Ŵaefeso 1 - Chiyawo Bible

¹ Cikalataci cikutyocela kwa une Paulo, ndumetume* jwa Klistu* Yesu* mwa lisosa lya Mlungu. Ngulembela cikalataci kwa ŵandu ŵa Mlungu ŵali ku Efeso, ŵele ŵali ŵakulupicika mu umpepe ni Klistu Yesu.

² Umbone mtima ni mtendele yakutyocela kwa Mlungu Atati ŵetu ni kwa Ambuje Yesu Klistu yiŵe ni jemanja.

Upile wa usimu mwa Klistu

³ Kwende tumtogolele Mlungu, Atati ŵa Ambuje ŵetu Yesu Klistu. Mwa Klistu ŵatupele upile wosope wa usimu wa kwinani.

⁴ Mlungu piŵaliji mkanapanganye cilambo capasi, ŵatusagulile cile kupitila mwa Klistu kuti tuŵe ŵaswela mtima ni kuŵa ŵangali ulemwa* pameso pakwe.

⁵ Ligongo lya kutunonyela, ŵalinganyicisye cilepe kuti mwa Yesu Klistu atupocele kuŵa ŵanace ŵakwe. Ŵatesile yeleyi ligongo ŵasacile.

⁶ Kwende tumlumbe Mlungu ligongo lya umbone mtima wakwe, pakutupa mwanace jwakwe jwakunonyelwa mpela mtuka walulele.

⁷ Ni miasi ja Klistu twakulupwice, soni ulemwa wetu ŵatukululucile ligongo lya umbone mtima wa Mlungu waukulungwa,

⁸ wuŵatupele uwe mwakupelenganya malile. Mwa lunda ni umanyilisi wakwe,

⁹ Mlungu ŵayitesile yele yiŵayisosile. Ŵatumanyisye uwe yiyaliji yakusisika yele yiŵayisacile kuyimalisya kupitila mwa Klistu.

¹⁰ Cele Mlungu ciŵaŵecete kuti acitende pajicikwana ndaŵi jakwe, ni cakuti asonganye pampepe yindu yosope ya kwinani ni pasi pano, Klistu ni kuŵa jwamkungwa jwakwe.

¹¹ Pakuti Mlungu akusajongolela yindu yosope mwakusosela msyene. Jwalakwe ŵatusagwile mwa Klistu kuti tuŵe ŵakweŵakwepe, nipo ŵayitesile kuti yiŵe myoyo.

¹² Ŵasacile kuti uwe, ŵatwaliji ŵandanda kwembecela Klistu, tulucimbicisye lumbili lwakwe.

¹³ Mwa Klistu, soni jemanja pimwapikene utenga usyesyene, welewu wuli Ngani Syambone* syakwakulupusya, ŵasikulupilile. Ni ligongo lyakwe Mlungu ŵaŵisile cimanyisyo cakusimicisya kuti jemanja nditu mli ŵakwe kusyene, pakumpa Msimu Ŵaswela wele ŵatite tacipeleka.

¹⁴ Msimu Ŵaswela wukututendesya kuti tusimicisye kuti tucipocela yele Mlungu ŵasunjile ŵandu ŵakwe. Kaneko tuciŵa pa utendele usyesyene, myoyo Mlungu tacicimbicikwa ni kulumbidwa.

Lipopelo lya Paulo

¹⁵ Mbikene kuti mkusakulupilila Ambuje Yesu, nipo soni mkusimwanonyela ŵandu ŵa Mlungu.

¹⁶ Ni ligongo lyakwe nganguleka kumtogolela Mlungu ligongo lya jemanja. Nipo soni ngusinamkumbucilaga m'mapopelo gangu,

¹⁷ nipo ngusapopela kwa Mlungu jwa Ambuje ŵetu Yesu Klistu, Atati ŵa lumbili, kuti ampe Msimu ŵakupeleka lunda, ni ŵakum'manyisya jemanja Mlungu kusyesyene.

¹⁸ Nguŵenda kuti nganisyo syenu siwuguce kuti mlole lilanguka, kuti timyimanyilile yele yimkwenela kwembecela kwa Mlungu juŵamŵilasile, soni kuti m'manyilile kusicila kwa lumbili ni upile wele Mlungu ŵatite tacipeleka kwa ŵandu ŵakwe.

¹⁹ Nipo soni ngumsalila kuti m'manyilile ya macili gakwe gamakulungwa mnope gele gakamula masengo mwetuwe ŵakulupilila. Macili gakwe ni galagala gakulimbangana mnope,

²⁰ gaŵakamulicisye masengo Mlungu pakumjimusya Klistu ku ŵawe, ni kumtamika ku mkono wakwe wamlyo mcilambo ca kwinani.

²¹ Klistu akulamulila ayimwene wosope, ŵakulamula wosope ni acakulungwakulungwa wosope ŵakwinani. Nambo soni mena gane gosope gamacili gakamula masengo ndaŵi ajino ni ndaŵi ja msogolo.

²² Mlungu ŵampele Klistu ulamusi pa yindu yosope ni ŵamŵisile kuŵa jwamkulungwa jwa mpingo.*

²³ Mpingowo ni cilu ca Klistu, nipo jwakusakwanilisya yindu yosope kulikose.