Ŵaeblania 12 - Chiyawo Bible

Mlungu Atati ŵetu

¹ Pakuŵapo tusyungulilwe ni mboni syejinji myiyi, kwende tutyosye kalikose kampaka katucelewasye, mnopemnope ulemwa* wele wawutukanilile, nipo tuwutuce mwalung'wanu mpikisano wele watuwutanditewu.

² Kwende meso getu gaŵe pa Yesu,* jwele jwali jwakutandisya cikulupi cetu, nipo soni jwakulongolela ni kuciyicisya cikulupi cetu pambesi. Ligongo lya cisangalalo cele cicaliji mkumlindilila, Jwalakwejo ŵapimilile yipwetesi ya pa msalaba. Nganasamala kose kutenda soni ni ciwa camti myoyo, nipo sambano akutama ku mkono wamlyo ku citengu ca Ucimwene wa Mlungu.*

³ Mganicisyeje ya Jwalakwe jwele juŵapimilile uŵengani wawukulungwa wamti myoyo, wele wawatyocele kwa ŵandu ŵakulemwa, kuti mkatenguka ni kwasa mtima.

⁴ Pakulimbana ni ulemwa, nganimpayice pampakana msulusye miasi.

⁵ Ana mliŵalile maloŵe gakulimbikasya mtima gala, gaŵaŵecetaga Mlungu ni jemanja mpela ŵanace ŵakwe? Acitiji, “Mwanangu, kasimnyosya camuko ca Ambuje, soni kasimjasa mtima ndaŵi jakumjamuka.

⁶ Ligongo Ambuje akusamjamuka jwalijose jwakusamnonyela, ni kumpa cilango jwalijose jwakumpocela mpela mwanagwawo.”

⁷ Mpimilile yisawusyo kuti mlijiganye ndamo syambone. Mlungu akusamjigala mpela ŵanace ŵakwe myakutenda yakwe yosope. Ana kalakose ŵapali mwanace jwele babagwe nganampeje cilango?

⁸ Naga nganimpoceleje cilango mpela mwakusatendela ŵanace ŵakwe wosope, ni kuti jemanja nganimŵa ŵanace ŵakwe asyesyene, nambo ŵanace ŵamwitinji.

⁹ Acibaba ŵetu ŵapasi pano ŵatupaga cilango, nipo twacimbicisyagape. Kwa mnopemnope sambano tukajenele kulipeleka kwa Atati ŵetu mu usimu kuti tuŵe ni umi.

¹⁰ Acibaba ŵetu ŵapasi pano ŵatupaga cilango kwa ndaŵi japanandi, mpela muŵayiwonelaga kusosekwa kwakwe. Nambo Mlungu akusatupa cilango kuti tupindule, soni kuti tugaŵane uswela mtima ŵakwe.

¹¹ Ndaŵi jele jitukupocela cilango, kwetuwe cilangoco cikusawoneka mpela cindu cakutesya canasa soni cangasangalasya. Nambo kaneko ŵandu ŵiŵakusile mwa litala lyeleli, panyuma pakwe ŵapatile mtendele wawuli cisogosi ca umi wakulungama.

¹² Limbisyani makono genu gamapelego ni soni malungo genu gakulepetalago.

¹³ Mjendeje m'matala gakongoka, kuti ngongolo syelemale sikagwedemuka, nambo kuti sipole.

¹⁴ Mlinjilileje kutama ni mtendele ni ŵandu wosope, ni kuŵa ŵaswela mtima, pakuti pangali atamose jumo jutacawona Ambuje, naga ali jwangaswejela mtima.

¹⁵ Mlolecesye kuti jwine jwalijose akasawujila munyuma ni kwasa umbone mtima wa Mlungu. Mlolecesye kuti jwine jwalijose akasaŵa mpela mciga wakuŵaŵa wawukusasipuka ni kwalagasya ŵandu ni ululu wakwe.

¹⁶ Mlolecesye kuti jwine jwalijose akasaŵa jwalilama, kapena jwakunyosya ya usimu, mpela Esawu, jwele juŵasumisye ukulungwa wakwe ni cakulya candaŵi jimope basi.

¹⁷ Paja mkumanyilila kuti, panyuma pakwe ŵasacile kupocela upile wa babagwe, nambo yalepelece, ligongo nganakombola kupitikusya yiŵatesile, atamose kuti ŵawusosaga ukulungwa wakwewo misosi jili mbwee ni kulila.

¹⁸ Jemanja nganimyika, mpela muŵatendele Aisalaeli ŵala, ŵele ŵiŵayice ku cindu cele ciŵacikombolaga kucikwaya, ni kuti Kwitumbi lya Sinayi, lyele lilyaliji mkolela moto, lyacipi ca bii ni mbungo jamacili,

¹⁹ ni lisegwe lya lipenga, nipo soni kupikanika kwa maloŵe. Piŵapikene ŵandu maloŵego, ŵaŵendile kuti akagapikana soni maloŵe gane,

²⁰ ligongo nganajiticisya lilamusi lila lyakuti, “Atamose cinyama cose naga cigamba kwaya litumbilyo, ciwulajidwe ni maganga.”

²¹ Kuwoneka kwakwe kwa yosopeyo kwaliji kwakogoya mnope, mwakuti Mose* ŵene ŵatite, “Ngutetemela ni woga.”

²² Nambo jemanja myice Kwitumbi lya Siyoni* ni msinda wa Mlungu jwacijumi, ku Yelusalemu jwakwinani, mwele mugali malayika* gangaŵalanjika.

²³ Myice ku cisangalalo kwele kwasongene ŵanace ŵandanda kupagwa ŵa Mlungu, ŵagalembedwe mena gawo kwinani. Myice kwa Mlungu, jwakulamula jwa ŵandu wosope, nipo soni kwa misimu ja ŵandu ŵakulungama ŵaŵatesile Mlungu kuŵa ŵaswela kusyesyene.

²⁴ Myice kwa Yesu, Namangoswe jwakolosya ya cilanga* casambano, nipo soni myice ku miasi jiŵasulwisye jele jajikutusalila yindu yambone kupunda mujatendelaga miasi ja Abele.

²⁵ Mkalamuce sambano kuti kasimkana kumpikanila jwele jwakuŵeceta namwe. Ŵandu ŵiŵakanile kumpikanila Mose jwele juŵatetele pasi pano, nganakulupuka kose ku cilango. Nambi sambano uwe, tucikulupuka uli naga ngatukumpikanila kose jwakuŵeceta kutyocela kwinani?

²⁶ Ndaŵi jele Mlungu ŵaŵecete, maloŵe gakwe gatenganyisye cilambo capasipe, nambo sambano ŵatesile cilanga cakuti, “Tinjitenganya soni ngaŵa cilambo capasipe nambo soni ni kwinani.”

²⁷ Maloŵe gakuti, “Kamope kane soni” yikulosya pakulanguka kuti yindu yakupanganyidwa yosope tiyicitenganyika ni taciyityosya, kuti yindu yangatenganyika tiyisigalile.

²⁸ Sambano pakuti tupocele ucimwene wangakomboleka kutenganyika, kwende tumtogolele Mlungu, ni kumlambila jwalakwe mwa ucimbicimbi.

²⁹ Pakuti Mlungu jwetu ali moto wakutinisya.