Sakaliya 3 - Chiyawo Bible

Mesomkulola ga jwakulocesya gakwamba ya Jwakutaga mbopesi

¹ Kupitila m'mesomkulola gane, AMBUJE ŵandosisye Yoswa, jwamkulungwa jwa ŵakutaga mbopesi* ali ajimi pameso pa lilayika lya AMBUJE. Paliji pana soni Satana* jwele jujwajimi kumbali ja mkono wamlyo wa Yoswa kuti amjimbe Yoswajo magambo.

² Lilayika lya AMBUJE lila lyamsalile Satana jula kuti, “AMBUJE amjamuce m'mwejo, Satana! AMBUJE ŵakusawunonyela msinda wa Yelusalemu amjamuce m'mwejo. Mundu jweleju ali mpela citela cakolela ciciwumulidwe pa cisisa.”

³ Pandaŵi jiŵajimi pameso pa lilayika lila, Yoswa ŵaliji ali awete yakuwala yesakale ya likaku.

⁴ Sambano lilayika lila lyasalile acimjakwe uŵampecesye ŵala kuti, “Mwule yakuwala yesakale ya likaku yawete munduju.” Kaneko ŵamsalile Yoswa kuti, “Ndyosisye ulemwa* wenu wosope soni tinimpe yakuwala yasambano kuti m'wale.”

⁵ Kaneko lilayika lila lyalamwile ŵakumpecesya ŵala kuti, “Mum'wece nduŵila jambone mu mtwe mwakwe.” Kaneko ŵam'wecice jwalakwejo yakuwala yasambano. Pandaŵijo ni kuti lilayika lya AMBUJE lyaliji lili lijimi papopo.

⁶ Kaneko lilayika lya AMBUJE lila lyamsalile Yoswa kuti

⁷ AMBUJE Ŵamaciligosope akuŵeceta kuti, “Naga mkugapikanila malamusi gangu ni kutenda yele yinimsalile une kuti myitende, timcipitilisya kulamulila nyumba jangu ni kulolela soni maluŵala gakwe, nipo soni tinjigapikanila mapopelo genu mpela mungusagapikanila mapopelo ga malayika gali pameso panguga.

⁸ Mpikane sambano, Yoswa, m'mwejo mli jwamkulungwa jwa ŵakutaga mbopesi, mpikane soni jemanja ŵimli ŵakutaga mbopesi, ŵele ŵimli cimanyisyo ca yambone yitiyicitendekwa. Tinjiyika ni jwakutumicila jwangu jwakolanjidwa kuti Nyambi.

⁹ Nguŵika pameso pa Yoswa liganga lyalikwete mbali msano ni siŵili. Une namsyene tinjisokotapo maloŵe, tinjityosya ulemwa wa mcilambo acino pa lisiku limpepe.

¹⁰ Pitiliciyika lisiku lyelelyo, wosope ŵene timciŵilanjidwa kuti mkasangalalile mtendele wenu, jwalijose ali atemi pa citela cakwe ca mpeleya ni ca mkuju.”