Ŵaeblania 7 - Chiyawo Bible

Ya Jwakutaga mbopesi Melikisedeki

¹ Melikisedeki jweleju jwaliji mwenye jwa ku Salemu, soni jwakutaga mbopesi jwa Mlungu Jwamaciligosope. Katema kiŵawujaga Abulahamu* kutyocela ku ngondo, kwele kuŵapundile ayimwene mcece ŵala, Melikisedeki ŵamcingamile ni ŵampele upile jwalakwejo,

² ni Abulahamu ŵamgaŵile jwalakwejo mbuwa jimo ja mbuwa likumi ja yindu yiŵakwete. Gopolela kwandanda kwa lina lya Melikisedeki niko kuti, “Mwenye jwa cilungamo,” nambo soni kuti ŵaliji mwenye jwa ku Salemu, lina lyakwe soni ligopolela kuti “Mwenye jwa Mtendele.”

³ Pangali cilicose cicalembedwe cakusala ya babagwe kapena mamagwe kapena soni ya acinangolo ŵakwe. Pangali soni papalembedwe yakwayana ni kupagwa kwakwe kapena yakuwa kwakwe. Ali mpela Mwanace jwa Mlungu, jwakwendelecela kuŵa jwakutaga mbopesi jwangali mbesi.

⁴ Mkulola sambanotu kuti mundujo jwaliji jwamkulungwa mnope. Atamose nangolo jwetu Abulahamu jula, ŵampele jwalakwejo mbuwa jimo ja mbuwa likumi ja yindu yiŵajigele kutyocela ku ngondo kula.

⁵ Malamusi ga Mose* gakuti ŵanace ŵa Alefi, ŵele ŵali ŵakutaga mbopesi, apoceleje mbuwa jimo ja mbuwa likumi kutyocela kwa Aisalaeli. Ni kuti jemanjajo akusapocela kutyocela kwa acalongo acimjawo, atamose kuti acalongo acimjawowo nombe nawo soni ali ŵanace ŵa Abulahamu.

⁶ Melikisedeki nganaŵa mlikuga lya yisukulu ya Lefi, nambope ŵapocele mbuwa jimo ja mbuwa likumi kutyocela kwa Abulahamu, nipo ŵampele upile Abulahamujo, mundu jwele juŵapocele yilanga ya Mlungu.

⁷ Jwalijose akwiticisya kuti mundu jwele jwakupeleka upile ali jwamkulungwa kupunda jwakupocela upile.

⁸ Kuŵeceta ya ŵakutaga mbopesi ŵiŵapocelaga mbuwa jimo mwa mbuwa likumi, ŵele ŵali yisukulu ya Lefi, jemanjajo ni ŵandu ŵakusawa. Nambo kuŵeceta ya Melikisedeki, malemba gakumtendela umboni kuti ali jwacijumi.

⁹ Tukombolece kuŵeceta kuti katema kiŵapelekaga Abulahamu mbuwa jimo ja mbuwa likumi, Lefi jwele juŵapocelaga mbuwa jimo ja mbuwa likumi, nombe najo jwapelece jimo ja mbuwa likumi.

¹⁰ Pakuti Lefi jwaliji mkinapagwe, nambo tukombolece kuŵeceta kuti jwaliji ali mcilu ca nangolo jwakwe Abulahamu ndaŵi jiŵapite Melikisedeki kukumcingamila Abulahamu.

¹¹ Malamusi gele gaŵapocele Aisalaeli gali gakutamilicika pa likuga lya Lefi ŵakutaga mbopesi. Sambano yikaŵe yakomboleka ŵaswela mnope mu ŵakutaga mbopesi welewo, mkanipasosekwa soni ŵakutaga mbopesi ŵane, mpela jwakutaga mbopesi Melikisedeki, ŵakulekangana ni wa Aloni.*

¹² Naga pana kucenga pa ŵakutaga mbopesi, ni kuti soni Malamusi nombe nago gakwenela kucenga.

¹³ Ambuje ŵetu, ŵele maloŵega gakusala ya ŵelewo, ali ŵa lukosyo lwine. Soni pangali atamose jumo jwa lukosyo lwelelu juŵatumicile pa malo gakupelecela mbopesi.

