Ŵaeblania 13 - Chiyawo Bible

Tumsangalasye uli Mlungu

¹ Mpitilisye kunonyelana jwine ni mjakwe mpela aklistu.

² Mkasimliŵalila kwapocela ŵandu ŵa cilendo cenene m'nyumba syenu. Ŵapali ŵane ŵele ŵiŵatesile yeleyi nipo pakutenda yeleyi ŵagapocele malayika* mwangamanyilila.

³ Mwakumbucileje ŵele ŵali mu ukayidi, nipo mŵe mpela kuti mkulaga nawo yalumo mu ukayidimo. Mwakumbucileje ŵele ŵakulaga, nipo mŵeje mpela mkulaga nawo yalumo.

⁴ Ulombela mwucimbicisyeje jemanja wosope, nipo acalume ni acakongwe aŵeje ŵakulupicika kwa jwine ni mjakwe, pakuti ŵandu ŵalilama ni cikululu Mlungu tacalamula.

⁵ Mtima wenu ukaŵaga pa mbiya, nipo yele yimkweteyo, mjikutileje nayo. Pakuti Mlungu ŵatite, “Ngasinamleka kapena kumjasa kose.”

⁶ Kwende sambano tulimbe mtima ni kuŵeceta kuti, “Ambuje ni ŵakungamucisya ŵangu, ngasindenda woga. Ana mundu mpaka andendele une cici?”

⁷ Mwakumbucileje ŵakulamulila ŵenu ŵele ŵiŵamlalicilaga maloŵe ga Mlungu. Mganicisyeje ya umi wawo ni mwele muŵawilile, ni sambano mcisyasye cikulupi cawo.

⁸ Yesu* Klistu* ali jujojo liso, lelo ni ku ndaŵi jangali pambesi.

⁹ Kasimkunda kuti yakwiganya ya cilendo yimsokonesye jemanja. Cakwenela kutulimbisya mtima ni umbone mtima wa Mlungu, ngaŵaga pakugajogopa malamusi gagakusala ya yakulya iyayi; nipo ŵandu ŵiŵajogopaga malamusi gelega nganigakamucisya kose.

¹⁰ Ŵakutaga mbopesi ŵele ŵiŵatumicilaga malo gakupopelela ga Ayuda nganakola upile wakulya yele yiyapelecedwaga pelepo.

¹¹ Jwamkulungwa jwa ŵakutaga mbopesi* jwa Ayuda jwajinjilaga ni miasi ja nyama ku Cipinda Ceswela Mnope kukupeleka mbopesi ligongo lya ulemwa.* Nambo nyama jisyesyenejo ŵajijocaga kusa kwa malo giŵatamagago.

¹² Kwa ligongo lyeleli, Yesu nombe najo ŵawilile kusa kwa msinda, kuti pakutenda myoyo aswejesye ŵandu ni miasi jakwe.

¹³ Kwende sambano tujawule kwa Jwalakwe kusa kwa malo giŵatamagago kuti tukajigale najo mcesela pampepe.

¹⁴ Pakuti pangali msinda wakutamilicika wetuwetupe pa cilambo capasi cino, nambo tukuwusosa wine wawulimkwisawo.

¹⁵ Kwende ndaŵi syosope tumlumbeje Mlungu mwangalecesya mpela kupeleka mbopesi kupitila mwa Yesu, nipo kuti tukupeleka maloŵe getu mpela mbopesi jakwiticisya lina lyakwe.

¹⁶ Kasimliŵalila kutendelana yambone ni kamucisyana jwine ni mjakwe, ligongo mbopesi syamti myiyi sikusasangalasya Mlungu.

¹⁷ Mwapikanileje ŵakumlamula ŵenu ni kutenda yakumlamula. Jemanjajo ŵangapumulila kose kulolela umi wenu, pakuti akwenela kusala ya masengo gawo pameso pa Mlungu. Naga mkwapikanila, jemanjajo, tacikamula masengo mwakusangalala, ngaŵa mwakutumbila, ligongo naga ngatenda yeleyo ni kuti jemanja ngasiyimkamucisya kose.

¹⁸ Mkaleka kutupopelela uwe. Pakuti tukwete mtima wangali kandu kakuwusisya, nipo tusimicisye kutenda yosope mwacilungamo.

¹⁹ Ngumŵenda camnopemnope mpopele kuti Mlungu ambucisye kwa jemanja mwacitemape.

Lipopelo lya mbesi

²⁰ Mlungu ŵajimwisye Ambuje ŵetu Yesu ku ŵawe, jwele jwali Jwamkulungwa Jwakucinga ngondolo, ligongo lya ciwa cakusimicisya cilanga* cangali pambesi.

²¹ Mlungujo ampe yambone yosope yimkuyisoŵa jemanja kuti mtendeje yele yakuyisaka Jwalakwe. Nipo mwa Yesu Klistu ayitende mwetuwe yele yikumsangalasya, Klistujo aŵe ni ucimbicimbi ŵangali pambesi. Ami.*

Maloŵe gambesi

²² Ngumŵenda jemanja acalongo acimjangu, kuti mgapikanile cenene maloŵe gakulimbikasya mtimaga, pakuti ngambile kulemba mwakata.

²³ Ngusaka kumsalila kuti mjetu, Timoteo amkoposye mu ukayidi. Naga akwisa mwacitema tinjiyika najo kumangwenuko ndaŵi jitinjiyikaga kukumlola.

²⁴ Mtupelecele moni kwa ŵakulamula ŵenu wosope ni kwa ŵandu wosope ŵa Mlungu. Acalongo acimjetu ŵa ku Itale akuti soni moni.

²⁵ Umbone mtima wa Mlungu uŵe ni jemanja wosope.