Sakaliya 4 - Chiyawo Bible

Mesomkulola ga cakuŵikapo nyali

¹ Lilayika lilyaliji mkuŵeceta ni une lila lyayice soni ni lyanjimwisye mpela mwakusamjimucisya mundu naga ali mlugono.

² Lyambusisye kuti, “Ana mkuciwona cici?” Myoyo najanjile kuti, “Nguciwona cakuŵikapo nyali ca golidi.”* Penani pakwe pana mbale jakuŵikamo mawuta. Pa cakuŵikapo nyalico pana nyali msano ni siŵili sisikwete mbanga mwakwinjicisyamo ngonji syakupambila.

³ Pambali pakwe pa cakuŵika nyalico pana yitela yiŵili ya olifi,* cine ku mkono wamlyo, cine kumciji.

⁴ Kaneko naliwusisye lilayika lila kuti, “Ana yeleyi yikugopolela cici?”

⁵ Lilayikalyo lyambusisye kuti, “Ana ngimkumanyilila?” Une najanjile kuti, “Elo, ambuje ŵangu, yeleyi nginguyimanyilila.”

^10a Kaneko lilayika lila lyatite kwa une, “Nyali msano ni siŵili sili meso ga AMBUJE, gele gagakusalola pa cilambo cosope capasi.”

¹¹ Kaneko nawusisye, “Nambi yitela yiŵili ya olifi* kumbali syosope siŵili pa malo gakuŵicilapo nyali yikugopolela cici?

¹² Nambi nyambi siŵili kusyeto kwa mipopi jiŵili ja golidi jakupitila mawutajo yikugopolela cici?”

¹³ Lilayikalyo lyambusisye kuti, “Ana ngimkumanyilila?” Une najanjile kuti, “Elo, ambuje ŵangu, yeleyi nginguyimanyilila.”

¹⁴ Kaneko ŵajanjile kuti, “Jemanjaji ali ŵandu ŵaŵili ŵele ŵasagulidwe ni Mlungu, ŵakusamtumicila jwalakwejo, AMBUJE ŵa cilambo cosope capasi.”

Cilanga ca Mlungu kwa Selubabele

⁶ Kaneko lilayika lila lyasalile kuti ngapelece utenga wa AMBUJE wakuyicisyawu kwa Selubabele. “Timcipunda nambo ngaŵaga pa kutenda ngondo, kapena mwamacili genu jikape iyayi, nambo ni msimu wangu.

⁷ Ana m'mwe alitumbi lyelewu, mli ŵani? Timciŵa cilambo cakusalala pameso pa Selubabele. Nipo pitaciyika nalyo liganga lyambesi lya pa nyumba jangu, ni kulisajika penani, ŵandu tacigumila acitiji kuti, ‘Kusalala, kusalala!’ ”

⁸ AMBUJE ŵambele soni utenga awu wakuti,

⁹ “Selubabele ŵataŵile yilimbilimbi ya nyumba jeleji ni magasa gakwe, nipo tacimalisya. Ayi pitiyicitendekwapo, ŵandu ŵangu tacimanyilila kuti une ni junamtumisye m'mwejo kwa jemanjajo.

^10b Ŵanduwo ali ŵakudandawula pakuyiwona kuti masengo ngigakutendekwa mwacitema. Nambo pitacimwona Selubabele ali mkupitilisya masengogo, jemanjajo taciŵa ŵakusengwa.”