Sefaniya 3 - Chiyawo Bible

Ulemwa wa Yelusalemu ni kuwomboledwa

¹ Likungu kwa Yelusalemu, msinda wakatangale, wakwimucila ni wakupondelesya ŵandu ŵakwe.

² Nganiŵapikanila AMBUJE kapena kamulisya masengo yiŵawutetelaga. Nganiwukulupilila mwa AMBUJE kapena kuŵenda cikamucisyo ca jwalakwejo.

³ Nduna syakwe syabangulaga mpela masimba; ŵakulamula ŵakwe ŵaliji mpela masogo gakwendajenda ligulo, gakutunduka ngaleka atamose liwupa kuti liyice mpaka kundaŵi.

⁴ Ŵakulocesya ŵakwe ŵaliji ŵangakulupicika, soni ŵakutaga mbopesi ŵagasakesye malo gamaswela ni kugalawusya malamusi ga Mlungu kuti gatendeleje cenene jemanjajo.

⁵ Nambo AMBUJE ali ciŵela mu msindamo, akusatenda yele yili yambone ngaŵa yakusakala. Akusalamula mwakulungama kundaŵi, nambo ŵangalumbana akupitilisya kutenda yakulemwa nambo citamileco ngatenda soni.

⁶ AMBUJE akuti, “Najijonasile mitundu josope; Njonasile misinda jawo ni kugaleka mapupa gawo ni sanja syakulondela yosope yili masame. Misinda jawo jangali ŵandu, misewu jawo pangali jwakupita, pangali atamose mundu jumo jwasigele.

⁷ Naganisisye kuti kusyene ŵandu ŵangu tanjogope, ni kwiticisya cilango cangu, soni kuti ngaliŵalila malamusi gangu. Nambo kaneka ni ŵatandite kutenda yakusakala yamkinatendeje.

⁸ “Munjembecele,” ni yakuti AMBUJE. “Mjembecele lisiku lyele litinjajimba magambo. Pakuti simicisye yakujisonganya mitundu ja ŵandu pampepe ni ma ucimwene gosope, kuti apikane kupweteka kwa lutumbilo lwangu. Cilambo cosope capasi ticicitinika ni moto wa ukali wa lutumbilo lwangu.”

⁹ “Kaneko tinjapitikusya ŵandu ŵa mitundu josope, nipo tacilumbaga Une jikape ngaŵa milungu jine. Wosope ŵene tacimbikanilaga une.

¹⁰ Atamose kwakutalika pesi sulo sya ku Ifiyopiya, ŵandu ŵangu ŵabalalikangene, taciyika ni mbopesi kwa Une.

¹¹ Lisiku lyelelyo, ŵandu ŵangu ngasatenda soni ligongo lya yakusakala yiŵanjimucile nayo Une. Pakuti ndaŵi jelejo tinjatyosya ŵakulikwesya ni ŵakupoka, jemanja ngisimtenda soni yakunjimucila Une petumbi lyangu lyeswela.

¹² Pasikati penu tinjaleka ŵandu ŵakulinandiya ni kulitulusya, ŵitaciyika kwa une kuŵenda cikamucisyo.

¹³ Ŵandu ŵa ku Isalaeli uŵasigele ngasalemwa soni, ngasaŵeceta ya unami kapena kulambusya. Yindu tiyicajendelaga cenene soni taciŵa pambone, pangali jwine jwakumjogopa.”

¹⁴ Jimbani mwakwesya, jemanja ŵandu ŵa ku Siyoni!* Mgumile jemanja Aisalaeli. Sangalalani ni mtima wenu wosope, jemanja ŵakutama mu Yelusalemu.

¹⁵ AMBUJE atyosisye cilango cenu; ŵatyosisye amagongo ŵenu wosope. AMBUJE, mwenye jwa ku Isalaeli, ali ni jemanja; myoyo pangali ligongo lyakuti mjogopeje.

¹⁶ Ndaŵi jikwisa jitaciŵeceta jemanjajo kwa Yelusalemu kuti, “Mkajogopa, m'mwe msinda wa Siyoni! Mkatenda mbwaji.

¹⁷ AMBUJE, Mlungu jwenu ali ni m'mwejo; mpela jwa ngondo jwakumkamucisya kwapunda amagongo. AMBUJE tacisangalala ni lukondwa ligongo lya m'mwe, tacimwucisya mcinonyelo cakwe. Tacisangalala ni m'mwejo pakwimba nyimbo sya lukondwa,

¹⁸ mpela pa masiku ga cindimba.” AMBUJE akuti, “Masisye likungu lya conasiko ni kumtyocesya soni syenu.

¹⁹ Ndaŵi jikwisa! Tinjapa cilango uŵamlagasyaga; Tinjakulupusya ŵalemale wosope ni kwawucisya kumusi uŵapite ku ukapolo, Tinjigalawusya soni syawo kuŵa ucimbicimbi, ni cilambo cosope ticicacimbicisya jemanjajo.

²⁰ Ndaŵi jikwisa! Tinjawucisya ŵandu ŵenu uŵabalalice kumangwawo; Tinjatendesya kuŵa ŵakupikanika pa cilambo cosope ni kumtenda jemanja kuŵa ŵakusimana cenene soni.” AMBUJE aŵecete myoyo.