Sefaniya 1 - Chiyawo Bible

¹ Awu uli utenga wele AMBUJE ŵapelece kwa Sefaniya mu ndaŵi jele Yosiya mwanace jwa Amoni jiŵaliji mwenye jwa ku Yuda. Sefaniya jwapagwile kwiŵasa lya Mwenye Hesekiya kupitila mwa Amaliya, Gedaliya, ni Kushi.

Lisiku lyele AMBUJE tacalamula ŵandu

² AMBUJE* ŵatite, “Tinjijonanga cindu cilicose ca pa cilambo capasi,

³ mtundu wosope wa ŵandu wosope ni yinyama yosope, yijuni ni somba syakwe. Tinjagwisya ŵandu ŵakusakala. Tinjijonanga mitundu josope ja ŵandu, nipo pangali atamose jumo jutacisigala.” Ni yinguti Une AMBUJE.

⁴ “Tinjipeleka cilango kwa ŵandu ŵa ku Yelusalemu ni ku Yuda. Tinjijonanga yosope yakusigalila ya Baala* pa malo agano, soni tipaciŵa pangali mundu jwalijose jutacikumbucila ya ŵakutaga mbopesi ŵa milungu ja unamijo.

⁵ Tinjimjonaga soni jwele jwakukwela pa msakasa ni kulilambilaga lyuŵa, mwesi ni ndondwa. Tinjajonanga soni ŵele ŵakulambila ni kulumbila* mu lina lya Une, kwineku ni kulumbilaga mu lina lya mlungu Moleki.

⁶ Tinjajonanga soni ŵele ŵiŵalesile kunguya une, ŵingakusaka kwika kwa une kapena kuŵenda lunda.”

⁷ Lisiku liŵandicile lyele AMBUJE tacitama pa citengu cakwe cakulamula; myoyo mtame jii pameso pakwe. AMBUJE akuliŵicila cile kuti tiŵapelece ŵandu ŵakwe mpela mbopesi nipo ŵaŵilasile amagongo ŵakwe kuti ajonanje Yuda.

⁸ Pa lisiku lya mbopesi ja AMBUJE, “Tinjapa cilango acakulungwa ŵa mwenye ni ŵanace ŵa mwenye ni wosope ŵakutenda ndamo sya cilendo.

⁹ Tinjapa cilango wosope ŵakulambila mpela ŵandu ŵele ŵakujilambila milungu ja cilendo, ni ŵele ŵakusajiŵa ni kuwulaga ni cakulinga cakuti agumbasye nyumba ja ambuje ŵawo.”

¹⁰ AMBUJE akuŵeceta kuti, “Pa lisiku lyelelyo kulila kwakukulungwa tikucipikanika ku Cipata ca Msika wa Somba mu Yelusalemu. Tikucipikanika gungumila kwa kasika yindu ku matumbi.

¹¹ Jemanja ŵakutama kwiŵanda kwa msinda lilani mwakutesya canasa, ligongo ŵa malonda wosope amasile kuwa, wosope ŵakusumisya silifa* awile.

¹² “Ndaŵi jelejo tinjijigala nyali ni kusosasosa mu Yelusalemu. Tinjapa cilango ŵandu ŵagamba kutama ni kulitenda kuti ali cenene soni ni kulikulupilila jikape, ŵele ŵakusati acimsyene kuti, ‘AMBUJE ngasatenda cindu cilicose, cambone kapena cakusakala.’

¹³ Yipanje yawo jemanjaji tacajiŵila nipo nyumba syawo tacisigumula. Tacitaŵa nyumba nambo ngasatamamo kapena tacipanda mipeleya nambo ngasamwa finyo jwakwe.”

¹⁴ Lisiku lyalikulungwa lya AMBUJE liŵandicile — liŵandicile mnope nipo likwisa mwakwanguya! Tiliciŵa lisiku lyakupweteka, mwakuti atamose asilikali ŵamacili tacilila pelepo.

¹⁵ Tiliciŵa lisiku lya lutumbilo, lisiku lya yisawusyo ni kulagasika, lisiku lya conasiko ni kupasulanya, lisiku lya cipi ni canasa, lisiku lya mawunde ni lyakuŵilila kuti bii.

¹⁶ Lisiku lyelelyo tikucipikanika kulila kwa lipenga lya ngondo ni kulila kwa asilikali ŵakuja kuputa ngondo ku misinda jecinjilicisidwe ni mapupa soni sanja sya ngondo.

¹⁷ AMBUJE akuti, “Pa ligongo lyakuti ŵanduwo ŵandemwecesye, tinjasawusya kwakogoya mwakuti tacijendaga mpela ŵangalola. Miasi jawo tijicipungulidwa mpela mesi, nipo yilu yawo tiyicigamba kuŵa mbwee, ni kuwolaga mpela ndoŵe.”

¹⁸ Silifa kapena golidi* jwawo ngasakombola kwakulupusya jemanjajo pa lisiku lya lutumbilo lwa AMBUJE. Ukali wakwe wa moto tiwucijoca cilambo cosope. Mwacisisimucisya tacamasya wosope ŵakutama mcilamboco.