Ŵaeblania 10 - Chiyawo Bible

¹ Malamusi ga Mose* ni ciwilili ca upile wele wawulimkwisawo, ngaŵa upile usyesyenewo. Atamose mbopesi sisyosyopesyo sikusapelecedwa caka ni caka, malamusigo ngaŵa mkomboleka kose kupitila mu mbopesisyo kugalawusya ŵandu kuti aŵe ŵakulungama kusyesyene ŵakwawula kwa Mlungu.

² Ŵandu ŵakumlambila Mlungu ŵala akaŵe kuti ali ŵaswejesedwe kusyesyene, ni kuti mtima wawo mkaniŵasisya soni pa ulemwa* nipo kuti akalesile kupeleka mbopesi syosope.

³ Nambo mpela muyiŵelelemu, mbopesisyo sikusakumbusya ŵandu ya ulemwa wawo caka ni caka.

⁴ Pakuti miasi ja ng'ombe sya mikambako ni acitonde ngaŵa mkombola kose kutyosya ulemwa.

⁵ Ni ligongo lyakwe ndaŵi jiŵayice Klistu* pasi pano, ŵatite, “Ŵalakwe Mlungu ngakusaka mbopesi kapena yakupeleka, nambo ŵalinganyicisye cilepe cilu.

⁶ Ŵalakwe nganasangalala ni mbopesi syakoca syambumbu kapena mbopesi syakutyosya ulemwa.

⁷ Sambano une natite, ‘Ndili apano, kuti nayitende yakusaka ŵalakwe, Mlungu, mpela mwele muyilembedwele ya une m'buku ja Malamusi.’ ”

⁸ Myoyo pandanda ŵatite, “Mbopesi kapena yakupeleka, mbopesi syakoca kapena soni mbopesi syakupeleka ligongo lya ulemwa, nganasisaka kose nipo nganasangalala nasyo.” Syelesi ni syele syaŵecetedwe m'malamusi kuti sipelecedwe.

⁹ Nambo panyuma pakwe ŵatite, “Ndili apano, kuti nayitende yele yakusaka ŵalakwe Mlungu.” Myoyo Mlungu ŵamasisye mbopesi syosope syakala sila ni kuŵika mbopesi ja Klistu m'malo mwakwe.

¹⁰ Ligongo lyakuti Yesu* Klistu ŵatesile yaŵayisakaga Mlungu kuti ayitende, uwe twaswejesedwe ni mbopesi ja cilu cakwe, ciŵacipelece Jwalakwe kampepe basi kwa yaka yosope.

¹¹ Jwakutaga mbopesi jwalijose akusakamula masengo gakwe lisiku lililyose ni kupelekaga mbopesi sisyosyopesyo mwakuwilisyawilisya, nambo mbopesi syelesi ngaŵamkombola kutyosya ulemwa.

¹² Nambo Klistu ŵapelece mbopesi jimope jakutyosya ulemwa wosope, mbopesijo jili jakwanila kundaŵi syosope, nipo piŵajipelecepo ŵatemi ku mkono wamlyo wa Mlungu.

¹³ Kweleko akwembecela kuti Mlungu ŵatende amagongo ŵakwe kuŵa mpela cakuliŵatila sajo syakwe.

¹⁴ Ni mbopesi jimopejo ŵatesile kuŵa ŵakulungama mnope kwangali mbesi kwa wosope ŵele Jwalakwe akwaswejesya.

¹⁵ Msimu Ŵaswela nombe nawo akutendela umboni yeleyi. Pandanda jwalakwe akuti,

¹⁶ “Naci cilanga* cicinjitenda nawo jemanjajo gali gapite masiku gelego, akuti Ambuje: Tinjiŵika malamusi gangu m'mitima jawo ni tinjigalemba mu nganisyo syawo.”

¹⁷ Nipo akuti soni, “Ngasingumbucila kose soni ulemwa wawo ni yangalumbana yawo.”

¹⁸ Naga sambano yosopeyi ayikululucile, mbopesi ja kupelecela ligongo lya ulemwa ngajikusosekwa soni.

Tuŵandicile kwa Mlungu

¹⁹ Acalongo acimjangu, sambano tukwete cikulupi cakwinjila Cipinda Ceswela Mnope ligongo lya ciwa ca Yesu.

