Ŵaeblania 1 - Chiyawo Bible

Maloŵe ga Mlungu kupitila mwa Mwanagwe

¹ Kala Mlungu ŵaŵecete kaŵilikaŵili ni acinangolo ŵetu m'matala gakulekanganalekangana kupitila mwa ŵakulocesya ŵakwe,

² nambo masiku gambesi gano aŵecete ni uwe kupitila mwa Mwanagwe. Kupitila mwa Jwalakwe Mlungu ŵapanganyisye yindu yosope ni ŵampele yosopeyo kuti yiŵe yakwe.

³ Jwalakwe ali lilanguka lya lumbili lwa Mlungu soni ali ciwilili cisyesyene cakulosya ndamo sya Mlungu. Jwalakweju akuyijangata yosope ni maloŵe gakwe ga macili. Piŵamasile kwakululucila ŵandu yakulemwa yawo, ŵapite kukutama kwinani, ku mkono wamlyo wa lumbili lwa Mlungu.

⁴ Mwanace jwa Mlungu akupunda malayika,* mpela mwele lina lyele Mlungu ŵampele likusapunda lina lya malayika.

⁵ Kwamti Mlungu nganaŵeceteje kwa malayika gakwe kuti, “M'mwejo ni mwanangu, lelo jino mbele Baba gwenu.” Mlungu nganaŵeceteje ya lilayika lililyose kuti, “Une tinjiŵa babagwe jwa jwalakwejo, nipo jwalakwe taciŵa mwanangu.”

⁶ Nambo katema kiŵamjinjisyaga Mwanagwe jwandanda kupagwa pa cilambo pano, Mlungu ŵatite kuti, “Malayika gosope ga Mlungu ga mlumbeje jwalakwejo.”

⁷ Ni pakuŵeceta ya malayika Mlungu ŵatite kuti, “Mlungu akusagatendesya malayika gakwe kuŵa mbungo, ni ŵakutumicila ŵakwe kuŵa malamba ga moto.”

⁸ Nambo ya Mwanagwe Mlungu ŵatite kuti: “Wawo Mlungu, citengu cawo ca ucimwene ticiciŵa cangamala kwa yaka yosope, nipo mkusalamula mwacilungamo mu ucimwene wenu.

⁹ Mkusanonyela cilungamo ni kuŵengana ni yangalumbana. Ni ligongo lyakwe Une, Mlungu jwenu amsagwile m'mwejo ni kumpa lukondwa lwa ucimbicimbi kupunda acimjenu ŵane wosope.”

¹⁰ Ŵatite soni kuti, “Wawo Ambuje, pandanda ŵapanganyisye cilambo capasi, ni makono gawo ŵapanganyisye kwinani.

¹¹ Yeleyi tiyicimala, nambo ŵalakwe taciŵa ciŵela, yosopeyi tiyiciwisala mpela yakuwala.

¹² Timciyipindapinda mpela mkanjo, nipo tiyicicenga mpela yakuwala. Nambo ŵalakwe taciŵa ŵangacenga, nipo umi wawo uciŵa wangali mbesi.”

¹³ Citandile Mlungu nganaŵeceteje kwa limo mwa malayika gakwe kuti, “Mtame ku mkono wangu wamlyo mpaka ndili natesile amagongo ŵenu kuti aŵe mpela cakuliŵatila sajo syenu.”

¹⁴ Nambi malayika gakutenda masengoci? Ana ngaŵa jemanjajo ali misimu jakutumicila Mlungu nipo akusagatuma kukwakamucisya ŵandu ŵele ŵitacipocela cikulupusyo.