Tito 3 - Chiyawo Bible

Ndamo sya ciklistu

¹ Mwakumbusyeje ŵandu wosope kuti ŵapikanileje ŵakulamula ni ŵakwete ulamusi, soni aŵeje ŵacile kutenda masengo galigose gambone.

² Mwasalile kuti akaŵecetaga yakusakala ya mundu jwine jwalijose, aliŵambasye ku ya ukangani, aŵeje ŵakuŵeŵa, nipo ndaŵi syosope alosyeje ucimbicimbi kwa ŵandu wosope.

³ Pajatu uwe kala twaliji ŵakuloŵela, ŵangapikanila, ŵasokonecele, acikapolo ku yilakolako yakusakala ni yakusangalasya ya mitundu mitundu. Masiku gosope tuŵeleje tuli mkutenda yakusakala, wiwu, kuŵenjedwa ni ŵandu ni kuŵengana jwine ni mjakwe.

⁴ Nambo pelepo Mlungu Mkulupusyo jwetu jwalosisye umbone wakwe nambo soni canasa cakunonyela ŵandu.

⁵ Myoyo jwalakwejo ŵatukulupwisye ngaŵaga ligongo lya masengo gakulungama gitwatesile uwe, nambo ligongo lya umbone mtima wakwe pakutujojesya ni kutupagwisya soni mwasambano ni kutupa umi wasambano mwa Msimu Ŵaswela.

⁶ Mlungu ŵatupele Msimu Ŵaswela kupitila mwa Yesu* Klistu* Mkulupusyo jwetu,

⁷ kuti kupitila mu umbone wakwe mtima uwe tulungamisidwe ni jwalakwejo ni kuti tukapocele umi wangamala* utukwembecela.

⁸ Maloŵega gali gakuwona, soni ngusaka kuti mŵecetesye yeleyi, kuti ŵakulupilila Mlungu alipeleceje pa masengo gambone. Yeleyi yili yambone nambo soni yakupindulisya.

⁹ Nambo mŵambale yakusisyana yakuloŵela, ngani sya mena ga acinangolo, ukangani ni kusisyana pa Malamusi giŵalembile Mose.* Yeleyi yangakamucisya nambo soni yangali mate.

¹⁰ Mundu jwakutandisya gaŵikana, mli mumkalamwisye kaŵili, mkakola najo kandu kalikose kakutenda najo.

¹¹ Pakuti mkumanyilila kuti mundu jwamti myoyojo ali jwakusokonesya, soni ulemwa* wawo ukusalosya kuti jemanjajo ali ŵakulemwa.

Maloŵe gambesi

¹² Pitinjimtumisya Alitema kapena Tukiko kumangwenuko, timtende yakomboleka kuti timusimane ku Nikopoli, ligongo simicisye kuti ngatame kweleko ndaŵi jakusisima jikwisaji.

¹³ Mtende yakomboleka kumkamucisya Senasi jwakumanyilila ya malamusi jula, nambo soni Apolo kuti ajendelecele ulendo wawo. Mlolecesye soni kuti jemanjajo akasoŵa kandu kalikose.

¹⁴ Ŵandu ŵetu akwenela kulijiganya kulipeleka pa masengo gambone, kuti akamucisyeje papakuwoneka kusoŵa kusyesyene. Atendeje myoyo kuti ma umi gawo gakaŵa gangapindulisya.

¹⁵ Wosope ŵali ni une akuno akumpa moni. Mpelece soni moni kwa wosope ŵakusatunonyela kupitila mcikulupi. Umbone mtima wakutyocela kwa Mlungu uŵe ni jemanja wosope.