Ŵaeblania 6 - Chiyawo Bible

¹ Kwende tujawule pasogolo sambano, ku majiganyo gamakomangale ni kuleka majiganyo gandanda gala ga ciklistu. Tukawilisya soni kwiganya yele yayili mpela yilimbilimbi, mpela yakupitikuka mtima ni kuleka masengo gangalumbana ni kulupilila Mlungu,

² ni ya majiganyo ga ubatiso, ya kusajika magasa, ya kwimuka ku ŵawe, ni ya kulamulwa kwa kumalisya.

³ Naga Mlungu akukunda, tucitenda myoyo.

⁴ Ŵandu ŵele ŵiŵalesile kulupilila, kuli kwakusawusya kuti apitikuce soni. Jemanjaji kala Mlungu ŵapele lilanguka, soni ŵapasisye mtuka wakutyocela kwinani ni kupocela soni Msimu Ŵaswela,

⁵ nipo ŵamanyilile umbone wa maloŵe ga Mlungu, ni macili ga ndaŵi jikwisajo.

⁶ Nipo ŵajasile cikulupi cawo, soni yili yakusawusya kuti kwawusya jemanjajo kuti apitikuce mitima jawo, ligongo soni akumkomela Mwanace jwa Mlungu pa msalaba ni kumtesya soni pakulanguka.

⁷ Pakuti litaka likusamwa mesi ga ula kaŵilikaŵili, ni kusogosya yisogosi yakwenela jwalimile, Mlungu akusalipa upile.

⁸ Nambo naga likusogosya miŵa ni likonde, ni kuti lyangalumbana nipo lili mkuŵandicila kuti Mlungu alilwese, ni kulijonanga pakulijoca ni moto.

⁹ Nambo atamose tuŵecete yeleyi, acalongo acimjangu, uwe tukumkulupilila jemanja kusyene. Tukumanyilila kuti jemanja mkwete yindu yambone yele yikwendelana ni cikulupusyo cenu.

¹⁰ Mlungu ali jwakulungama. Ngasaliŵalila masengo genu gimwatesile kapena cinonyelo cimwalosisye ku lina lyakwe ni cikamucisyo cimwapelece nipo soni mkupitilisya kwa acalongo acimjenu aklistu.

¹¹ Tukusaka mnope kuti jwalijose jwa jemanja apitilisye kulosya cangu celeci mpaka pambesi, kuti yindu yele yimkwembecela tiyiciŵa yakuwona.

¹² Ngatukusaka kuti jemanja mŵe ŵaulesi, nambo kuti mŵe mpela ŵandu ŵakulupilila ni ŵakupimilila, kuti timpocele yele Mlungu ŵatite tacipeleka.

Ya cilanga ca Mlungu cakutamilicika

¹³ Ndaŵi jiŵatesile Mlungu cilanga* ni Abulahamu,* ŵalumbile kuti tacitenda yele yiŵaŵisile pa cilanga cakwe. Pakuti paliji pangali jwine jwamkulungwa jwakupunda msyene pejo, ni ligongo lyakwe ŵalikolasile lina lyakwe piŵalumbilagapo.

¹⁴ Mlungu ŵatite kuti, “Ngutenda cilanga kuti tinjimpa upile ni kuculuya yisukulu yenu.”

¹⁵ Myoyo Abulahamu ŵajembecele mwakupimilila, mpaka ŵapocele yiŵayisacile Mlungu kumpa pakutenda cilanga cila.

¹⁶ Naga ŵandu akusaka kumasya ukangani, akusalumbila pakolanga lina lya jwamkulungwa kupunda lyawo acimsyenewo.

¹⁷ Mlungu pakusaka kwasimicisya ŵandu ŵitacipocela yele yiŵaŵecete pakutenda cilanga cila, kuti Jwalakwe ngaŵa mkucenga nganisyo, myoyo ŵasimicisye cilanga cakweco pakulumbila.

¹⁸ Myoyo yipali yindu yiŵili, cilanga ni kulumbila,* yele yangaŵa mkomboleka kuyigalawusya, nipo Mlungu ngaŵa mkulambusya. Mwa yeleyi Mlungu ŵasacile kutulimbikasya mtima uwe ŵatwatilile kwa jwalakwe, kuti tukamulisye cembeceyo cele ciŵatuŵicile pameso petu.

¹⁹ Cembeceyo celeci tukamulile mpela nangula jwa umi wetu. Cili cakutamilicika, cangatenganyika kose, nipo cikusapelenganya likatani lya Nyumba ja AMBUJE ja Kwinani, ni kwinjila mpaka ku Malo Gapajika mkati.

²⁰ Yesu* ŵatulongolele kala ni kwinjila ligongo lya uwe. Jwalakwe jwaliji jwamkulungwa jwa ŵakutaga mbopesi mpaka kalakala, mpela Melikisedeki.