Sakaliya 9 - Chiyawo Bible

Cilango ku yilambo yakuŵandikana nayo

¹ Awu uli utenga wa AMBUJE: Jwalakwejo akucijamuka cilambo ca Hadilaki nambo soni msinda wa Damasiko. Pajatu misinda josope ja ku Alamu jili jakwe ja AMBUJE, yalumo soni mpela musiŵelele ngosyo syosope sya Aisalaeli.

² Cilambo ca Hamati cicitesile malile ni cilambo ca Hadilaki cili soni cakwe ca AMBUJE yalumo soni misinda ja Taya ni Sidoni atamose kuti ali ŵalunda mnope.

³ Taya ŵalitaŵile mapupa gakulicinjilicisya, soni ŵawunjice silifa* ni golidi* mpela litaka!

⁴ Nambo AMBUJE tacisumula yosope yakwete jemanjajo, ni kuyijasa m'nyasa soni msindawo taciwujoca moto.

⁵ Msinda wa Ashikeloni nombe nawo tiwuciyiwona yeleyi nipo tiwucitenda woga. Msinda wa Gasa tiwucikwinyata ni woga, yalumo soni Ekiloni nipo yiŵajembecelaga tiyicisokonecela. Mwenye jwa ku Gasa tacimtyosya nipo ku Ashikeloni tikuciŵa kwangali ŵandu.

⁶ Ŵandu ŵa mitundu jakulekanganalekangana tacitama ku Ashidodi. AMBUJE akuti, “Tinjimasya kulikwesya kwa Afilisiti.

⁷ Ŵandu ŵakwe ngasalya nyama jijikwete miasi, kapena jilijose jiŵalekasisye. Wosope ŵakusigala taciŵa ŵandu ŵangu nipo taciŵa mpela lukosyo lwa Yuda. Nombe nawo Aekiloni taciŵa mpela Ayebusi.

⁸ Pandaŵijo une tinjiŵa mlonda jwa cilambo cangu kuti jwalijose akajinjila kapena kwinjilamo. Ngasinjiticisya kuti ŵandu ŵangu alagasidwe. Nayiweni mwele mwakulajila ŵandu ŵangu.”

Mwenye jwa mtendele

⁹ Msengwe, msengwe, jemanja ŵandu ŵa ku Siyoni!* Mgumile mnope, jemanja ŵandu ŵa ku Yelusalemu! Mlole, mwenye jwenu akwisa kwa jemanja! Akwisa ali ŵakupunda ni jwakwapunda amagongo. Jwalakwejo ali jwakulinandiya nipo akwesile mbunda — mbunda jakwe jili ja mwana ja sampano.

¹⁰ AMBUJE akuti, Tinjityosya yigeleta ya ngondo ku Isalaeli ni kugajigala mahaci gakwe kuja nago ku Yelusalemu; soni mawukunje giŵakamulisyaga masengo tinjigatemangula. Mwenye jwenu taciyikasya mtendele pasikati pa yilambo; tacilamulila kutyocela ku nyasa jine mpaka kuja kwika ku nyasa jine, kutyocela ku Lusulo lwa Yufuleti mpaka kumbesi kwa cilambo capasi.

Kuwucisidwa soni kwa ŵandu ŵa Mlungu

¹¹ AMBUJE akuti, “Ligongo lya cilanga* cinatesile ni m'mwejo cele cicasindicisidwe ni miasi ja mbopesi, Une tinjagopola ŵandu ŵenu ŵali mpela acikapolo — kutyocela mwisimbo lyangali mesi.

¹² Mwujile jemanja ŵimli ku ukapolo jemanja ŵimkwete cembeceyo; Mwujile kwipupa lyenu lyecinjilicisidwe. Ngumsalila sambano, Une tinjimwucisya yambone mwakutotoganya, ni upile pa yilagasyo yosope yimsimene nayo.

¹³ Tinjikamulisya masengo Yuda mpela ukunje wangu, nipo Isalaeli mpela mipamba jakwe. Tinjikamulisya masengo acalume ŵa ku Siyoni mpela upanga, pakumenyana ni ŵandu ŵa ku Gilisi.”

¹⁴ Sambano AMBUJE tacawonecela ŵandu ŵakwe; taciponya mipamba jakwe mpela kumesya. AMBUJE Mlungu tacilisya citolilo cawo; tacijenda mu cimbunga cakutyocela kum'mwela.

¹⁵ AMBUJE Ŵamaciligosope tacacinjilicisya ŵandu ŵakwe, nipo tacajonanga amagongo ŵawo. Tacigumila ku ngondo mpela ŵandu ŵakolelwe nipo tacisulusya miasi ja amagongo ŵawo; nipo tijicijendelecela mpela miasi ja mbopesi jajitajidwe pa malo gakupelecela mbopesi kutyocela mu mbale.

¹⁶ Pitilicikwana lisiku lyelelyo, AMBUJE tacakulupusya ŵandu ŵakwe, mpela mkucinga mwakusayicinjilicisya yilangwa ku yakogoya. Ŵanduwo taciŵa ŵakunyesimila mcilambo mwawomo mpela tumaganga twamtengo wapenani twakusaŵika pa cisoti ca mwenye.

¹⁷ Cilamboco ticiciŵa cakusalala mnope. Acacanda tacikula mwamacili ligongo lya tiligu ni finyo jwakwe.