Sakaliya 2 - Chiyawo Bible

Mesomkulola ga lukonji lwakupimila

¹ Kupitila m'mesomkulola gane, nam'weni mundu ali ajigele lukonji lwakupimila m'myala mwakwe.

² Une namwusisye jwalakwejo kuti, “Ana mkwawula kwapi?” Jwalakwejo jwanjanjile kuti, “Kukuwupima msinda wa Yelusalemu, kuti ngamanyilile ulewu wa mcijipi ni ulewu wakwe.”

³ Kaneko naliweni lilayika lilyaŵele lili mkuŵeceta ni une lila lyayice ciŵandika, soni line lijakwe lyayice kukuwonegana nalyo.

⁴ Lyandanda lila lyatite kwa lijakwe lila kuti, “Mumwutucile mcanda jwakwete lukonji lwakupimilajo ni mkamsalile kuti mu Yelusalemu timuciŵa ŵandu ŵajinji kwisa soni yilangwa yejinji, mwakuti msindawo tiwuciŵa wangali mapupa gakuwusyungulila.

⁵ AMBUJE aŵecete kuti jwalakwe jika taciŵa lipupa lya moto lyakuwucinjilicisya msindawo, soni tacilosya lumbili lwakwe mkatimo.”

Ŵa ku ukapolo akuŵilanjidwa kuti awujile soni kumusi

^6-7 AMBUJE akuŵeceta kuti, “Jemanja nampwilinganyicisye ku mbungo syosope mcece. Nambo sambano jemanja ŵimli ku ukapolo mtileko ku Babiloniyako ni kuwujila ku Yelusalemu.

⁸ Jwalijose jwakumlagasya jemanja, akulagasya cindu cicili ca mtengo wapenani kwa une.” Myoyo, AMBUJE Ŵamaciligosope andumisye une ni utenga wakuyicisyawu ku yilambo ku mitundu jine jijakamwile ŵandu wakwe:

⁹ “AMBUJE asyene jikape tacimputila jemanja ngondo, nipo yipanje ya jemanja tiyicisumulidwa ni ŵandu uŵamtumicilaga jemanja.” Ayi pitiyicitendekwapo, jwalijose tacimanyilila kuti AMBUJE Ŵamaciligosope ni ŵandumile une.

¹⁰ AMBUJE* ŵatite, “Mjimbe mwa lukondwa, jemanja ŵandu ŵa ku Yelusalemu! Ngwisa kukutama pasikati penu!”

¹¹ Mu ndaŵi jelejo, ŵandu ŵa mitundu jejinji taciyika kwa AMBUJE, nipo taciŵa ŵandu ŵakwe. Tacitama pasikati penu, nipo jemanja timcimanyilila kuti jwalakwejo andumisye une kwa jemanja.

¹² AMBUJE tacijigala Yuda kuŵa cipanje cakwe mcilambo cakusaguka, nipo Yelusalemu tiwuciŵa msinda wakwe wa pamtima.

¹³ Jemanja wosope, mgambe kutama jii pameso pa AMBUJE, ligongo jwalakwejo akwisa kutyocela ku malo gakwe gamaswela.