Ŵaeblania 9 - Chiyawo Bible

Ya kulambila pa cilambo capasi ni ca kwinani

¹ Cilanga* candanda cila cakwete malamusi gakusala ya kulambila ni malo soni gakulambilila gakutaŵidwa ni ŵandu.

² Ŵandu ŵataŵile citenti, nipo mcipinda cakwe candanda mwaliji cakuŵika nyali, tebulo, ni mikate jakupelecedwa kwa Mlungu. Nipo cipinda celeci cakolanjidwaga kuti Malo Gamaswela.

³ Nipo pasyeto pa likatani lyaŵili paliji cipinda cakolanjidwa Cipinda Ceswela Mnope.

⁴ Cipindaci caliji ni malo gakupelecela mbopesi ga golidi* gakututumicisya ubani* ni Libokosi lya Cilanga lilyawunicilidwe ni golidi soni mkati mwakwe mwaliji mgawo wa golidi wele mkati mwakwe mwaliji mana, ni simbo ja Aloni* jele jijasipwice maluŵa. Mwaliji soni maganga gaŵili gigalembedwe maloŵe ga cilanga.

⁵ Pacanya pa Libokosilyo paliji pana cakulandana ni akelubi cakulosya lumbili lwa Mlungu. Mapapiko gakwe gawunicile malo gakululucila ulemwa.* Nambo yili yangakomboleka sambano jino kuyilongosola yosopeyi mwacenene.

⁶ Amu ni mwele muyaŵelaga yindu. Ŵakutaga mbopesi ŵajinjilaga mcipinda candanda cila masiku gosope kujakamula masengo gawo,

⁷ nambo mcipinda caŵili cila mwajinjilaga jwamkulungwa jwa ŵakutaga mbopesi* jika, nipo kamope pa caka. Ŵajinjilaga ali ajigele miasi kuja kujitaga mbopesi kwa Mlungu ligongo lya msyene soni ligongo lya ulemwa wa ŵandu ŵiŵatesile mwangamanyilila kuti akulemwa.

⁸ Msimu Ŵaswela akwiganya kuti litala lyakwinjilila ku Cipinda Ceswela Mnope nganiliwuguce ligongo cipinda candanda cila caciŵelape.

⁹ Yeleyi yili yakuwanicisya cabe, nipo yikulosya ndaŵi ajino. Pakuyicisya kulongosola kweleku mituka ni mbopesi sisikusapelecedwa kwa Mlungu ngaŵamkomboleka kose kuwugalawusya mtima wa jwakulambilajo kuti aŵe jwambone mtima.

¹⁰ Yikusagamba kusala ya yakulya, yakumwa, ni misyungu jakulekanganalekangana jakojela. Yosopeyo yili ya malamusi gakusala yakuwoneka ni meso basi, gaŵicidwe kuti gagambe kutama mpaka ndaŵi jitacikolosya Mlungu yosope.

¹¹ Nambo Klistu* ayice, nipo ali jwamkulungwa jwa ŵakutaga mbopesi jwa yindu yambone yele yikuwoneka sambano jino. Citenti cele ciŵatumicilagaco caliji cacikulungwa nipo soni cambone mnope. Nganicipanganyikwa ni ŵandu, ni kuti nganiciŵa capasi pano.

¹² Ndaŵi jele jiŵapelengenye Klistu citentico, ni kwinjila kamope ku Cipinda Ceswela Mnope, nganajinjila ni miasi ja tonde ni tuŵanace twamkambako twa ng'ombe kuti akapelece mbopesi, m'malo mwakwe ŵajigele miasi jakwe ni myoyo ŵatujigalile cikulupusyo cangamala.

¹³ Miasi ja acitonde ni ja ng'ombe sya mikambako, soni liwu lya mwanace jwa ng'ombe jwa mkolo ŵamisilaga ŵandu ŵele ŵali ŵangalumbana ligongo lyangasamala misyungu ja Ciyuda. Yeleyi yaswejesyaga pakwatyosya likaku lya mcilu mwawo.

