Sakaliya 14 - Chiyawo Bible

Yakutendecekwa pa lisiku lya AMBUJE

¹ Lisiku yele AMBUJE litacitama pa citengu cawo cakulamula lili pakuŵandika. Yindu yiŵamsumwile amagongo ŵenu taciyigaŵana jemanja mli mkulola.

² AMBUJE tacijiyikasya mitundu josope pampepe ni cakulinga cakuti apute ngondo ni msinda wa Yelusalemu. Msinda tiwucijigalidwa, soni katundu jwa m'nyumba tacijigalidwa, soni acakongwe tacitendedwa cigwagwa. Hafu ja ŵandu tijicijigalidwa kuja ku ukapolo, nambo ŵakusigala wosope ngasiŵatyosya mu msindamo.

³ Kaneko AMBUJE tacijawula kuputa ngondo ni yilambo yineyo, mpela muŵaputilaga ngondo mu ndaŵi jakala.

⁴ Pandaŵi jelejo tacijima Petumbi lya Olifi, kungopoko lyuŵa kwa Yelusalemu, kaneko Litumbi lya Olifi* tilicigaŵanika paŵili kutyocela kungopoko lyuŵa mpaka kungapilo lyuŵa kupitila ku ciŵata cekulungwa. Hafu ja litumbi tilicisejela kuja ca kumpoto nipo mbali jine tijicija kum'mwela.

⁵ Timcitila kupitila mu ciŵata celeci ni kuligaŵanya litumbi paŵili. Timcitila mpela muŵatendele acinangolo ŵenu mpela mucatendele cisukunya mu ndaŵi ja Mwenye Usiya jwa ku Yuda. AMBUJE Mlungu jwangu taciyika, ni kwika nago malayika gosope ni jwalakwejo.

⁶ Ndaŵi jelejo pitijiciyika, tikuciŵa kwangali kusisima

⁷ kapena cipi cine cilicose. Tikuciŵa kuli kwana lilanguka ndaŵi syosope, atamose ndaŵi ja cilo. Jwakumanyilila ni AMBUJE, yeleyi pitiyicitendekwa.

⁸ Lisiku lyelelo pitiliciyika, mesi gakupeleka umi tigacikopoka ku Yelusalemu. Litika lya mesi ganego tigacijawulaga ku Nyasa Jecejewu* soni gane ku Nyasa ja Mediteleniyani jijili kungapilo lyuŵa.

⁹ Sambano AMBUJE taciŵa mwenye jwa cilambo cosope capasi; jwalijose tacimlambila jwalakwejo mpela Mlungu ni kum'manyilila jwalakwejo ni lina lilyolyo.

¹⁰ Tacicipwilinganya cilambo cosope kutandilila ku Geba mpaka kuja kwika ku Limoni, kum'mwela kwa Yelusalemu. Nambo tacikwesedwa pa malo gakwego; msindawo tiwucija kwika kutyocela ku Cipata ca Benjamini mpaka kuja kwika ku Cipata ca Pandumba kwele kucaliji cipata cakala, soni kutyocela ku Sanja ja Hananele mpaka kuja kwika ku malo gakuminyila mipeleya ja ku umwenye.

¹¹ Ŵandu tacitama kweleko mwa mtendele, soni ngasajogoyedwa ni conasiko kweleko.

¹² AMBUJE taciyika ni mlili wa yilwele yakogoya kwa amagongo wosope ŵakutenda ngondo ni Yelusalemu. Ulwele wakwe tiwuciŵa mwamti myi: Yilu yawo tiyiciwola acimsyenewo ali mkwenda, meso gawo tigaciwola gali citamile m'malo mwakwe nipo malulumi gawo tigaciwolela mkamwa mwawo pemo.

¹³ Pandaŵi jelejo AMBUJE tacasokonesya jemanjajo ni kwatesya woga kuti jwalijose tacimkamula mundu jwali najo ciŵandika ni kutanda kumenyana najo.

¹⁴ Nombe nawo ŵandu ŵa ku Yelusalemu taciputa ngondo ni cakulinga cakuti awucinjilicisye msindawo. Tacisumula yipanje ya ŵandu ŵakusyungulila — mpela golidi,* silifa,* ni yakuwala yejinji.

¹⁵ Mlili mpela welewu tiwuciwulaga mahaci, ngamila,* acibulu ŵa mitundu josope, nambo soni nyama syosope syakutama ku malo ga asilikali ŵa ngondo.

¹⁶ Pitiyicimala yeleyi ŵandu wosope ŵakusigala mwa amagongo uŵamenyanaga ni Yelusalemu, taciyikaga caka ni caka kukumlambila mwenye AMBUJE Ŵamaciligosope, nambo soni kukutenda cindimba ca masakasa.*

¹⁷ Maŵasa gane pacilambo capasi ngisigajawula ku Yelusalemu kukumlambila mwenye, AMBUJE Ŵamaciligosope, soni ula ngisijigwa pa cilambo cawo.

¹⁸ Naga ŵandu ŵa ku Iguputo akukana kuja kuwonecela kweleko tacipocela cilango mpela cele AMBUJE citacicipeleka kwa mtundu wine uliwose wa ŵandu ŵangajawula kukutenda cindimba ca masakasa.

¹⁹ Celeci ticiciŵa cilango ca Aiguputo nambo soni ca mtundu uliwose wa ŵandu ŵele ngisatenda nawo cindimba ca masakasaco.

²⁰ Pa lisiku lyelelo pa mabelo gakusawala mahaci ga ku ngondo tipacilembedwa maloŵe gakuti, “Ŵakupelecedwa kwa AMBUJE.” Nipo ulo sya ku Nyumba ja AMBUJE nombe nasyo tisiciŵa syeswela mpela mbale sya ku malo kwakupelecela mbopesi.

²¹ Ciŵiga cilicose ca ku Yelusalemu ni ku Yuda ticiciŵa cakupelecedwa kwa AMBUJE Ŵamaciligosope. Wosope ŵakupeleka mbopesi ku Yelusalemu tacikamulisya masengo ulosyo pakuteleka nyama ja mbopesi. Ndaŵi jelejo pitijiciyika, ngisipawoneka soni jwa malonda jwalijose m'Nyumba ja AMBUJE Ŵamaciligosope.