Tito 2 - Chiyawo Bible

Majiganyo gasyesyene

¹ Nambo m'mwejo mjiganyejeje yayikukamulana ni cijiganyo cisyesyene.

² Mwasalile acalume ŵacikulile kuti aŵeje ŵangakolelwa, ŵakutenda ya ucekulu, ŵa nganisyo sya lunda, ŵakulimbangana pa cikulupi, pa cinonyelo ni soni pakupilila.

³ Yalumo soni acakongwe ŵacikulile, mwasalile kuti aŵeje ŵa ndamo syakucimbicika mu utame wawo. Akaŵaga ŵakwasinjilila acimjawo kapena kuŵa acikapolo ŵa cakumwa cakukolelwesya. Akwenela kuŵa ŵakwiganya yayili yambone,

⁴ kuti pakutenda myoyo apakombole kwajiganya acakongwe ŵacanandi kuti ŵanonyeleje aciŵamkwawo ni ŵanace ŵawo,

⁵ kuti aŵeje ŵaganisya mwa lunda, ŵangali lilama, ŵakusamalila cenene ya pa liŵasa, ni ŵakupikanila aciŵamkwawo. Myoyo kuti pakapagwa mundu jwakuŵeceta yakusakala ya maloŵe ga Mlungu.

⁶ Myoyo mwasalicisye acacanda kuti aŵeje ŵakuligosa.

⁷ Mu yosope yene m'mwejo mŵeje cisyasyo pa masengo gambone. Cijiganyo cenu ciŵeje cisyesyene nipo mcijiganyeje mwa ucimbicimbi, ni lung'wanu.

⁸ Maloŵe genu gaŵeje gakupikanika kuti jwalijose akagasisya. Jwakusisyana ni m'mwejo tacitenda soni ali asoŵile cilicose cakusakala cakuti aŵecete yakwamba uwe.

⁹ Ŵamasengo ŵapikanileje acambuje ŵawo ni kwasangalasya mu yindu yosope. Akasisyanaga nawo

¹⁰ kapena kwajiŵila jemanjajo. M'malo mwakwe alosyeje kuti ali ŵakulupicika pa yosope yambone. Myoyo mu yitendo yawo tacilosya umbone wakwe pa majiganyo gakwamba ya Mlungu, Mkulupusyo jwetu.

¹¹ Pakuti umbone mtima wa Mlungu uwonecele pakusaka kulupusya ŵandu wosope.

¹² Umbone mtimawo ukusatujiganya kuleka umi wangamcimbicisya Mlungu, nambo soni yilakolako ya pa cilambo capasi. Ukusatujiganya soni kuti umi wetu wa cilambo capasi pano uŵe wakuligosa, wakulungama ni wakumcimbicisya Mlungu,

¹³ pajatu tukulindilila lisiku lya upile, pitiyicitendekwa yindu yitukwembecela, pele Mlungu jwamkulungwa ni Mkulupusyo jwetu Yesu* Klistu* tacilosya lumbili lwakwe.

¹⁴ Jwalakwe ŵalipelece msyene pa ligongo lya uwe, kuti atukulupusye ku yakusakala yetu yosope, ni kutuswejesya kuti tuŵe ŵandu ŵakwe ŵakutenda citema pa masengo gosope gambone.

¹⁵ Myijiganyeje yeleyi, ni kwalimbikasya ŵandu, ni kwajamuka ni ulamusi wosope. Mkakunda kuti jwine jwalijose amcembulusye.