Ŵaeblania 3 - Chiyawo Bible

Yesu ali jwamkulungwa kupunda Mose

¹ Acalongo acimjangu, ŵamli ŵaswela mtima ni kuŵilanjidwa ni Mlungu. Mganicisye cenene ya Yesu,* juŵamtumisye Mlungu kuŵa jwamkulungwa jwa ŵakutaga mbopesi* jwa cikulupi cele citukweteci.

² Pakuŵa Jwalakwe ŵaliji jwakulupicika kwa Mlungu, ŵele ŵiŵamsagwile Jwalakwe kuti agatende masengo gelega, mpela muŵaŵelele Mose* kuŵa ŵakulupicika ni masengo gakwe m'nyumba ja Mlungu.

³ Mundu jwataŵile nyumba akusapocela ucimbicimbi wekulungwa kupunda nyumba jisyenejo. Myoyopeyo Yesu akwenela kupocela lumbili lwakumpunda Mose.

⁴ Nyumba jilijose jikusataŵidwa ni mundu jwamtijwamti, nambo ŵiŵapanganyisye yosope ni Mlungu.

⁵ Mose ŵaliji ŵakulupicika m'nyumba ja Mlungu mpela jwamasengo, kuti atendele umboni yindu yitaciŵeceta Mlungu pasogolo pakwe.

⁶ Nambo Klistu* ali jwakulupicika mpela mwanace jwakulamulila m'nyumba ja Mlungu. Nyumbajo tuli uweji, naga tukupitilisya kulimba mtima ni kulupilila yele yitukwembecela pasogolo pano.

Ya kupumula kwa ŵandu ŵa Mlungu

⁷ Ni ligongo lyakwe sambano jino, Msimu Ŵaswela akuti, “Patimpikane maloŵe ga Mlungu lelo jino,

⁸ mkasimlimbisya mitima jenu, mpela muŵatendele acinangolo ŵenu pa kumjimucila Mlungu, mpela muŵatendele lyele lisikulyo mcipululu katema kiŵamlingaga Jwalakwejo.

⁹ Mlungu akuti, pelepo acinangolo ŵenu ŵandandite pakulinga Une, ni ŵayiweni yindu yinatesile kwa yaka makumi mcece.

¹⁰ Myoyo natumbilile ŵandu ŵelewo ni natite, ‘Ndaŵi syosope akusaŵa ŵakunyosya m'mitima mwawo, soni akwikana kuyipikanila yingwalamula.’

¹¹ Myoyo citumbilile natesile cilanga* kuti, ‘Ngasajinjila mcilambo cele cinatiga nape jemanjajo kuti akapumulileje.’ ”

¹² Acalongo acimjangu, mkalamuce kuti pakapagwa jwine jwalijose jwa jemanja jwa mtima wakusakala ni wangakulupilila wakulekanganya ni Mlungu jwa umi.

¹³ Nambo camnopemnope mlimbisyaneje mtima jwine ni mjakwe lisiku lililyose kuti jwine jwa jemanja akusajigalwa ni ulemwa* ni kuŵa jwangapikanila Mlungu, mpela mugakuŵecetela maloŵe ga Mlungu kuti “Lelo” myoyo soni malemba gakutusalila uwe.

¹⁴ Pakuŵa uwe tutendekwe kuŵa ŵakwe ŵa Klistu, naga tukukamulisya mnope mpaka pambesi kulimba mtima kwele kutwakwete pandanda kula.

¹⁵ Paja Malemba gakuti, “Patimpikane maloŵe ga Mlungu, kasimlimbisya mitima jenu mpela muŵatendele acinangolo ŵenu pakumjimucila Mlungu.”

¹⁶ Ana ŵandu ŵapi ŵiŵapikene maloŵe ga Mlungu ni kumjimucila? Ŵandu ŵakwe ni ŵele Mose ŵalongolele ni kwakoposya mcilambo ca Iguputo.

¹⁷ Nambi ŵani ŵele Mlungu ŵiŵatumbilile kwa yaka makumi mcece? Ŵandu ŵakwe ni ŵele ŵiŵalemwisye ŵala, mitembo jawo jijasigalile mcipululu mula.

¹⁸ Ana Mlungu ŵaŵecetaga ya ŵani katema kiŵatite kuti, “Ngulumbila kuti jemanjaji ngasajinjila mcilambo cele cinatiga nape kuti akapumulileje?” Paja ŵaŵecetaga ya ŵandu ŵele ŵiŵamjimucile ŵala.

¹⁹ Myoyo tukuyiwona kuti ŵanduwo ŵalepele kwinjila ligongo lya kungakulupicika kwawo.