Ŵaefeso 2 - Chiyawo Bible

Ŵele ŵiŵaliji ŵawe ŵapocele umi

¹ Kalakala jemanja mwaliji ŵawe mu msimu ligongo lyangapikana ni ulemwa* wenu.

² Pa ndaŵi jelejo, mwatendaga yakusakala pakuya matala gangalumbana ga cilambo capasi cino, ni kumpikanila Satana.* Jwele jwakulamula cilambo capasi nipo msimu wakwe ŵangalumbana ukamula masengo pasikati pa ŵandu ŵakwimucila Mlungu.

³ Ndaŵi jelejo uwe wosope twakwete umi wampela wa jemanjajo, nipo twakwete ndamo syakunonyela yindu yangalumbana. Twatendaga soni yindu yiliyose yiyakumbilaga yilu ni nganisyo syetu. Ni ligongo lyakwe, twaliji ŵakwenela kupocela lutumbilo lwa Mlungu mpela ŵandu ŵane wosope.

⁴ Nambo Mlungu ni jwacanasa cacikulungwa, ni ŵatunonyele ni cinonyelo cacikulungwa,

⁵ mwamti, ndaŵi jele jitwaliji ŵawe mu msimu ligongo lya ungapikana wetu, Jwalakwe ŵatupele umi pampepe ni Klistu.* Umbone mtima wa Mlungu ni wele wamkulupwisye.

⁶ Pakuti tuli mwa Klistu Yesu,* Mlungu ŵatujimwisye ku ŵawe pampepe najo, ni kutupa malo ga ucimbicimbi pampepe ni Jwalakwe ku cilambo ca kwinani.

⁷ Ŵatesile yeleyi kutulosya kuti kundaŵi syosope syasikwisasyo umbone mtima wawo uli waukulungwa mnope kupitila mwa Klistu Yesu.

⁸ Ni umbone mtima wa Mlungu ni wele wamkulupwisye ligongo lya kulupilila. Ngaŵa kuti mkulupwice ligongo lya yele yimwatesileyo iyayi, nambo uli mtuka wa Mlungu.

⁹ Mundu ngakulupuka ligongo lya yakutenda yakwe, kogopa kuti tacilikwesyaga.

¹⁰ Mlungu ŵatupanganyisye mpela mutuŵelelemu, nipo mwa Klistu Yesu ŵatupanganyisye kuti umi wetu uŵe wakamula masengo gambone gaŵaŵicile cilepe Jwalakwe kuti tugakamule.

Ya umo mwa Klistu

¹¹ Jemanja ŵandu ŵa mitundu jine,* mkumbucile mwele mumwaŵelele kalakala. Ayuda ŵalikolangaga ŵaumbale ligongo lya mteto uŵatendaga pa cilu cawo, nipo jemanja akusamkolanga ŵandu ŵangawumbala.

¹² Sambano kumbucilani kuti pa ndaŵi jejila mwaliji ŵakutalikangana ni Klistu. Mwaliji acalendo nipo nganimŵa kose ŵandu ŵakusagulidwa ni Mlungu. Mwaliji ŵangali mbali mu yilanga ya Mlungu yele yiŵatite kuti tacapa ŵandu ŵakwe nipo mwatamaga pa cilambo pano mli ŵangali cembeceyo, soni ŵangali Mlungu.

¹³ Nambo sambano mwa Klistu Yesu, jemanja ŵimwaliji kwakutalicila ni Mlungu, mtemi pakuŵandikana najo, ligongo lya ciwa ca Klistu.

¹⁴ Klistu ŵapelece mtendele pasikati pa ŵandu ŵa Ciyuda ni ŵandu ŵa mitundu jine nipo ŵatujilenye kuti tuŵe ŵamo. Ni cilu cakwe ŵagumwile lipupa lya uŵengani lyeleli lyatulekanganyaga.

¹⁵ Jwalakwe ŵamasisye Malamusi ga Ciyuda pampepe ni misyungu jakwe. Ŵatesile yeleyi kuti mkutyocela m'mitundu jiŵili jila, apanganye mtundu umo wa sambano mwa Jwalakwe, kuti pakutenda myoyo paŵe mtendele.

¹⁶ Pa ciwa cakwe pa msalaba, Klistu ŵamasisye uŵengani nipo kuti pa msalabawo apwatikenye pamo mitundu jiŵili kuti jiŵe cilu cimo, ni kujijilanya ni Mlungu.

¹⁷ Klistu ŵayice ni ŵalalicile Ngani Syambone* sya mtendele kwa ŵandu wosope; kwa jemanja ŵandu ŵa mitundu jine, ŵimwaliji kwakutalikangana ni Mlungu, ni kwa jemanja Ayuda, ŵimwaliji pakuŵandikana ni Jwalakwejo.

¹⁸ Pakuti mwa Klistu uwe wosope, Ayuda ni ŵandu ŵa mitundu jine, tupakombole kwika kwa Atati mwa Msimu Ŵaswela ŵamopewo.

¹⁹ Ni ligongo lyakwe sambano, jemanja ŵandu ŵa mitundu jine, nganimŵa soni acalendo kapena ŵa mwitala iyayi, nambo jemanja sambano mli alukosyo pamo ni ŵandu ŵakwe ŵa Mlungu, nipo soni jemanja mli mwiŵasa lyakwe lya Mlungu.

²⁰ Jemanja mli ŵataŵidwe pampepe m'nyumba jajitaŵidwe pa yilimbilimbi yiŵaŵisile ŵandumetume ni ŵakulocesya, nipo Klistu Yesu msyene ni liganga lya pandumba.*

²¹ Jwalakwe ni jwajikamwile josope pampepe nipo jikula kuti jiŵe nyumba jajiswela ja Ambuje.

²² Mkulumbikana ni Jwalakwejo, jemanja mtaŵidwe pampepe ni ŵane wosope kuti mŵe malo gakutamamo Mlungu mwa Msimu Ŵaswela.