Sakaliya 13 - Chiyawo Bible

¹ AMBUJE Ŵamaciligosope akuŵeceta kuti, “Pitijiciyika ndaŵi jelejo jwalakwejo tacililinganyicisya liŵasa lya Daudi* nduluko ja mesi, kuti jemanjajo pamo ni ŵandu ŵa ku Yelusalemu ŵatyocesye ulemwa* ni yakusakala yawo.

² Pandaŵi jelejo tinjityosya mena ga milungu jakupanganya mcilambomo, pangali soni jutacijikumbucila soni. Tinjimtyosya jwalijose jwakulikolanga kuti ali jwakulocesya* pamo ni msimu wakunyalaya.

³ Naga jwine jwalijose akwendelecela kulocesya,* babagwe ni mamagwe tacimsalila jwalakwejo kuti akwenela kuwulajidwa, pa ligongo lyakuti m'malo mwakuti aŵecete maloŵe ga AMBUJE akuŵeceta ya unami. Jwalakwejo pitacilocesyaga babagwe ni mamagwe tacimcopa mpaka kuwa.

⁴ Ndaŵi jelejo pitijicikwana, jwakulocesya julijose tacitenda soni pa yindu yele akuti yiŵayiweni kupitila m'mesomkulola pa ndaŵi jiŵalocesyaga kupitila mesomkulola.

⁵ M'malo mwakwe, tacijila kuti, ‘Une nganimba jwakulocesya. Une ndili jwakulima — mbele ndili mkulima pa umi wangu wosope.’

⁶ Jwine naga akuwusya kuti, ‘Nambi maŵanga gali ku mgongo kwenugo mwatesile cici?’ Jwalakwejo tacijila kuti, ‘Liŵangali nalipatile ku nyumba ja ajangu.’ ”

Lilamusi lyakuti awulaje jwakucinga jwa AMBUJE

⁷ AMBUJE Ŵamaciligosope akuti, “Mjimuce, m'mwe upanga, ni mlimbane ni jwakucinga jwakungamulila une masengo! Mumwulaje, nipo ngondolo tisipwilingane. Pelepo tinjimenyana nawo ŵandu ŵangu,

⁸ nipo mwa mbali sitatu sya ŵandu mcilambo mosopemo, siŵili tisiciwulajidwa, nipo mbali jimo ni jitijicisigala ja umi.

⁹ Ŵandu ŵa mbali jatatuji tinjaŵika pa moto, tinjaswejesya mpela mwele mwakusaswejesela golidi.* Kaneko tacipopela kwa Une, nipo Une tinjajanga kuŵenda kwawo. Tinjasalila kuti jemanjajo ali ŵandu ŵangu, nipo tacijiticisya kuti Une ndili Mlungu jwawo.”