Tito 1 - Chiyawo Bible

¹ Cikalataci cikutyocela kwa une Paulo, jwakutumicila jwa Mlungu nambo soni jundili ndumetume* jwa Yesu* Klistu.* Nasagulidwe ni kutumidwa kuti ngakamucisye ŵandu ŵiŵasagulidwe ni kuti akulupilile mwakulimbangana ni kuti aŵeje ŵakumanyilila cakuwona cisyesyene ca majiganyo gele dini jetu jikusatujiganya.

² Cakuwona celeci cikusapeleka cikulupi ca umi wangamala,* uŵatesile Mlungu cilanga* kwa jemanjajo cilambo mkinicipanganyidwe. Mlungu ali jwangalambusya soni jwalakwejo ngaŵa mkulambusya.

³ Myoyo mu ndaŵi jakwe Mlungu, Mkulupusyo jwetu, jwaŵecete maloŵe ni jwalamwile kuti une mbegwe ukumu wakulalicila utengawu.

⁴ Cikalataci ngumlembela m'mwejo Tito jumli mpela mwanangu msyesyene mwa cikulupi cetu cimpepe. Umbone mtima ni mtendele yakutyocela kwa Mlungu ni Klistu Yesu Mkulupusyo jwetu.

Masengo ga Tito ku Kilete

⁵ Namlesile ku Kilete kuti mlondesye yosope yiyaliji mkaniyimale kulongosoka, ni kuti mwaŵice acakulungwa ŵa mpingo* m'musi uliwose mpela yinatite pakumlamula.

⁶ Jwamkulungwa jwa mpingo* aŵe jwangakayikasya, soni aŵe jwa ŵakongwe ŵamo. Ŵanace aŵe ŵakulupilila mwa Klistu, ŵimkanakola mbili jakuti jemanjajo ali ŵa ndamo syakusakala kapena kuti ali ŵangapikanila.

⁷ Jwakulolela mpingo* aŵeje jwangakayikasya ligongo ali jwakutumicila jwa Mlungu. Jwalakwejo akaŵa jwakupikana yakwepe, akaŵa jwakumwa yakumwa yaukali, jwandewo, kapena soni jwakunonyela mbiya.

⁸ Aŵe jwakwapocela cenene acalendo, jwakunonyela yambone, jwakumanyilila kulilamulila msyene, jwakulungama, jwamswela mtima nambo soni jwakulilekasya msyene.

⁹ Aŵeje jwakukamulisya mnope maloŵe gagali gakulupicika gele soni gagakukamulana ni majiganyo giŵajiganyisye. Mwa litala lyeleli tacipakombola kwalimbisya ŵane ni cijiganyo cisyesyene, nambo soni pakwalosya yakulemwa yawo yayikusisyana ni cijiganyoco.

¹⁰ Pakuti pana ŵandu ŵajinji mnope pasikati pa likuga lya ŵandu ŵakutyocela ku Ciyuda ŵakusajimucila ni kwalambusyaga ŵandu pakwasalila ngani syangali mate ni kwasokonesyaga jemanjajo.

¹¹ Kuli kwakusosekwa kwalekasya jemanjajo, pakuti akusokonesya maŵasa gane pakwajiganya jemanjajo yicindu yinganiyiŵayo. Akusatenda yeleyi mu matala gangalumbana gakusaka kupata mbiya.

¹² Jumo jwakulocesya* jwa jemanjajo jwa ku Kilete jwatite kuti, “Ŵandu ŵa ku Kilete ali ŵa unami masiku gosope, ali mpela yilombo yakogoya, ŵakutunduka ni ŵaulesi.”

¹³ Umboni welewu uli wakuwona. Ali ni ligongo lyakwe mwajamuce mwamacili ŵanduwo, kuti cikulupi cawo ciŵeje cakulimbangana.

¹⁴ Akwenela kuleka kupikanila ndano sya Ciyuda ni malamusi ga ŵandu ŵakusisyana ni cakuwona cisyesyene.

¹⁵ Kwa ŵandu ŵaswela mtima yindu yosope yili yayiswela. Nambo kwa ŵele ŵali ŵasakale ni ŵangakulupilila kwa jemanjajo kwangali kandu keswela; mitima jawo ni lunda lwawo, yosope yili yesakale.

¹⁶ Akusajiticisya kuti akusam'manyilila Mlungu, citamileco ni yitendo yawo akusamkana, pakuti jemanjajo ali ŵawuŵenji ni ŵangapikanila, soni ŵangaŵajilwa kutenda kandu kalikose.