Ŵaeblania 2 - Chiyawo Bible

Cikulupusyo cekulungwa

¹ Pa ligongo lyeleli tuyikamulisye mnope yele yitwapikene, kogopela kuti tutakujigalwa.

² Maloŵe gele gapelecedwe kwa acinangolo ŵetu ni malayika* gagali gasyesyene, nipo kuti jwalijose jwanganagapikanila kapena kuganyosya, ŵapocele cilango mwakulingana ni kulemwa kwakwe.

³ Nambi uwe tucikulupuka uli naga ngatukusamala cikulupusyo cacikulungwa camti myiyi? Ambuje asyesyene ni ŵaŵatandite kuŵeceta ya cikulupusyoci, nipo ŵele ŵiŵapikene maloŵe gawo, ŵatusimicisye kuti galiji gasyesyene.

⁴ Mlungu msyene jwatendelaga umboni pakuyitenda yimanyisyo yakusimonjesya, ni masengo gamacili gamitundu mitundu, nipo soni pakwagaŵila mituka ja Msimu Ŵaswela malingana ni lisosa lyawo asyene.

Ya jwakulongolela jwa cikulupusyo

⁵ Mlungu nganagapa malayika ulamusi wa cilambo cele cacikwisaco, cilambo cele citukucisalaci.

⁶ Nambo jwine ŵaŵecete pane pakwe m'Malemba kuti, “Ŵalakwe Mlungu, ana ŵandu ali ŵani, kwamti ŵakumbucileje, Mwanace jwa Mundu* ni cici, kuti mpaka amsamalileje?

⁷ Kwa kandaŵi panandi mwamtesile kuŵa jwamnondi mnope kwa malayika. Mwampele lumbili ni ucimbicimbi wa ucimwene,

⁸ ni mwampele ulamusi wa yindu yosope.” Sambano naga Mlungu ŵampele mundu ulamusi pa yindu yosope, pangali kandu kele kanganikaŵa mu ulamusi wakwewo. Nambope muyiŵelele yindu sambano ngatukuyiwona kuti yosope yili mu ulamusi wakwewo.

⁹ Nambotu tukulola kuti Yesu,* jwele pa kandaŵi panandi ŵatendekwe kuŵa jwamnondi kwa malayika, jwapocele mbote ja lumbili ni ucimbicimbi ligongo ŵasimene yipwetesi ya ciwa. Yatendekwe yeleyi ligongo lya umbone mtima wakwe Mlungu ŵasacile kuti awile ŵandu wosope.

¹⁰ Paja Mlungu ni jwele juŵapanganyisye yosope soni yosope yikwegamila Jwalakwe, ŵasacile kuti agaŵane nawo ŵanace ŵakwe ŵajinji lumbili lwakwe. Kwajenele kuti mwalitala lya yisawusyo, kuti Yesu ŵalongolele jemanjajo ku cikulupusyo.

¹¹ Jwalakwe akusiŵaswejesya ŵandu ku yakulemwa yawo, nipo ŵandu ŵele ŵaswejesyedwewo yalumo ni jwakwaswejesyajo, wosopewo Atati wawo ali ŵamope. Ni ligongo lyakwe Yesu ngakusatenda soni kwakolanga jemanjajo kuti acalongo acimjakwe.

¹² Jwalakwe ŵatite kwa Mlungu kuti, “Tinjasalila acalongo acimjangu yatesile Ŵalakwe, tinjalumba Ŵalakwe pasikati pa mpingo* wawo.”

¹³ Akuŵeceta soni kuti, “Tinjiŵika cikulupi cangu mwa Mlungu.” Soni taciŵeceta kuti, “Une ndili apano pampepe ni ŵanace ŵiŵambele Mlungu.”

¹⁴ Sambano pakuti ŵanacewo ali ŵandu, ŵakwete miasi ni mnowu, Yesu msyene ŵatendekwe kuŵa mundu mpela jemanjajo. Jwalakweju ŵatesile yeleyi kuti ni ciwa amjonanje Satana,* jwele jwakwete macili ga ciwa,

¹⁵ pakutenda yeleyi ŵagopwele ŵaŵaliji mpela acikapolo cipagwile umi wawo wosope ligongo lya kogopa ciwa.

¹⁶ Paja yamanyicile cile kuti nganagakamucisya malayika. Nambo m'malo mwakwe akwikamucisya yisukulu ya Abulahamu.*

¹⁷ Ni ligongo lyakwe ŵajenele kulandana ni acalongo acimjakwe mu yosope, kuti aŵe jwamkulungwa jwa ŵakutaga mbopesi* wosope jwa canasa ni jwakulupicika pakutumicila Mlungu, kuti pakutenda myoyo awutyosye ulemwa* wa ŵandu.

¹⁸ Pakuti sambano Jwalakwe msyene ŵalasile ni kulinjikwa ni yipwetesi, ni kuti tapakombole kwakamucisya ŵandu ŵakulinjikwa.