumŵenda jemanja kuti mlinje kukamulana mpela ŵakulupilila mwa Ambuje.

³ M'mwe mjangu jwakulupicika pakamula masengo, ngumŵenda kuti mwakamusye acakongweŵa akamulane; pakuti jemanjaji akamwile masengo mwakulimbangana gakwasalila ŵandu ya Ngani Syambone* pamo ni une ni Klementi ni acimjenu ŵane ŵakamula nawo masengo. Mena ga ŵandu ŵiŵangamucisye uneŵa galembedwe mu buku ja umi.

⁴ Msengweje mwa Ambuje ndaŵi syosope. Nguwilisya soni kuti, “Msengweje.”

⁵ Kulitimalika kwenu kuwoneceje pameso pa ŵandu wosope. Ambuje ŵetu akwisa pangakaŵa.

⁶ Mkadandawula ni kandu kane kalikose, nambo pa ndaŵi jimkupopela mumŵendeje Mlungu yindu yayikumsoŵa, nipo ndaŵi syosope myiŵendeje yindu yeleyi ni mitima jakutogolela.

⁷ Mtendele wa Mlungu, wele uli wakupunda umanyilisi wosope wa ŵandu, tiwucisunga cenene mitima jenu ni nganisyo syenu kupitila mukulumbikana kwenu ni Klistu* Yesu.*

⁸ Pakumalisya, ŵakulupilila acimjangu, mŵiceje mitima jenu pa yindu yiliyose yayili yakuwona, yakucimbicikwa, yakulungama, yayiswela, yakunonyelesya, ni ya ucimbicimbi.

⁹ Myitendeje yimwalijiganyisye ni kuyipocela kutyocela kwa une, m'maloŵe ni myitendo yangu. Mlungu jwakusatupa uwe mtendele taciŵa ni jemanja.

Paulo akwatogolela ŵakulupilila ŵa ku Filipi ligongo lya mituka jawo

¹⁰ Ngusengwa mnope pingutama mu umpepe ni Ambuje kuti sambano pali papite ndaŵi jelewu, mtandite soni kulosya kuti jemanja mkusaganisya ya une. Mwaliji mkuganisya ya une nambo mwasoŵaga lipesa lyakuti mlosye kuti mkusanganicisya.

¹¹ Nganguŵeceta yeleyi mwakudandawula kuti ngusoŵa kandu, pakuti uneji nilijiganyisye kwikutila ni yele yingwete.

¹² Kuŵa jwakulaga ngusakumanyilila, nambo soni kuŵa jwakusicila ngusakumanyilila. Pa yosope yeneyi nalijiganyisye asili jakwe jakutama mwakwikutila pa yindu yiwukwete, pa ndaŵi jingwete yakulya kapena pa ndaŵi jimkiningola, pa ndaŵi jingwete yejinji kapena pa ndaŵi jimkiningola.

¹³ Ngukomboleka kutenda yosope yene ligongo Klistu akusandendekasya kuti mbeje jwakulimbangana pa yiliyose yakusimana nayo.

¹⁴ Nambope yaliji yambone kuti jemanja mwangamwisye une mu yisawusyo yangu.

¹⁵ Jemanja acimjangu ŵa ku Filipi* mkumanyilila cenene kuti pinatyosile ku Masedoniya, masiku gandanda gakulalicila Ngani Syambone, paliji pangali mpingo* wine uwakamulanaga ni une payakwenela kupeleka kapena kupocela, akaŵe jemanjape ni umwambaga mituka ja mbiya.

¹⁶ Pinaliji ku Tesalonika, kaŵilikaŵili mwatumisyaga yakungamucisya pa yakusoŵa yangu.

¹⁷ Pinguŵeceta yeleyi ngaŵaga kuti une ngujisosa mnope mituka jenujo iyayi, nambo cingusosa mnope cili cakuti pa yindu yimkweteyo, paŵe pana cakonjecesya.

¹⁸ Ngusimicisya kuti napocele yosope yimwambele une, nipo yaliji yejinji. Sambano ngwete yosope yakusosekwa, pakuti mbocele kutyocela kwa Epafulodito yimwandumicisye yila. Yili mpela cakupeleka ca liwungo lyambone kwa Mlungu, mbopesi jajili jakupoceledwa ni kumsangalasya jwalakwejo.

¹⁹ Mlungu jungusinamtumicila une akwete yipanje yejinji, nipo tacimpa yosope yimkuyisoŵa kupitila mwa Klistu Yesu.

²⁰ Kwende tumcimbicisye Mlungu Atati ŵetu, mpaka kalakala. Ami.*

Maloŵe gambesi

²¹ Mu lina lya Klistu Yesu mumbelecele moni kwa jwalijose jwa mu mpingomo. Akumpa moni ŵakulupilila acimjangu ŵindili nawo akuno.

²² Akumpa moni ŵandu wosope ŵa Mlungu ŵali akuno, mnopemnope ŵakamula masengo ku nyumba ja Mwenye jwa ku Loma.*

²³ Ngupopela kuti umbone mtima wa Ambuje ŵetu Yesu Klistu uwe pa jemanja ni kumpa upile.