Ŵaefeso 3 - Chiyawo Bible

Ya masengo ga Paulo pasikati pa ŵandu ŵa mitundu jine

¹ Kwa lyele ligongoli une Paulo ngumpopelela jemanja ŵandu ŵa mitundu jine,* pakuŵa ndili mkayidi jwa Klistu* Yesu* ligongo lya jemanja.

² Kusyene mwapikene ya masengo gaŵambele Mlungu mwa umbone mtima wakwe kuti nagatende kwa jemanja.

³ Ŵamanyisye yamtemela yakwe, mpela yinamlembele mwakata yila.

⁴ Patimŵalanjeje yeleyi timpakombole kuyiwona yamtemela yakwaya Klistu.

⁵ Ŵandu ŵa mipago jakala nganayimanyililaga yamtemelawo, nambo Mlungu awusasile sambano mtemelawo mwa Msimu Ŵaswela kwa ŵandumetume ni ŵakulocesya ŵakwe ŵaswela.

⁶ Mtemelawo ni wakuti kupitila mu Ngani Syambone* ŵandu ŵa mitundu jine nombe nawo akwenela kupocela upile wa Mlungu pamo ni Ayuda. Ali yiŵalo ya cilu cimo, nipo mwa Klistu Yesu akusapocela nawo cilanga* ca Mlungu.

⁷ Natendekwe kuŵa jwakulalicila* Ngani Syambone ni umbone mtima wa Mlungu, nipo pakutenda myoyo ŵalosisye macili gakwe.

⁸ Atamose ndili jwangasosekwa mnope pasikati pa ŵandu ŵa Mlungu, nambope Mlungu ŵambele unejo masengo aga, gakuti nalalicile ŵandu ŵa mitundu jine ya cipanje cangamala, cakusatupa Mlungu mwa Klistu.

⁹ Ŵambele masengo gakwasalila ŵandu wosope ya mutacitendela Mlungu yosope yele yiŵapanganyisye cilepe mwamtemela. Mlungu ŵiŵapanganyisye yosope, ŵawusunjile mtemelawo, mkanijikwane ndaŵi.

¹⁰ Sambano akusaka kuti, kupitila mwa mpingo,* acakulungwa ni ŵamaulamusi wosope ŵakwinani amanyilile ya lunda lwa Mlungu lwa mtundu ni mtundu.

¹¹ Mlungu ŵayitesile yeleyi kuti yiŵe mwele muŵatendele mwa Klistu Yesu Ambuje ŵetu, mkanijikwane ndaŵi.

¹² Pakuŵa kuti tuli mwa Klistu soni tukumkulupilila Jwalakwe, ni tukulimba mtima kuŵandicila kwa Mlungu mwangakayicila kose.

¹³ Ngumŵenda sambano kuti mkajasa mtima pakuti ngulaga ligongo lya jemanja, yeleyi yili yakumpa jemanja ucimbicimbi.

Cinonyelo ca Klistu

¹⁴ Ni ligongo lyakwe sambano ngwatindiŵalila Atati,

¹⁵ ŵele liŵasa lililyose lya kwinani ni pasi pano likusakolanjidwa ni lina lyawo.

¹⁶ Ngumŵenda Mlungu kuti kutyocela mcipanje ca lumbili lwakwe ampe macili, nipo mwa Msimu wakwe Ŵaswela alimbisye umi wenu wa usimu,

¹⁷ ngupopela kuti mwa cikulupi cenu, Klistu atamilicice m'mitima jenu, kuti mtitimice miciga jenu ja cinonyelo, nipo soni kuti mŵice yilimbilimbi ya umi wenu wosope pa cinonyelo.

¹⁸ Ngumŵenda Mlungu kuti, pampepe ni ŵandu ŵakwe wosope, mpakombole kumanyilila ya citando cakwe ni ulewu wakwe, cikwesya cakwe ni kwendelela kwakwe kwa cinonyelo ca Klistu.

¹⁹ Kusyene ngupopelela kuti m'manyilile cinonyelo ca Klistu cakupunda lunda lwa ŵandu, kuti mgumbalilwe mnope ni umi wa Mlungu msyene.

²⁰ Lumbili luŵe kwa Mlungu jwele, mwamacili gakwe gakamula masengo mwetuwe, mpaka mpakombole kutenda mwakuculuya mnope kupunda mwele mutukaŵendele kapena kuganicisya.

²¹ Mlungu aŵe ni lumbili mu mpingo ni mwa Klistu Yesu ku ndaŵi syangamala. Ami.*