²⁰ Jwalakwe ŵatuwugulile litala lyasambano ni lya umi wakupelenganya cakucinga, cele cili cilu cakwe.

²¹ Nipo soni tukwete jwakutaga mbopesi jwamkulungwa jwakulolela nyumba ja Mlungu.

²² Sambano kwende tuŵandicile kwa Mlungu ni mtima usyesyene ni wa cikulupi cisyesyene, soni ni nganisyo syeswejele ni syangali kalikose kakusisisya, nipo soni ni yilu yejoje mesi gamatakate.

²³ Kwende tukamulisye mnope cembeceyo citukwiticisyaci, ligongo tukulupilila kuti Mlungu tacisunje cilanga cakwe.

²⁴ Kwende tukumbucilaneje jwine ni mjakwe, ni kamucisyana jwine ni mjakwe pakulosya kunonyelana ni kutenda yambone.

²⁵ Kwende tukaleka ndamo syetu syakusongana pampepe, mpela mwakusatendela ŵane. M'malo mwakwe, kwende tulimbisyaneje mitima jwine ni mjakwe mnope, mnopemnope pakulola kuti Lisiku lya Ambuje likuŵandicila kwika.

²⁶ Pakuti pangali mbopesi jele jimpaka jikombole kutyosya soni ulemwa wetu naga tukupitilisya soni kulemwa mwamelepe, tulimkumanyilila yakuwona yisyesyene.

²⁷ Pelepa cisigalile kwetuwe ngaŵa cine, nambo kwambaga kwembecela ni woga kulamulwa kukukwisako ni moto wakogoya wele tiwucijonanga ŵandu ŵakusisyana ni Mlungu.

²⁸ Mundu jwangapikanila Malamusi ga Mose akusawulajidwa pangamtendela kose canasa, naga alamulidwe kuti ali jwakulemwa pali pana mboni siŵili kapena sitatu.

²⁹ Kajekaje soni mundu jwakumcembulusya Mwanace jwa Mlungu, jwele jwajitesile miasi ja Mlungu ja cilanga jijamswejesye kuŵa jangali mate, mundu jwakumnyosya Msimu wakutupa upile wa Mlungu. Cilango ca mundu jweleju ticiciŵa cakogoya mnope.

³⁰ Pakuti tukumanyilila jwele juŵaŵecete kuti, “Kuwucisya kuli kwangune, une tinjacapa cilango.” Ŵatite soni, “Ambuje tacalamula ŵandu ŵakwe.”

³¹ Cili cindu cakogoya kugwila m'myala mwa Mlungu jwa cijumi.

³² Mkumbucile masiku gandanda gala mli mgambile kupocela kwene lilanguka. Pa ndaŵi jelejo mwalimbene ni yisawusyo yejinji nambo nganimpundidwa ni yeleyo.

³³ Ndaŵi sine ŵamnyosyaga ni kumtenda cipongwe ŵandu ali mkulolela. Mwine soni mwasimanaga ni yipwetesi pampepe ni ŵandu ŵane ŵiŵalagaga camti myoyo.

³⁴ Mwaliji mkulaga pampepe ni acikayidi, nipo mwakundile mwakusangalala kuti ajigale cipanje cenu, mli mkumanyilila kuti mkwete cipanje cambone mnope cangamala.

³⁵ Sambano kasimjasa kulimba mtima kwenu, pakuti tikucimjigalila mbote jajikulungwa.

³⁶ Pakusosekwa kupimilila, kuti mtende yakusaka Mlungu, pakutenda myoyo timkapocele yele yiŵatite tacimpa.

³⁷ Paja malemba gakuti, “Pasigele kandaŵi panandi, kuti Jwele jwakwisa, ayice. Ngakokoŵa iyayi.

³⁸ Ŵandu ŵangu ŵakulungama, tacikulupilila ni kuŵa ni umi; nambo naga jumo jwa jemanjaji tawujile panyuma, une ngasisangalala najo jwelejo.”

³⁹ Uwe ngaŵa ŵandu ŵamti nikuwujila munyuma ni kwasika iyayi, uwe tuli ŵandu ŵakulupicika nipo tukulupwice.