¹⁴ Pakuti yeleyi yili yisyesyene, nambi yeleyi yikombolece uli ni miasi ja Klistu! Mwa Msimu wandaŵi syosope Jwalakwe ŵalipelece mpela mbopesi jangalemala kwa Mlungu. Ni kuti miasi jwakwe tijiciswejesya mitima jetu pakujitocesya masengo gangapindulisya umi, kuti tumtumicileje Mlungu jwa umi.

¹⁵ Ni ligongo lyakwe Klistu ali namangoswe jwa malangano ga sambano, kuti ŵiŵaŵilasile Mlungu, apocele upile wangamala wele Mlungujo ŵatendele cilanga. Ayi yakombolece ligongo lya ciwa ca Klistu, cele cacikusakulupusya ŵandu ku ulemwa uŵatesile ali Mcilanga candanda cila.

¹⁶ Naga mundu alembile cilanga cakwalecela ŵane cipanje, pakusosekwa kusimicisya kuti jwakulemba cilangajo awile kwene.

¹⁷ Paja cilanga cikusaŵa cangali masengo naga mkulemba ali cijumi. Cikusaŵa ca macili naga mkulembajo ali awile.

¹⁸ Ni ligongo lyakwe atamose cilanga candanda cila nganicitendekwa pangasulusya miasi.

¹⁹ Pandanda, Mose* ŵasalile ŵandu malamusi gosope, pakuya Malamusi gele giŵampele Mlungu jwalakwe. Panyuma pakwe ŵajigele miasi ja ŵanace ŵa ng'ombe ŵa mikambako ni mbusi ni ŵawanganyisye ni mesi, ni ŵamisile pa buku ja Malamusi ni pa ŵandu wosope. Ŵatesile yeleyi ni liwupulu lina lyakwe hisope,* soni ni manyunya ga ngondolo syecejewu.

²⁰ Ndaŵi jiŵatendaga yeleyi ŵatite, “Aji ni miasi jakusimicisya cilanga cele calamwile Mlungu kuti mcisunjeje.”

²¹ Mose soni ŵamisile miasi pa citenti ni pa yida yosope yakamulila masengo pa mapopelo.

²² Malinga ni Malamusi yindu yosope yikusaŵa yeswela ni miasi, nipo ulemwa ngawukusakululucikwa naga nganasulusya miasi.

Mbopesi ja Klistu jikusatyosya ulemwa

²³ Yindu yeleyo, yiyikulandana ni yindu ya kwinani yisyesyene, yikwenela kuti ayiswejesye mwalitala lyelelyo. Nambo yindu ya kwinani yikusosekwa mbopesi ja mbone mnope.

²⁴ Paja Klistu nganajinjila ku Malo Gamaswela gakutaŵidwa ni ŵandu, malo gagamba kulandanicisya Malo gasyesyene Gamaswela ga Kwinani. Jwalakwe ŵapite Kwinani kweneko, kuti akawonecele pameso pa Mlungu ligongo lyetuwe.

²⁵ Jwamkulungwa jwa ŵakutaga mbopesi wosope ŵajinjilaga Cipinda Ceswela caka cilicose ali ajigele miasi ja nyama. Nambo Klistu nganajinjila kwinani kuti akalipeleceje mbopesi kaŵilikaŵili,

²⁶ yikaŵe myoyo ni kuti akajenele kulaga ndaŵi ni katema kutandila ndaŵi jicapanganyidwe cilambo capasi. Nambo mpela muyiŵelemu, awonece kampepe basi kumbesi kwa ndaŵi jakumalisya, kuti atyosye ulemwa pakulipeleka msyene jika mbopesi.

²⁷ Mundu jwalijose akwenela kuwa kampepe basi, panyuma pakwe ni kulamulidwa ni Mlungu.

²⁸ Myoyopeyo Klistu ŵapelecedwe mbopesi kampepe basi, kuti atwicile ni kutyosya ulemwa wa ŵandu ŵajinji. Taciwoneka soni kaŵili, ngaŵa kuti taciyika kutyosya soni ulemwa wetu iyayi, nambo kuti tiŵakulupusye ŵandu ŵele ŵakumjembecela.