Ŵaeblania 5 - Chiyawo Bible

¹ Jwamkulungwa jwa ŵakutaga mbopesi* jwalijose ŵasagulidwaga pasikati pa ŵandu, ni kumŵika kuti ŵajimilileje ŵandu pameso pa Mlungu, kuti apeleceje mituka ni mbopesi ligongo lya ulemwa.*

² Pakuti jwamkulungwa jwa ŵakutaga mbopesi msyene akwete yakulepetala yejinji, ni kuti mpaka akombole kwatendela canasa ŵele ŵakulemwa ligongo lyangamanyilila ni kusokonesya.

³ Pakuti ali jwakulepetala msyene, akwenela kupeleka mbopesi ligongo lya ulemwa wakwe ni soni ulemwa wa ŵandu ŵane.

⁴ Pangali mundu jwakulijigalila jika ucimbicimbi wakuŵa jwamkulungwa jwa ŵakutaga mbopesi, nambo akusatenda kuŵilanjidwa ni Mlungu, mpela muŵatendele Aloni* pakuŵilanjidwa.

⁵ Myoyo soni Klistu* nganalijigalila jika ucimbicimbi wakuŵa jwamkulungwa jwa ŵakutaga mbopesi. M'malo mwakwe Mlungu ŵatite kwa Jwalakwe, “M'mwejo ni Mwanangu, lelo jino mbele Baba gwenu.”

⁶ Pa malo gane Mlungu ŵatite kuti, “M'mwejo timciŵa jwakutaga mbopesi jwa yaka yangali pambesi, mpela muŵaŵelele Melikisedeki.”

⁷ Pa ndaŵi jiŵaliji pa cilambo capasi cino, Yesu* ŵaŵendile ni kupopela mwakugumila ni kulila misosi kwa Mlungu jwele juŵajenele kumkulupusya ku ciwa. Pakuti Yesu ŵaliji ŵakulinandiya ni kulipeleka, Mlungu ŵagapikene mapopelo gakwe.

⁸ Atamose Yesu, ŵaliji Mwanace jwa Mlungu, ŵalijiganyisye kupikanila kutyocela muyipwetesi yakwe.

⁹ Piŵatendekwe kuŵa ŵambone mnope, Yesu ŵatendekwe ndandililo ja cikulupusyo cangamala kwa ŵandu wosope ŵakumpikanila jwalakwe,

¹⁰ nipo Mlungu ŵamtesile kuŵa Jwamkulungwa jwa ŵakutaga mbopesi wosope, mpela muŵaŵelele Melikisedeki.

Ŵatetele kuti akusajasa cikulupi cawo

¹¹ Yipali yejinji yakuti tuŵecete pa yeleyi, nambo yili yakusawusya kumsalila kwakwe jemanja, pakuti mli ŵakupikana panandipanandi.

¹² Japali ndaŵi jakuti mkajenele kuŵa ŵakwiganya, nambope kuli kwakusosekwa kuti ŵane amjiganye soni majiganyo gandanda gene ga maloŵe ga Mlungu. Mkwenela soni kumwa mkaka m'malo mwakumpa cakulya cakulimba.

¹³ Mundu jwalijose jwagamba kumwa mkaka ali ciŵela likandi, soni ngaŵa mkomboleka kwiganya cijiganyo cakusala kuti ayi ni yambone kapena yangalumbana.

¹⁴ Nambo yakulya yakulimba ni ya ŵandu ŵakomangale. Pakupitila mkulijiganya kwawo akumanyilila kulekanganya yindu yambone ni yangalumbana.