Sefaniya 2 - Chiyawo Bible

Akwasalila ŵandu kuti apitikuce mitima

¹ Jemanja mtundu wangali soni, mwujile ku ndamo syenu

² mkanimjigalidwe mpela matimba gakuwululuka ni mbungo, soni ukali wakogoya wa AMBUJE mkiniwumyicilile jemanja, mkaniliyice lisiku litacilosya lutumbilo lwakwe.

³ Mwasosejesoseje AMBUJE, jemanja ŵakulinandiya, jemanja ŵimkusapikanila malamusi gakwe. Mtendeje yayili yakulungama, ni kulinandiya mwacimsyene pameso pa AMBUJE. Mwine mwakwe timcikulupuka pa lisiku lya lutumbilo lwa AMBUJE.

Conasiko ca yilambo yakuŵandikana ni Isalaeli

⁴ Pangali jwalijose jutacisigala mu msinda wa Gasa, soni Ashikeloni taciŵa masame. Ŵandu ŵa ku Ashidodi tacitopoledwa musi mwacisisimucisya, soni ŵandu ŵa ku Ekiloni tacitopoledwa mu msinda mwawo.

⁵ Likungu kwa jemanja Afilisiti, jemanja ŵandu ŵimkutama mungulugulu nyasa. AMBUJE amlamwile kala. Tacimjonanga jemanja, mwakuti pangali ni jumo jose jwa jemanja jutacisigala.

⁶ Malo ga mungulugulu nyasa tigaciŵa lilambo lyakulicisya yilangwa ni macinga ga ngondolo.

⁷ Kweleko tikuciŵa cilambo ca ŵandu ŵakusigala ŵa mwiŵasa lya Yuda. Tacilicisyaga yilangwa yawo kweleko nipo ligulo tacigonaga m'majumba ga Ashikeloni. Pakuti AMBUJE Mlungu jwawo taciŵa ni jemanjajo ni kwatenda soni kuti yindu yajendeleje cenene.

⁸ AMBUJE Ŵamaciligosope akuti, “Mbikene ŵandu ŵa ku Mowabu ni Aamoni ali mkwanyosya ni kwalalatilaga ŵandu ŵangu, ni kulilapililaga kuti tacasumula malo gawo.

⁹ Kusyene Une AMBUJE jwa cijumi, Mlungu jwa Aisalaeli, ngulumbila kuti Mowabu ni Aamoni tacijonanjidwa mpela Sodomu ni Gomola. Malogo tigaciŵa masimbo ga njete ni masame gangamala soni gemele manyasi. Ŵakusigala mwa ŵandu ŵangu tacajonanga jemanjajo ni kujigala malo gawogo.”

¹⁰ Mwelemu ni muciciŵela cilango ca ŵandu ŵa ku Mowabu ni Aamoni ligongo lya kupoka ni kwanyosyaga ŵandu ŵa AMBUJE Ŵamaciligosope.

¹¹ AMBUJE tacajogoya jemanjajo mnope. Tacijonanga milungu josope ja pa cilambo capasi, myoyo mitundu josope tijicalambila AMBUJE, mtundu uliwose ku cilambo cakumangwakwe.

¹² Jemanja ŵandu ŵa ku Ifiyopiya, timciwa ni upanga wangu.

¹³ AMBUJE tacikamulisya macili gakwe kuti ŵajonanje Asiliya. Msinda wa Ninefe taciwutenda kuŵa masame, malo gejumu mpela cipululu.

¹⁴ Myoyo yilangwa tiyicigonaga kweleko kwisa soni yinyama yamwitinji. Yisyamtima tiyicitamaga m'masame ni kulilaga m'mawindo, makungulu tigacitamaga pa mlango wakwe. Yitela ya mikungusa taciyitengulila.

¹⁵ Welewu ni msinda uwalitendaga kuti uli wakutamilicika, uwatiga usyene kuti, “Une apano! Pangali soni jwine iyayi!” Awulole mwele muwujonasicile sambano. Uŵele masame gakutama yinyama yakwitinji. Jwalijose jwakupita tacigambaga kulapa ni kupukunyaga mtwe.