Ŵaeblania 8 - Chiyawo Bible

Ya Yesu jwamkulungwa jwakutaga mbopesi jwetu

¹ Yitukuŵeceta yisyesyene nayi yakuti, tukwete jwamkulungwa jwa ŵakutaga mbopesi* wosope, jwele jwakutama ku mkono wamlyo ku citengu ca ucimwene ca Mlungu ca ucimbicimbi kwinani.

² Jwalakwe akutumicila mpela Jwamkulungwa jwa ŵakutaga mbopesi wosope pa Cipinda Ceswela Mnope, ni kuti mcitenti cisyesyene cele ciŵataŵile Ambuje ngaŵa mundu iyayi.

³ Paja jwamkulungwa jwa ŵakutaga mbopesi jwalijose ŵasagulidwaga kuti apeleceje mituka ni mbopesi kwa Mlungu. Myoyo soni kwakusosekwa kuti jwamkulungwa jwa ŵakutaga mbopesi jetujo akole kandu kakuti apeleceje.

⁴ Jwalakwe akaŵe pacilambo capasi, mkanaŵa jwakutaga mbopesi kose, pakuti apali cilepe ŵakutaga mbopesi ŵele ŵiŵaliji mkupeleka mituka pakuya malamusi ga Mose.*

⁵ Masengo gakukamula mpela jwakutaga mbopesi gali mpela ciwilili cagamba kulandanicisya ya kwinani. Paja yaliji myoyo ni Mose. Katema kiŵatiga Mose kuti ataŵe citenti, Mlungu ŵamtetele jwalakwe kuti, “Mpanganyetu yosope mwakulingana ni cisyasyo cele cimwaciweni petumbi pala.”

⁶ Nambo sambano, Yesu* apocele masengo gakutaga mbopesi kupunda ŵakutaga mbopesi ŵakala ŵala, mpela cilanga* cele ciŵatesile pasikati pa Mlungu ni ŵandu ŵakwe kuti cili cambone mnope, ligongo yikuŵeceta ya cilanga ca yindu yambone.

⁷ Cilanga candanda cila cikaŵe cambone mnope mkanipasosekwa soni cine m'malo mwakwe.

⁸ Nambo Mlungu ŵajamwice ŵandu ŵakwe ligongo ŵasimene ni ulemwa* acitiji, “Masiku gakwisa, akuti Ambuje, ndaŵi jele jitinjitenda cilanga ca sambano kwa Aisalaeli ni Ayuda.

⁹ Ngasiciŵa mpela cilanga cinatesile ni acinangolo ŵawo lisiku linakamwile pa mkono ni kwakoposya mcilambo ca Iguputo. Ligongo jemanjajo nganasunga cilanga cangu cila, none soni nganinasamala jemanjajo.

¹⁰ Sambano, aci ni cilanga cicinjicitenda ni Aisalaeli m'masiku gakwisago, akuti Ambuje: Tinjiŵika malamusi gangu mu nganisyo syawo ni kugalemba m'mitima jawo. Myoyo une tinjiŵa Mlungu jwawo, ni jemanjajo taciŵa ŵandu ŵangu.

¹¹ Myoyo ngasipasosekwa soni kuti jwine jwalijose amjiganye mjakwe, kapena kuti jwine amsalile mlongo mjakwe kuti, ‘Mwamanyilile Ambuje.’ Pakuti wosope tacimanyilila une, kutandila jwamnondi mpakana jwamkulungwa.

¹² Tinjakululucila ulemwa wawo nipo soni ngasingumbucila yakulemwa yawo.”

¹³ Pakuŵeceta ya cilanga ca sambano, Mlungu akuti cilanga candanda cila cicekulwipe. Nipo cilicose cele cacicekulwipe cikusaŵa cangali masengo, soni kuti cisigele panandi kuti cikawoneka soni.