Sakaliya 10 - Chiyawo Bible

AMBUJE tacikulupusya ŵandu ŵakwe

¹ Mŵende kwa AMBUJE kuti ampe ula mu ndaŵi jakupanda. Jwalakwejo ni jwakusagwisya ula ja miwumbi pa ŵandu ŵakwe, soni jwalakwejo akusamesya mbeju mu mgunda wa jwalijose.

² Milungu jakupanganya ni yala jikusaŵeceta ya unami, soni ŵakulondola cisango akusayiwona ya unami. Ŵakusasagamila sagamisi akusasagamila ya unami, nipo maloŵe gawo gakusisimisya mtima gakusaŵa gangali mate. Myoyo ŵandu akusagamba kwenda kwawula aku na kuku mpela ngondolo, akusalaga ligongo lyakusoŵa mkucinga.

³ AMBUJE akuŵeceta kuti, “Natumbilile ŵakucinga, nipo acimlongola ŵa mcilambomo tinjapa cilango. Une AMBUJE Ŵamaciligosope tinjisisamalila ngondolo syangu, gopolela kuti liŵasa lya Yuda, ni tinjisitenda kuŵa mahaci ga ngondo gamacili.

⁴ Mwa jemanjajo timucikopoka mlongola jwele jutaciŵa mpela liganga lya pandumba,* mpela ukunje wa ngondo. Acimlongola wosope ŵakulamulila tacityocela mwa jwalakwejo.

⁵ Ŵandu wosope ŵa ku Yuda taciŵa ŵakupunda mpela asilikali uŵapondelesye amagongo ŵawo m'matope. Taciputa ngondo ligongo lyakuti AMBUJE taciŵa ali ni jemanjajo, nipo tacapunda amagongo ŵakukwela pa mahaci.

⁶ “Ŵandu ŵa ku Yuda tinjalimbikasya; Tinjakulupusya ŵandu ŵa ku Isalaeli. Tinjatendela canasa jemanjajo ni kwawucisya soni kumangwawo. Taciŵa mpela kuti nganinajasa. Une ndili AMBUJE Mlungu jwawo; tinjijanga mapopelo gawo.

⁷ Ŵandu ŵa ku Isalaeli taciŵa ŵakulimbangana mpela asilikali ŵa ngondo; taciŵa ŵakondwa mpela ŵandu ŵaŵele ali mkumwa finyo. Yisukulu yawo tiyicikumbucila kupunda kweleku ni kuŵa ŵakusangalala pa ligongo lya yele yatesile AMBUJE.

⁸ “Tinjaŵilanga ŵandu ŵangu ni kwasonganya pampepe. Tinjakulupusya jemanjajo nipo tacitupa mpela muŵaŵelele kala.

⁹ Atamose kuti napwilingenye jemanjajo pasikati pa mitundu jine ja ŵandu nambope tacingumbucila kwakutalicila kwali jemanjajo. Jemanjajo pamo ni ŵanace ŵawo taciŵa cijumi ni kuwujila kumusi pampepe.

¹⁰ Tinjakoposya kutyoka ku Iguputo ni ku Asiliya kuja nawo kumangwawo. Tinjija kukwayikasya ku cilambo ca Giliyadi ni ku Lebanoni; cilambo cosope ticicigumbala ni ŵandu.

¹¹ Pitacijombokaga Nyasa ja ku Iguputo, tinjimasya matumbela ga pa nyasapo, mesi gosope ga mu Lusulo lwa Nayilo tinjigapwesya. Kulikusya kwa Asiliya tikucimala, nipo simbo ja ucimwene ja Iguputo tijicitemanguka.

¹² Une tinjalimbisya jemanjajo mwa AMBUJE; nipo tacilambila ni kumbikanila une.” Nguti myoyo une AMBUJE.