Numeli 8 - Chiyawo Bible

Kuŵika nyali

¹ AMBUJE* ŵamsalile Mose* kuti,

² “Ŵasalile Aloni* kuti pitaŵiceje nyali msano ni siŵili pa cakuŵika pakwe, aŵiceje kuti lilanguka lyakwe tiliŵalileje pasogolo.”

³ Aloni ŵapikanile ni ŵasiŵisile nyalisyo ni kulolaga pasogolo pa cakuŵika nyalico.

⁴ Kutandila penani mpaka pasi pakwe cakuŵikapo nyalico ŵacipanganyisye ni golidi* jwakusyana, mpela mwa cisyasyo ciŵalosisye AMBUJE kwa Mose.

Alefi akwapeleka kwa AMBUJE

⁵ AMBUJE ŵatite kwa Mose,

⁶ “Lefi ŵalekangenye ni Aisalaeli ni kwaswejesya

⁷ mwamti myi: ŵamisile mesi gakuswejesya ni ŵasalile kuti amyole yilu yawo yosope ni kucapa yakuwala yawo. Kaneko taciŵa ali aswejele mpela mwa msyungu.

⁸ Kaneko tacijigala mwanace jwa ng'ombe ni mbopesi jakusosekwa ja utandi wewanganye ni mawuta ga olifi,* nipo wawojo tacijigala ng'ombe jine jakujipeleka ku mbopesi jakupesya ulemwa.*

⁹ Kaneko ŵasonganye Aisalaeli wosope ni kwajimika Alefi wosope pasogolo pa tenti jakusimanilana ni une.

¹⁰ Aisalaeli tacisajika magasa gawo pa mitwe ja Alefi,

¹¹ nipo kaneko Aloni tacapeleka kwa une Alefiwo mpela mituka jakusosekwa jakutyocela kwa Aisalaeli, kuti jemanjajo apanganyeje masengo gangu.

¹² Alefiwo ni tacisajika magasa gawo pamitwe ja ng'ombe siŵilisyo, jimo jakupelecedwa mpela mbopesi jakupesya ulemwa nipo jinejo mpela mbopesi jakutinisya, pakusosa kuti atende msyungu wakwaswejesya Alefi.

¹³ “Ŵapelece Alefi mpela mituka jakusosekwa kwa une, nipo Aloni ni ŵanace ŵakwe aŵe ŵakwalolela jemanjajo.

¹⁴ Ŵalekanganye Alefi ni Aisalaeli wosope mwa lyele litalali, mwakuti taciŵa ŵangune.

¹⁵ Panyuma pakwaswejesya ni kwaŵika pajika Alefiwo, taciŵa ŵakuŵajilwa kupanganya masengo mu tenti.

¹⁶ Jemanjaji nasandwisye kuŵa ŵangune m'malo mwa ŵanace ŵacalume wosope ŵandanda kupagwa ŵa Aisalaeli, nipo ali ŵa une namsyene basi.

¹⁷ Pinawuleje wosope ŵandanda kupagwa mu Iguputo, namŵisile pajika mwanace jwamlume jwandanda kupagwa jwa liŵasa lya Aisalaeli ni cinyama candanda kupagwa cilicose.

¹⁸ Sambano ngujigala Alefi m'malo mwa ŵanace ŵandanda kupagwa ŵa Aisalaeli,

¹⁹ nipo ngwapeleka Alefi kwa Aloni, mpela mituka kutyocela kwa Aisalaeli, kuti apanganyeje masengo mu tenti m'malo mwa Aisalaeli wosope nipo soni kwacinjilicisya jemanjajo ku yakogoya yampakana yatendecele naga ali aŵandicile mnope ku Malo Gakusagulidwa.”

²⁰ Myoyo Mose, Aloni, ni ŵandu wosope ŵa Aisalaeli ŵaŵisile pajika Alefi, mpela muŵamlamulile AMBUJE Mose.

²¹ Alefi ŵaliswejesye acimsyene ni kucapa yakuwala yawo, nipo Aloni ŵapelece kwa AMBUJE mpela mituka jakusosekwa. Jwalakwe ŵatendele soni msyungu wakwaswejelesya.

²² Ŵandu ŵatesile cilicose ciŵamlamwile AMBUJE Mose cakwayana ni Alefi. Nipo Alefi ŵaŵajilwe kutenda masengo mu tenti mwakwalongolela Aloni ni ŵacalume.

²³ AMBUJE ŵatite kwa Mose,

²⁴ “Kutandila yaka ya 25 Mlefi jwalijose tacipanganya masengo gakwe mu tenti jakusimanilana ni une,

²⁵ nipo tacipumula ali akwanile yaka 50.

²⁶ Panyuma pa yele yakayo, akukomboleka kwakamucisya Alefi acimjakwe pakupanganya masengo gawo mu tenti, nambo akusapanganya masengo galigose mwa asyene jika. Amu ni mutacitendela pakwagaŵila Alefiwo masengo gawo.”