Ŵaeblania 4 - Chiyawo Bible

¹ Cilanga* ca Mlungu ni cakuti tukajinjile mcipumulisi cakwe cele ciŵatulinganyicisye cilepe. Sambano kwende tukalamuce kuti pakasimanikwa jwine jwalijose jwa jemanja kuti alepele kwinjila mcipumulisimo.

² Paja nowe ŵakwe twapikene Ngani Syambone,* mpela jemanja ŵala. Nambo jemanjajo nganigakamucisya kose maloŵe gaŵapikenego ligongo ŵagambile kugapikana, ni ngagakulupilila.

³ Uwe ŵatukulupilila, tucipocela cipumulisi ciŵatesile cilanga Mlungu ni uwe. Paja Mlungu ŵaŵecete kuti, “Nalumbile ndili citumbilile kuti, ‘Ngasajinjila jemanjajo mcilambo cele cinatiga nape kuti akapumulileje.’ ” Ŵaŵecete yeleyi atamose ŵaliji ali amalisisye masengo gakwe gosope gakupanganya cilambo capasi.

⁴ Pane pakwe m'Malemba taŵalanje ya lisiku lya msano ni gaŵili kuti, “Mlungu ŵapumwile kamula masengo gakwe gosope pa lisiku lya msano ni gaŵili.”

⁵ Sambano akuŵeceta soni iyoyopeyo kuti, “Ngasajinjila mcilamboco cinatiga nape kuti akapumuleje.”

⁶ Ŵandu ŵiŵapikene Ngani Syambone pandandawo nganajinjila mcipumulisi, ligongo nganakulupilila. Nambo pana ŵane ŵiŵakundile kwinjila mcipumulisimo.

⁷ Ni ligongo lyakwe Mlungu ŵaŵisile lisiku line, lyakolanjidwa kuti “Lelo.” Payapite yaka yejinji Mlungu ŵaŵecete kupitila mwa Daudi* pakuŵeceta maloŵe gatusasile pandanda gala kuti, “Naga mkugapikana maloŵe ga Mlungu lelo jino, mkasilimbisya mitima jenu.”

⁸ Yoswa akaŵe kuti ŵajinjisye ŵanduwo mcipumulisi ciŵacisasile Mlungu cila, Mlungu mkinaŵeceta soni ya lisiku line.

⁹ Ni ligongo lyakwe sambano kupumula kweleku pa lisiku lya msano ni gaŵili kusigalile ni ŵandu ŵa Mlungu.

¹⁰ Paja ŵandu ŵiŵajinjile mcipumulisi cele ciŵaŵecete Mlungu, nombe nawo tacileka kamula masengo gawo ni kupumula, mpela muŵapumulile msyene Mlungu ku masengo gakwe.

¹¹ Kwende sambano tulinjilile kwinjila mcipumulisimu, kogopa kuti jwine jwa uwe akusaŵa ŵangapikana mpela jemanja ŵala, ni kulepela kwinjila mu cipumulisimo.

¹² Paja maloŵe ga Mlungu gali ga umi soni gakusakamula masengo mwamacili, gali gakutema mpela upanga wakutema kosekose. Gakusapowola mpaka mwakulumbikanila umi ni msimu, ni soni mwakulumbikanila mbindi ni mawuta ga mawupa. Gakusajamuka atamose yele ŵandu akuganisya ni yakusayisakaga m'mitima jawo.

¹³ Pangali cakusisika pameso pa Mlungu, soni akusaciwona cilicose pakupanganyidwa. Myoyo tukwenela kumsalila yosope yele yitutesile.

Yesu ni Jwamkulungwa jwa ŵakutaga mbopesi jwamacili

¹⁴ Kwende sambano, tukamulisye cikulupi cele citwacijiticisye. Pakuti tuli najo jwamkulungwa jwa ŵakutaga mbopesi* jwamacili, jwele juŵapite mpaka kuja kwika kwinani kusyesyene kwa Mlungu. Jwalakweju ni Yesu, Mwanace jwa Mlungu.

¹⁵ Pakuti tukwete jwamkulungwa jwa ŵakutaga mbopesi jwele jwakusatutendela canasa ligongo lya kulepetala kwetu. Nambo Jwamkulungwa jwakutaga mbopesi jwetu jwalinjidwe muyosope mpela mwele uwe tukusalinjidwa, nambo Jwalakwe nganalemwa kose.

¹⁶ Kwende sambano, tuŵandicile mwangali woga ku citengu ca ucimwene ca Mlungu jwambone mtima. Kweleko tukapocele canasa, nipo mwa umbone mtima wa Mlungu tutukacisimane cikamucisyo pa ndaŵi jitukucisosa.