Ŵaefeso 4 - Chiyawo Bible

Ya umope mwa Klistu

¹ Ni ligongo lyakwe une, jundili mkayidi ligongo lyakutumicila Ambuje, ngumŵenda kuti mŵe ni ndamo syambone syakulosya kuti mli ŵandu ŵakusagulidwa ni msyene Mlungu.

² Mŵeje ŵakulinondiya, ŵakutulala nipo soni ŵakupilila ndaŵi syosope, mwusimaneje mtima wenu mwa cinonyelo kwa jwine ni mjakwe.

³ Mŵeje ŵakulinjilila kusunga umpepe wa Msimu Ŵaswela pa kamulana mu mtendele.

⁴ Cipali cilu cimo, Msimu Ŵaswela ŵamope, nipo soni cipali cembeceyo cimo ciŵamŵilanjile Mlungu.

⁵ Apali Ambuje ŵamo, cikulupi cimo, ubatiso umo,

⁶ apali Mlungu jumo jwele jwali Atati jwa ŵandu wosope. Jwalakwe ali penani pa wosope, akusakamula masengo kupitila mwa wosope nipo ali mwa wosope.

⁷ Nambo jwalijose jwa uwe jwapocele umbone mtima mwakamulana ni mwakupelecela Klistu* mtuka wakwe.

⁸ Pakuti maloŵe ga Mlungu gakuti, “Piŵakwesile kwinani mnope, ŵajigele acikayidi ŵajinji, nipo ŵagaŵile ŵandu mituka.”

⁹ Sambano maloŵe gakuti “ŵakwesile,” ana gakugopolela kuti cici? Gakugopolela kuti pandanda ŵatulucile pasi pasyesyene pa cilambo.

¹⁰ Juŵatulwicejo, ni jujojo juŵakwesile, nipo ŵapelengenye kwinani kosope kuti yindu yosope yiŵe yagumbalilwa ni jwalakwe.

¹¹ Jwalakweju ni jwele “juŵapelece mituka kwa ŵandu.” Mituka jakwe jaliji jakuti ŵane aŵe ŵandumetume, ŵane kuŵa ŵakulocesya, ŵane kuŵa ŵakulalicila, ŵane kuŵa abusa ni aciŵalimu.

¹² Masengo gawo galiji gakuti akolocesye cilepe ŵandu ŵa Mlungu ku masengo gakutumicila, ni kulimbikasya mpingo* wele wawuli cilu ca Klistu.

¹³ Nipo soni pakumalisya tuciyika ku umpepe wele ukusasimanikwa pakukulupilila soni pakum'manyilila Mwanace jwa Mlungu. Nipo pelepo tucikomangala kusyesyene ni kwika pa msingu wakwenela wa Klistu.

¹⁴ Ngasituŵa mpela ŵanace ŵa makandi gagambaga kutenganyika ni matumbela ni soni gambaga kujigalwa ni mbungo jilijose ja kwiganya ya ŵandu ŵa unami ŵele ŵakusaŵasokonesya ŵandu ni kalamuka kwawo.

¹⁵ Nambo pakuŵeceta yakuwona ni mtima wa cinonyelo, tukuleje mu yosope mwa Klistu jwele jwali mtwe,

¹⁶ wele wawukulamulila cilu cosope, ni kulumbikanya pampepe ni mbindi syakwe syosope. Nipo naga ciŵalo cilicose cikusakamula masengo gakwe mwakwenela, ni kuti cilu cosope cikusakula ni kulilimbikasya ni cinonyelo.

Umi wasambano mwa Klistu

¹⁷ Mu lina lya Ambuje ngumsalila sambano kuti, kasimjenda mpela mwakusatendela ŵandu ŵa mitundu jine* pakuya nganisyo syawo syangalumbana.

¹⁸ Lunda lwawo lwatesile cidima, nipo nganakola mbali mu umi wakupeleka Mlungu ligongo lya ungamanyilila wele wayice kwa jemanjajo ligongo lya kulimba mtima kwawo.

¹⁹ Jemanjajo syamasile soni, nipo ŵagambile kulipeleka ku yangalumbana, ni kusaka kutenda yakusakala yiliyose mwangalilekasya.

²⁰ Nambo amu ngaŵa mwele mumwalijiganyicisye ya Klistu mula iyayi.

²¹ Nagatu mwapikene ya jwelejo, ni kulijiganya ya jwelejo, mwakulingana ni usyesyene wele wawuli mwa Yesu.*

²² Myoyo mlece ndamo syenu syakala syele syaliji mkumjonanga ni yakumbila yakwe yakusakala.

²³ Mitima ni nganisyo syenu sicenje kuŵa sya sambano,

²⁴ nipo m'wale umundu wa sambano, ŵawupanganyisye Mlungu mwakulandana najo. Pelepo timciŵa ŵakulungamika ni ŵaswela mtima kusyesyene.

²⁵ Sambano mwulece unami, jwalijose aŵeceteje yakuwona yisyesyene ni mjakwe, pakuŵa wosopewe tuli yiŵalo ya cilu ca Klistu.

²⁶ Mtumbile, nambo mkalemwa, nipo mkasimkunda kuti lyuŵa likapile mli citumbilile.

²⁷ Mkasimumpa Satana* lipesa kuti amgwisye.

²⁸ Mundu juŵaliji mkwiŵa, akasajiŵa soni nambo atande kamula masengo mwakulimbika ni kutenda yambone ni makono gakwe, kuti apate kandu kakwapa ŵakulaga.

²⁹ Mkamwa mwenu mukasimukopoka maloŵe galigose gakusakala, nambo mŵeceteje maloŵe ago pego gagali gambone ni kulimbikasya mitima mpela mugakusosecela, kuti acimjenu ŵakugapikana maloŵego apindule nago.

³⁰ Mkasimdandawulisya Msimu Ŵaswela ŵiŵaŵisile Mlungu cimanyisyo cakwe cakusimicisya kuti jemanja mli wakwe pa lisiku litacimkulupusya Mlungujo kusyesyene.

³¹ Mkutyosye pasikati penu kuŵengana, kukalipa, nipo soni kupya mtima. Mkasimtenda njojo kapena kuŵeceta maloŵe gacipongwe, soni paŵeje pangali kusakala kwine kulikose.

³² M'malo mwakwe, mnonyelaneje ni kutendelana canasa nipo ni kululucilanaga jwine ni mjakwe mpela muŵamkululucile Mlungu mwa Klistu jemanja mula.