Sakaliya 7 - Chiyawo Bible

AMBUJE akwamuka yakulijima kulya kwa unami

¹ Mu caka ca mcece Daliyasi piŵaliji mwenye, pa lisiku lya mcece lya Maloŵe ga AMBUJE gayice kwa Sakaliya pa lisiku lyamcece lya mwesi wa msano ni mcece (wawuli mwesi wa Kisilefi), AMBUJE ŵambele une utenga.

² Ŵandu ŵa ku Beteli ŵaliji ali amtumile Shalesa ni Legemu Meleki pamo ni ŵandu ŵawo, kuti akaŵende canasa kwa AMBUJE,

³ ni kwawusya ŵakutaga mbopesi ŵa ku Nyumba ja AMBUJE kuti, “Ana uweji tulileje ni kulijima kulya* pa mwesi wa msano mpela mwele mutuŵele tuli mkutendela yaka yosopeyi?”

⁴ Kaneko maloŵe ga AMBUJE Ŵamaciligosope gayice kwa une gigatiji kuti:

⁵ “Mkasalile ŵandu wosope ŵa mcilambo pamo ni ŵakutaga mbopesi kuti, pa ndaŵi jimwalijimaga kulya ni kulila pa mwesi wa msano ni pa mwesi wa msano ni jiŵili kwa yaka 70, nginimunjimbicisyaga une pakutenda yeleyo.

⁶ Pa ndaŵi jimwamwaga ni kulya mwaliji mkulisangalasya mwacimsyene jikape.”

⁷ Yeleyitu ni yiŵaŵecete AMBUJE kupitila mwa jwakulocesya* jwakwe pa ndaŵi jele mu msinda wa Yelusalemu yindu yaliji mkwenda cenene ni misi jakwe jakuwusyungulila nambo soni ku madela ga kum'mwela ni ku ciŵata.

Ungapikanila ukwikasya ukapolo

⁸ AMBUJE ŵampele Sakaliya utenga wakuyicisyawu:

⁹ “Mlamulaneje cenene ni kutendelana canasa kwa jwine ni mjakwe.

¹⁰ Mkalagasya acakongwe ni ŵanace ŵamasije, acalendo ŵakutama pasikati penu, kapena jwalijose jwali jwakulaga. Mkaganicisyanaga yakutendelana yakusakala kwa jwine ni mjakwe.”

¹¹ “Nambo ŵandu ŵakanile kumbikanila, ni kulimbikasya mitima jawo kuti akambikanila.

¹² Ŵajumwisye mitima jawo kuti akapikanila malamusi gele ginatumisye kupitila kwa ŵakulocesya ŵakalakala. Ali ni ligongo lyakwe une AMBUJE Ŵamaciligosope natumbilile mnope jemanjajo.

¹³ Pa ligongo lyakuti nginambikanila pa ndaŵi jinaŵecetaga kwa jemanjajo, myoyo soni une nganinapikanila pa ndaŵi jiŵapopelaga kwa une. Nguti myoyo une AMBUJE Ŵamaciligosope.

¹⁴ Mpela mucikusatendela cimbunga, une namwasenye jemanjajo pasikati pa mitundu jine ja ŵandu jangakujimanyilila jemanjajo. Cilambo cawo caŵele masame, pangali jwalijose jwakutama mwelemo.”