Ŵaefeso 5 - Chiyawo Bible

Yakwenda mwilanguka

¹ Pakuŵa sambano jemanja mli ŵanace ŵakunonyelwa ŵa Mlungu, myoyo mlinjeje kuŵa mpela jwalakwejo.

² Mnonyelaneje, mpela mwele Klistu* ŵatunonyele uwe, ni ŵapelece umi wakwe ligongo lyetuwe mpela mbopesi jakununjila jakusangalasya Mlungu.

³ Pakuŵa kuti mli ŵandu ŵa Mlungu, ni kasimtenda cikululu kapena yakunyalaya kapena mitulo soni yikasiyikolanjidwa kose yosopeyi pasikati penu.

⁴ Nipo soni kasimŵecetaga yakuŵagula, ya usilu kapena yangali mate, nambo mŵeceteje yakumtogolela Mlungu.

⁵ M'manyilile ayi, kuti mundu jwalijose jwa cikululu, kapena jwakutenda ya usakwa, kapena jwa mitulo (pakuti jwa mitulo ali mpela mundu jwakulambila milungu jine) ngasajinjila mu Ucimwene wa Klistu ni wa Mlungu.

⁶ Kasimkunda mundu jwine jwalijose kumloŵesya ni maloŵe ga unami, pakuti yindu yamti myiyi yikusayicisya ukali wa Mlungu pa ŵandu ŵele ŵangakusampikanila.

⁷ Myoyo kasimkamulana nawo ŵandu ŵamti myoyo.

⁸ Jemanja soni kala mwaliji mcipi, nambo sambano mli mwilanguka ligongo mli ŵakwe ŵa Ambuje. Myoyo mjendeje mpela ŵandu ŵamli mwilanguka.

⁹ Pajatu palili lilanguka, pakusasimanikwa umbone wosope, cilungamo ni usyesyene wene.

¹⁰ Mlinjeje kulijiganya yakwasangalasya Ambuje.

¹¹ Mkajigala mbali pa yindu yangali mate ya mcipi, nambo m'malo mwakwe myilosye lilanguka.

¹² Yikusaŵa yakutesya soni kuti mundu ayikolanje yindu yakusatenda jemanjajo mwakusisika.

¹³ Nambo lilanguka likusamulicila yindu, nipo yosope yikusawonecela pakulanguka.

¹⁴ Myoyo cilicose cacikusawonecela pakulanguka cikusaŵa lilanguka. Ni ligongo lyakwe akusati, “Mjimuce ŵamlugonomwe, jimukani kutyocela ku ŵawe, nipo Klistu tacimŵalila m'mwejo.”

¹⁵ Myoyo msamalile utame wenu, mkatama mpela ŵandu ŵangali lunda, nambo mpela ŵandu ŵana lunda.

¹⁶ Mkamulisye cenene masengo ndaŵi jenu jimkwete, ligongo masiku agano gali gakusakala.

¹⁷ Ni ligongo lyakwe mkaŵa ŵakuloŵela, nambo m'manyilile yele yakusaka Ambuje kuti myitendeje.

¹⁸ Kasimkolelwa ni finyo, jwele jwampaka amjonanje, nambo m'malo mwakwe mgumbalilwe ni Msimu Ŵaswela.

¹⁹ Mŵecetaneje jwine ni mjakwe ni maloŵe ga Masalimo, ni nyimbo sya usimu. Nipo mwajimbile Ambuje nyimbo ni masalimo mwakusangalala m'mitima mwenu.

²⁰ Mumtogoleleje Mlungu Atati ndaŵi syosope ligongo lya yosope mu lina lya Ambuje ŵetu Yesu* Klistu.

Ya acakongwe ni acalume mwiŵasa

²¹ Jemanja ŵakumjogopa Klistu, mpikangananeje jwine ni mjakwe.

²² Jemanja acakongwe, mwapikanileje aciŵamkwenu, mpela mumkwapikanila Ambuje.

²³ Paja jwamlume ali mtwe wa ŵamkwakwe, mpelaga mwele Klistu ali mtwe wa mpingo,* nipo msyene ali Mkulupusyo jwa mpingo, wele wawuli cilu cakwe.

²⁴ Sambano mpela mpingo ukupikanila Klistu, myoyo soni acakongwe mwapikanileje aciŵamkwenu mu yosope.

²⁵ Jemanja acalume, mwanonyeleje aciŵamkwenu, mpela muŵawunonyelele Klistu mpingo, ni ŵalipelece ligongo lya mpingowo.

²⁶ Ŵatesile yeleyi kuti uwe tuŵe ŵakweŵakwepe, ali awuswejesye pakuwucapa ni mesi nipo soni ni maloŵe gakwe.

²⁷ Ŵasacile kuti awujimice pameso pakwe mlumbili, uli wangali liŵasi kapena ngwinyata, kapena kandu kane kalikose kakuwusakasya, nambo uli wawuswela ni wangali cipasipasi.

²⁸ Myoyopeyo soni acalume ŵanonyeleje aciŵamkwawo, mpela mwele mwakusayinonyelela yilu yawo. Jwele jwakusamnonyela jwamkongwe jwakwe ni kuti akusalinonyela jwalakwe msyene.

²⁹ Pakuti pangali mundu jwakuŵengana ni cilu cakwe, nambo akusacilisya ni kucisamalila, mpela mwele Klistu akusawutendela mpingo wakwe.

³⁰ Akusatenda myoyo ligongo mpingowo ni cilu cakwe, nipo uwe tuli yiŵalo yakwe.

³¹ Paja maloŵe ga Mlungu gakuti, “Ni ligongo lyakwe jwamlume tacaleka atatigwe ni mamagwe, ni kulumbikana ni ŵamkwakwe nipo ŵaŵiliwo taciŵa cilu cimpepe.”

³² Maloŵe gelega gakutusalila ya mtemela yayikulungwa, nipo kuti mtemelawo uli wakwaya Klistu ni mpingo.

³³ Nambo soni yikumkwaya jemanja, kuti jwamlume jwalijose amnonyeleje jwamkongwe jwakwe mpela mwakusalinonyelela jwalakwe msyene, nipo soni jwamkongwe jwalijose amcimbicisyeje jwamlume jwakwe.