Numeli 6 - Chiyawo Bible

Ya Anasili

¹ AMBUJE* ŵamlamwile Mose*

² kuti mwasalile ŵandu ŵa Aisalaeli ayi yinduyi. Jwamlume jwalijose kapena jwamkongwe jwakulumbila kwa Mlungu kuti aŵe mnasili ni kulipeleka msyene kwa AMBUJE

³ akamwa finyo kapena ukana. Akamwa cakumwa cilicose ca kupanganyidwa kutyocela ku mpeleya kapena kulya yisogosi yakwe yayiŵisi kapena yejumu.

⁴ Pandaŵi josope jiŵalumbile kwa Mlungu kuti taciŵa mnasili, ngasalya kose cilicose cakutyocela ku citela ca mpeleya kapena mbeju syakwe ni likoŵa lyakwe.

⁵ Pandaŵi josope jiŵalumbile kwa Mlungu kuti taciŵa mnasili, ngakuŵajilwa kusenga umbo syawo kapena kumyola ndewu. Malumbilo gawo gakwakanganicisya kuŵa ŵakulipeleka kwa AMBUJE ndaŵi syosope, nipo tacisileka umbo syawo kuti sikule.

^6-7 Wumbo syawosyo sili cimanyisyo ca kulipeleka kwawo kwa Mlungu, nipo myoyo ngakuŵajilwa kose kulisakasya ni yangalumbana pakuŵandicila mtembo, atamose uŵe wa baba ŵawo, mama ŵawo, akulu ŵawo, kapena alumbu ŵawo.

⁸ Pandaŵi josope jiŵalumbile kwa Mlungu kuti taciŵa mnasili, jemanjajo ŵasaguce kwa AMBUJE.

⁹ Naga umbo sya mnasili asiŵilisye ligongo lya ciwa cakusisimucisya ca mundu jwine jwaŵandikene najo, akuŵajilwa kwembeceya kwa masiku msano ni gaŵili nipo kaneko asenje umbo syawosyo pa ndaŵi ja msyungu, nipo myoyo taciŵa ŵaswela soni.

¹⁰ Pa lisiku lya msano ni gatatu taciyika nasyo njuŵa siŵili kapena ngunda siŵili kwa jwakutaga mbopesi pa mlango pa tenti ja AMBUJE jakusimanilana.

¹¹ Jwakutaga mbopesi tacipeleka jimo kuti jiŵe ja mbopesi ja ulemwa* nipo jinejo mpela ja mbopesi jakutinisya kuti atende msyungu wakwaswejesya jemanjajo ligongo lyakukwayana ni mtembo. Lisiku lilyolyo tacisipeleka umbo syawosyo kwa AMBUJE,

¹² nipo tacilipeleka soni acimsyenewo kwa AMBUJE jele ndaŵijo kuŵa mnasili. Nambo ndaŵi jakulipeleka kwawo kwa ndaŵi jandanda jila akajiŵalanjila, ligongo umbo syawo siŵasipelece sila ŵasiŵilisye. Myoyo taciyika najo mwanace jwangondolo jwa caka cimo mpela mbopesi jakulipila kuleŵako.

¹³ Pati mnasili amalisisye malumbilo gawo, tacitenda wele msyunguwu. Tacijawula kwakwinjilila kwa tenti jakusimanilana

¹⁴ ni kuja kupeleka kwa AMBUJE yinyama yitatu yangali liŵasi lililyose: mwanace jwangondolo jwa mkambako jwa caka cimo kuti jiŵe mbopesi jakutinisya, apelece mwanace jwangondolo jajikongwe jwa caka cimo kuti aŵe mbopesi jakupesya ulemwa, nipo apelece ngondolo jamkambako kuti jiŵe mbopesi ja mkamulano.*

¹⁵ Tacipeleka soni mbopesi ja mikate jangali cakusasaŵilisya jagumbala mcitundu: mikate jakandapala cenene ja utandi wakuwanganya ni mawuta ga olifi,* ni mabisikete ga utandi wakutililika wakuwanganya ni mawuta ga olifi, nipo pakonjecesya pelepo apelece mbopesi syakusoseka sya mbeju sya songolo ni finyo.

¹⁶ Jwakutaga mbopesi taciyipeleka yosopeyi kwa AMBUJE ni kupeleka mbopesi sya ulemwa pamo ni mbopesi syakutinisya.

¹⁷ Tacipeleka mbopesi ja ngondolo kwa AMBUJE mpela mbopesi ja mkamulano, nipo tacijipeleka pamo ni citundu ca mikate, nambo soni tacipeleka mbopesi sya mbeju sya songolo ni finyo.

¹⁸ Mnasilijo asenje umbo syakwe kanga jwamlume kapena jwamkongwe pa mlango wakwinjilila mu tenti jakusimanilana ni AMBUJE ni kusijoca pamoto pakutinicisya mbopesi ja mkamulano.

¹⁹ Kaneko, pakuteleka lukongolo lwakusogolo lwa ngondolo, jwakutaga mbopesi jula tacilujigala ni kuliŵika pamo ni mkate umo wakandapala ni bisiketi jimo kutyocela mcitundu, kuyiŵika m'myala mwa mnasilijo.

²⁰ Panyuma pakwe, jwakutaga mbopesijo taciyipeleka mpela mtuka wakusosekwa kwa AMBUJE, syelesi sili mbopesi syakusagulidwa sya jwakutaga mbopesijo, pakonjecesya pa cidali ni lukongolo lwa ngondolo yayili ya jwakutaga mbopesijo mpela mwa lilamusi. Panyuma pa yeleyo, mnasilijo akukomboleka kumwa finyo.

²¹ Gelega ni malamusi ga ŵandu ŵalumbile kuti aŵe anasili, jwalakwe apeleceje kwa AMBUJE yele yiŵalumbilile pa unasili wakwe, nambo ngaŵalanjila yine yampaka apakombole kupeleka mwakonjecesya. Atende yele peyo yiŵalumbile kuyitenda mpela mnasili.

Ya upelece wa upile

²² AMBUJE ŵamlamwile Mose kuti,

²³ ŵasalile Aloni* ni ŵanace ŵakwe ŵacalume kuti pakupeleka upile kwa ŵandu ŵa Aisalaeli aŵeceteje maloŵe aga:

²⁴ AMBUJE ampe upile ni kumsunga jemanja,

²⁵ AMBUJE amlolele mwa cinonyelo nipo amsalalile mtima jemanja,

²⁶ AMBUJE amlolele mwa canasa, nipo ampe mtendele.

²⁷ Nipo AMBUJE ŵaŵecete ni une acitiji kuti, “Naga timkolanjeje lina lyangu pakupeleka upile ŵandu ŵa Aisalaeli, une tinjapa upile jemanjajo.”