¹⁴ Pakuti yamanyice kuti Ambuje ŵetu ŵaliji ŵa lukosyo lwa Yuda, nipo Mose nganakolanga kose ya lukosyo lwelelu pele piŵaliji mkuŵeceta ya ŵakutaga mbopesi.

Ya jwakutaga mbopesi mpela Melikisedeki

¹⁵ Nganiji jikupikanika cenene mnope maka payice jwakutaga mbopesi jwine mpela Melikisedeki.

¹⁶ Jwalakwe ngaŵa jwakutaga mbopesi ligongo lya malamusi gakwaya yisukulu ya ŵandu, nambo ligongo lya macili ga umi ŵakwe wawuli wangamala.

¹⁷ Paja Malemba gakuti, “M'mwejo mli jwakutaga mbopesi jwangali pambesi, mpela jwakutaga mbopesi Melikisedeki.”

¹⁸ Myoyo lilamusi lyakala lilecekwe ligongo lyaliji lyangali macili ni lyangakamucisya.

¹⁹ Paja Malamusi ga Mose nganigakombola kutenda yindu kuŵa yambone. Nipo sambano m'malo mwakwe twapocele cembeceyo cele cacikutuŵandikanya ni Mlungu.

²⁰ Cine soni ni cakuti Mlungu ŵalumbile. Paliji pangali kulumbila* kwamti myoyo kala ndaŵi jiŵajigalaga ŵandu udindo wakutaga mbopesi.

²¹ Nambo Yesu* ŵaliji ŵakutaga mbopesi pakulumbila katema kiŵamsalile Mlungu kuti, “Ambuje ŵalumbile, nipo ngasacenga nganisyo syawo, ‘m'mwejo mli jwakutaga mbopesi ŵangali mbesi.’ ”

²² Kulekangana kweleku kukutulosya kuti Yesu ni namangoswe jakusimicisya cilanga* cangamala.

²³ Kulekangana kwine ni kwakuti ŵakutaga mbopesi ŵakala ŵala ŵaliji ŵajinji, ligongo ŵaliji mkuwa ni kulepela kupitilisya kamula masengo gawo.

²⁴ Nambo Yesu jwangali mbesi, myoyo masengo gakwe gakutaga mbopesi gali gangali mbesi.

²⁵ Ni ligongo lyakwe ndaŵi syosope akukombola kwakulupusya ŵandu ŵele ŵakuŵandicila kwa Mlungu kupitila mwa Jwalakwe, pakuti Jwalakwejo akwete umi ndaŵi syosope kuti ŵapopeleleje jemanjajo kwa Mlungu.

²⁶ Yesu ali jwamkulungwa jwa ŵakutaga mbopesi* wosope jwele jwakukwanilisya yakusoŵa yetu. Ali jwamswela mtima, jwangali cileŵi kapena ulemwa* uliwose, jwakulekangana ni ŵandu ŵakulemwa, nipo soni Yesu ali jwakupedwa ucimbicimbi kupunda ya kwinani yosope.

²⁷ Jwalakweju nganaŵa mpela acakulungwa ŵane ŵakutaga mbopesi ŵala, jwalakwe ngakwenela kutaga mbopesi lisiku ni lisiku kwa ulemwa wa msyenepejo kaneko ni kwa ulemwa wa ŵandu. Jwalakwe ŵatasile mbopesi kamope kwa ŵandu wosope, pakulipeleka jika mpela mbopesi.

²⁸ Malingana ni malamusi ga Mose ŵandu ŵiŵaliji atamose ŵakulepetala ŵasagulidwaga kuŵa acakulungwa ŵa ŵakutaga mbopesi wosope. Nambo cilanga ca Mlungu catamilicice ni kulumbilila, cele cayice panyuma pa malamusigo, gele gigamŵisile Mwanagwe, jwele juŵaliji jwangali ulemwa yaka yosope kuti aŵe jwamkulungwa jwa ŵa ŵakutaga mbopesi wosope.