Ŵafilipi 3 - Chiyawo Bible

Kulungama kusyesyene

¹ Pakumalisya ŵakulupilila acimjangu nguti, “Sengwani mu umpepe wenu mwa Ambuje.” Ngangudandawula kuwilisya kumlembela yinalembile kala, nipo maloŵego gali gakumkamucisya jemanja mwacimsyene.

² Mkalamuce nawo ŵandu ŵele yitendo yawo yili mpela ya m'mbwa, ŵele ŵakusatenda yakusakala, ŵele ŵakusagamba kulikatakata pa yilu yawo.

³ Uwe ngaŵaga jemanjajo ni ŵitwawumbele kusyesyene, pakuti uwe tukusitumlambila Mlungu mwakulongoleledwa ni Msimu wakwe Ŵaswela. Tukusasengwa mu umpepe wetu ni Klistu* Yesu* soni ngatukusakulupilila yayikutendekwa pa yilu yetu.

⁴ Ngakombolece kulupilila yindu yeleyi. Naga apali jwine jwakuganisya kuti akwete magongo gakwegamila pa misyungu mpela jeleji, une ngwete ligongo lyakupunda lyelelo.

⁵ Unetu nawumbele pinaliji ni masiku msano ni gatatu cipagwile. Une ndili jwa mtundu wa Aisalaeli, jwa lukosyo lwa Benjamini, Mhebeli msyesyene jwakupagwa kutyocela mwa acinangolo ŵa Cihebeli. Natesile yosope yene yigasakaga Malamusi ga Ciyuda kuti nayitende, naliji Mfalisi,*

⁶ nipo cangu caliji cekulungwa mwakuti nawusawisye mnope mpingo* wa Mlungu.

⁷ Nambo ligongo lya Klistu yele yinaganisyaga kuti yili yakupindulisya, sambano nguyiwona kuti yili yangali mate.

⁸ Kusyene, yosope nguyiwona kuti yili yangapindulisya pakuyiwanicisya ni kum'manyilila Yesu Klistu, ŵele ŵali Ambuje ŵangu. Ligongo lya Klistu nakundile kuleka yosope yene, ni kuyiwona mpela ya pacitutu, kuti cakupata cangu ciŵe Klistu,

⁹ ni kumanyilila kuti une ndili jwakwe. Une ngaŵa mkulitenda mwajikape kuti m'mbe jwakulungama pakugapikanila Malamusi, nambo ngoleje kulungama kwakukusimanikwa pakumkulupilila Klistu, kulungama kwakutyocela kwa Mlungu kwakukwegamila pa cikulupi.

¹⁰ Cele cingusaka cili cakuti nim'manyilile Klistu, nambo soni macili gigamjimwisye jwalakwejo ku ŵawe. Ngusaka soni kupikana yipwetesi pamo ni jwalakwejo ni kulandana ni jwalakwejo mu ciwa cakwe.

¹¹ Ngulinjilila kutenda yeleyi kupitila mcembeceyo kuti une soni tinjimuce ku ŵawe.

Ya kuwutucila kumbesi kwa mpikisano wakuwutuka

¹² Nganguŵeceta kuti mbocele mbote, kapena kuti masile soni kwika pa cele cingulinjilila. Nambo ngupitilisya kuwutuka ni kulinjilila kuti ngapocele mbote, yaliji pa ligongo lyeleli Klistu Yesu ŵandendekasisye une kuti m'mbe jwakwe.

¹³ Ŵakulupilila acimjangu, nganguganisya kose kuti niyipatile kala. Cindu cimpepe cingusacitenda cili cakuti ngusaliŵalila yayili mu nyuma mwangu, ni kulinjilila kumbali jangu kuti nayiyicile yayili msogolo.

¹⁴ Nguwutucila cakumbesi kwa malo ga mpikisano wakuwutukawu kuti ngapocele mbote Kwinani, jakutuŵilanjila Mlungu kupitila mwa Klistu Yesu.

¹⁵ Sambano kwa uwe ŵatuli ŵakomangala pa umi wetu wa usimu, tuŵe ni mtima uwowo. Naga mkwete nganisyo syakulekangana pa yindu yine ni mkwete nganisyo syakulekangana ni syelesi, nipo Mlungu tacim'manyisya yeleyi.

¹⁶ Nambo atamose yiŵe camtuli, kwende tupitilisye kwawula msogolo mwakulingana ni malamusi gitukukuya mpaka sambano jino.

¹⁷ Ŵakulupilila acimjangu, jemanja wosope musyasyeje une, soni mwalolecesyeje ŵele ŵakukuya cisyasyo citwampele uwe.

¹⁸ Mbele ndili kumsalila kaŵilikaŵili, nipo sambano nguwilisya kumsalila soni jemanja mwakulila misosi, kuti pana ŵandu ŵajinji ŵele ŵakusaŵengana ni ciwa ca Klistu ca pa msalaba.

¹⁹ Kwa jemanjajo cakuyicisya cili conasiko. Yakusaka ya umi wawo ni yele yili milungu jawo. Akusapocela pa yindu yakaŵajilwe kutenda nayo soni, yakuganisya yawo yili ya pa cilambo capasi pano basi.

²⁰ Nambo uweji kumangwetu kusyesyene ni kwinani, kweleko tikucityocela Mkulupusyo jwatukumjembecela, Ambuje ŵetu Yesu Klistu.

²¹ Jwalakwejo taciyisandusya yilu yetu yangali mateyi kuti yiŵe yakulandana ni cilu cakwe ca lumbili. Tacitenda yeleyi mwamacili gakwe gakukomboleka kuyitendekasya yindu yosope kuti yiŵe pasi pa ulamusi wakwe.