Ŵafilipi 2 - Chiyawo Bible

Kulinondiya kwa Klistu ni ukulungwa wakwe

¹ Klistu* jwakutama mwa jemanja akusamtendekasya kuti mŵe ŵakulimba mitima. Cinonyelo cakwe cikusamtendesya jemanja kuti mkaŵaga ŵakudandawula. Mkusaŵa ŵa mtima umpepe kupitila mwa Msimu Ŵaswela, soni mkusimwatendela canasa acimjenu.

² Ali ni ligongo lyakwe ngumŵenda kuti musangalasye kusyesyene pakwiticisyana nganisyo ni kunonyelana mwakulandana, kuŵa ŵa mtima umo ni cakulinga cimpepe,

³ soni mkatendaga kandu ni mtima wakulinonyela, kapena wakulikwesya. Nambo mŵeje ŵakulinondiya, soni jwalijose amwoneje mjakwe kuti ali jwakumpunda jwalakwejo.

⁴ Mkagamba kusaka yindu yayikumnonyelesya m'mwejo jikape, nambo soni yayikwanonyelesya ŵane.

⁵ Myoyo yimkusatenda yiŵeje mpela yiŵatesile Klistu Yesu.*

⁶ Jwalakweju jwakwete upagwe wa umlungu citandilile, nambo nganalinga kulitenda kuŵa mpela jwakulandana ni Mlungu.

⁷ Jwalakwe ŵalitulwisye mnope pakujigala uwonece wamti mpela wa kapolo, ni kuŵa mundu mpela ŵandu wosope.

⁸ Jwalakwe ŵalinondiye nipo jwapikanilaga mpaka ndaŵi ja ciwa cakwe, ciwa cakwe ca pa msalaba.

⁹ Ligongo lya yeleyi Mlungu ŵamkwesisye mnope, ni kumpa lina lyakupunda mena gosope.

¹⁰ Ŵatesile yeleyi kuti pakupikana lina lya Yesu, yakupanganyidwa yosope ya kwinani, pasi pano ni pasi pa cilambo tiyitindiŵale pasi mwakulambila.

¹¹ Yosope tiyijiticisye kuti, “Yesu Klistu ali Ambuje,” nipo pakutenda myoyo yicimbicisye Atati ŵakwinani.

Aklistu aŵeje mpela ndondwa syakulangucisya cilambo capasi

¹² Ali ni ligongo lyakwe ŵakunonyeledwa acimjangu, mŵele mli ŵakupikanila ndaŵi syosope kutyocela pa ndaŵi jinaliji ni jemanja. Nambo sambano pinganimba ni jemanja, mŵeje ŵakupikanila mnope. Mpitilisye ni kwikasya cikulupi cenu pasyesyene mwa woga ni mwakutetemela.

¹³ Mlungu akukamula masengo mwa jemanja, msoseje ni kutenda yayili yakumsangalasya jwalakwejo.

¹⁴ Mtendeje yosope yene mwanganyinyilika ni mwangasisya,

¹⁵ kuti pakutenda myoyo mŵeje ŵangali magambo ni ŵangali ulemwa sikati ja ŵandu ŵa unami ni ŵakwasokonesya acimjawo. Pasikati pa ŵele ŵanduŵa jemanja mkwenela kulosya lilanguka mpela musikusaŵalila ndondwa pasi pano kutyocela kwinani,

¹⁶ pakwasalila jemanjajo maloŵe gakupeleka umi. Myoyo une tinjikola ligongo lyakusengwela pa Lisiku lya Kuyika soni kwa Klistu, ligongo yimtesile jemanja tiyicilosya kuti nganimbutuka mwa mtega pa mpikisano wakuwutuka, kapena kukamula masengo mwa mtawu kwa mtega.

¹⁷ Cikulupi cenu mwa Ambuje ni masengo genu yili mpela mbopesi syakupelecedwa kwa jwalakwejo. Pitinjiwapo, miasi jangu ni kuŵa mpela jakutajidwa pa mbopesi jele cikulupi cenu cikupeleka kwa Mlungu. Naga yili myoyo ndili jwakusengwa, soni jwakusangalala pampepe ni jemanja.

¹⁸ Myoyo soni jemanja msengweje, ni kusangalala pampepe ni une.

Timoteo ni Epafulodito

¹⁹ Naga Ambuje akukunda, ngukulupilila kuti tinjimtuma Timoteo kweleko pangakaŵa, kuti mtima wangu utame pasi pitimbikane ya jemanja kweleko.

²⁰ Pakuti pangali soni jwine jwakwete mtima wakusamalila kusyesyene ya jemanja.

²¹ Ŵane wosopewo agamba kusosa yakwanonyelesya acimsyene pewo, ngaŵaga yakumnonyelesya Yesu Klistu.

²² Nambo jemanja mkujimanyilila ndamo ja Timoteo kuti jili jambone. Jemanja mkumanyilila soni kuti jwalakwejo jwakamwile masengo gakwenesya Ngani Syambone* mwakamulana ni une, mpela mwanace ni babagwe.

²³ Sambano ngwembecela kumtumisya jwalakwejo pangakaŵapa kwa jemanja patinayimanyilile ya mutiyiŵele ya une.

²⁴ Nambo ngukulupilila kuti, naga Ambuje akusaka, une soni tinjiyika kweleko pangakaŵa.

²⁵ Nganisisye kuti kuli kwakusosekwa kuti nimtumicisye jemanja, Epafulodito jwakulupilila mjetu, jwele jwakamwile masengo mwakulimbika mnope pampepe ni une soni jwele jwatumicile mpela ndumetume, jwakundumicila payakusoŵa yangu.

²⁶ Nambo sambano akumsacilila kumwona jemanja, mwakuti jwakulagasika mu mtima pakumanyilila kuti jemanja mwapikene kuti jwalakwejo akulwala.

²⁷ Yili yisyene kuti jwalwasile ciŵandika kuwa, nambo mwa upile Mlungu ŵamtendele jwalakwejo canasa, nambo nganagamba kumtendela canasa jwalakwejope, nambo soni ŵandendele une, kuti canasa cangu cimale.

²⁸ Ali ni ligongo lyakwe ngusacilisya mnope kumtumisya jwalakwejo kwa jemanja, kuti pakumwona soni jwalakwejo, jemanja timsangalale kuti kudandawula kwangu kunandipe.

²⁹ Mumpocele jwalakwejo mwa Ambuje ni mwa lukondwa losope. Mwacimbicisyeje ŵandu ŵamti myiyiŵa mpela jwalakwejo,

³⁰ ligongo jwalakwejo jwasigele panandi kuwulajidwa ligongo lyakamula masengo ga Klistu. Jwalakweju jwalipelece ngajogopa kuwulajidwa pakungamusya une pa yindu yimwalepele kundumicila une.