Obadiya 1 - Chiyawo Bible

¹ Ayi ni yiŵayiweni Obadiya kupitila m'mesomkulola. Aga gali maloŵe ga AMBUJE Mlungu Ŵamaciligosope gakwamba ya ŵandu ŵa ku Edomu. AMBUJE atumisye jwamtenga jwakwe kwa ŵandu ŵa mitundu josope, ni tuwupikene utenga wakwe: “Mŵe cilepe! Kwende tukamenyane ngondo ni Aedomu.”

AMBUJE tacipeleka cilango ku Edomu

² AMBUJE akwasalila Aedomu kuti, “Tinjimnandiya kwakumalilatu mnope, jwalijose tacimnyosya.

³ Mtima wenu wakupokawo umlambwisye. Likulungwa lyenu lili pasikati pa malwala, mkusatama pa matumbi gelewu. Mkusaŵeceta kuti, ‘Ana ŵani ŵa mpaka atutulusye pasi?’

⁴ Nambotu atamose mguluce penani mpela nyanga atamose mtaŵe cisusi cenu pasikati pa ndondwa, tinjimtulusyape pasi.”

⁵ AMBUJEWO akuŵeceta kuti, “Ŵawiyi naga akwika cilo, akusagamba kujigala yakuyisakayo. Ŵakugowola naga akukaŵa yisogosi, akusaleka yine panandi. Nambo jemanja amagongo ŵenu tam'male nditu.

⁶ Mlole mwele mwacijonanjile cilambo ca yisukulu ya Esawu, ni mwele mwajigalile yipanje yakwe yosope.

⁷ Ŵakukamulana namwe amlambwisye, amtopwesye mcilambo mwenu. Ŵakumkamusya pa ngondo ampundile. Maganja genu ga pa mtima gamtejile lwawu, mwakuti lunda lum'malile sambano.”

⁸ AMBUJE akuti, “Pandaŵi jelejo tinjijonanga ŵalunda wosope ŵa ku Edomu tinjimasya kalamuka kosope kwa yisukulu ya Esawu.

⁹ Acalume ŵakuputa ngondo ŵa ku Temani tacitenda woga, ŵa ngondo wosope taciwulajidwa ku matumbi ga Esawu.

Ligongo lyakwapela Aedomu cilango

¹⁰ “Jemanja Aedomu, ligongo lya ya ngalwe yimwatesile kwa acalongo acimjenu, yisukulu ya Yakobo,* tacimtesya soni ni kumjonanga mpaka kalakala.

¹¹ Mwagambaga kulola pa ndaŵi jele amagongo piŵasumulaga yipanje yawo, mwatendaga mpela mkukamulana nawo, ŵele uŵajinjilaga pa yipata ya Yelusalemu ni kugaŵanaga nawo yipanjeyo.

¹² Jemanja nganimŵajilwa kwasogoda acalongo acimjenu Ayuda ligongo lya likungu lyawo. Nganimŵajilwa kusangalala pakonasika kwawo. Nganimŵajilwa kwaseka pa ndaŵi jiŵaliji pa yipwetesi jemanjajo.

¹³ Pa lisiku lyawo lya likungu nganimŵajilwa kwinjila mu msinda wa ŵandu ŵangu. Pa lisiku lyawo lya likungu nganimŵajilwa kwasogoda. Pa lisiku lyawo lya likungu nganimŵajilwa kusumula yipanje yawo.

¹⁴ Nganimŵajilwa kwalindilila pa malekano ga m'misewu kuti mwakamule ŵandu ŵakutila. Pa lisiku lyawo lya likungu nganimŵajilwa kwapeleka ŵandu ŵakusigalawo kwa amagongo.

Mlungu tacipeleka cilango kwa mitundu

¹⁵ “Pangakaŵa tiliyice lisiku lya AMBUJE pa jele ndaŵijo jwalakwejo tacijamuka mitundu josope ja ŵandu. Jemanja Aedomu, tacimtenda yimwatesile ŵane. Yele yimwatesileyo tiyicimwujila.

¹⁶ Ŵandu ŵangu ŵamwele mgawo wa yakuŵaŵa petumbi lyangu lyeswela. Nambo mitundu jine ja ŵandu tijicimwa mgawo wa yakuŵaŵa mwakupelenganya. Tijicigugudila mgawowo kaneko ni kusimilila ngawoneka soni.

Kupunda kwa Isalaeli

¹⁷ “Ŵandu ŵangu Petumbi lya Siyoni* ŵane tacitila, nipo tiliciŵa litumbi lyeswela. Ŵandu ŵa Yakobo tacijigala cilambo cele cili cawo.

¹⁸ Lukosyo lwa Yakobo tiluciŵa mpela moto, lukosyo lwa Yosefe tiluciŵa mpela malamba ga moto, lukosyo lwa Esawu tiluciŵa mpela manyasi. Tacajoca ni kwatinisya soni ngasakulupuka mundu jwalijose.” Akuti myoyo AMBUJE.

¹⁹ “Ayuda ŵa kum'mwela tacipocela Litumbi lya Esawu ŵa kungapilo lyuŵa tacipocela cilambo ca Afilisiti. Ŵa kumpoto tacipocela cilambo ca Efelemu, ni likulungwa lyakwe Samaliya, soni Abenjamini tacipocela cilambo cakungapilo lyuŵa ca Giliyadi.

²⁰ Aisalaeli uŵaliji ku ukapolo tacipocela cilambo ca Kenani mpaka kuja kwika kumpoto ku Salafati. Ŵandu ŵa ku Yelusalemu uŵaliji ku ukapolo ku Sefaladi tacisumula misinda ja kum'mwela kwa Yuda.

²¹ Acalume ŵakuputa ngondo ŵakutyocela ku Yelusalemu tacipunda ni kulamulilaga cilambo ca Edomu. AMBUJE jikape taciŵa mwenye.”