Numeli 5 - Chiyawo Bible

Ya ŵandu ŵangaswejela

¹ AMBUJE* ŵamsalile Mose* kuti,

² “Mwalamule ŵandu ŵa ku Isalaeli kuti amtyosyeje jwalijose ku masakasa jwakwete cilwele ca matana kapena jwakukopoka yakusakala mcilu mwakwe ni jwalijose jwawukwayisye ni mtembo.

³ Ŵandu wosope ŵamti myiyi ŵatyosyeje pakwakopocesya kusa kwa masakasa kuti akagasakasya, pakuŵa une ngusindamaga pasikati pa ŵandu ŵangu.”

⁴ Aisalaeli ŵapikanile ni kwakoposya wosope ŵene kusa kwa masakasago.

Kuwusya yindu ya acimsyene

⁵ AMBUJE ŵamsalile Mose yindu

⁶ yakwasalila ŵandu ŵa ku Isalaeli kuti, “Jwalijose naga ngakukulupicika kwa AMBUJE nipo akutenda cindu cangali mate kwa mjakwe,

⁷ akuŵajilwa kwiticisya ulemwa* wakwe ni kuwucisya yosope yiŵajonasileyo, soni ajonjecesye cimo mwa mbuwa msano ja mtengo wakwe ni kumpa juŵamlemwecesyejo.

⁸ Nambo naga jwakumwucisyajo awile ali mkinakola mlongo mjakwe jwamti ni kumwucisya, taciyipeleka kwa AMBUJE kuti yiŵe ya jwambopesi. Celeci ticiciŵa cakonjecesya pa ngondolo jamkambako jakusapelekaga pakulipila msyungu wakuliswejesya ku yileŵi kwa mundu jwakulemwajo.

⁹ Yakupeleka yosope yakusagulidwa yakusapelekaga Aisalaeli kwa AMBUJE pakwika nayo kwa ŵakutaga mbopesi yili yawo ŵakutaga mbopesiwo.

¹⁰ Jwakutaga mbopesi jwalijose tacisunga cilicose cacipelecedwe kwa jwalakwe.”

Ya jwamkongwe jwangakulupicika

¹¹ AMBUJE ŵamlamwile Mose kuti,

^12-14 ŵasalile Aisalaeli ayi yinduyi. Mwine jwamlume akusimonga kuti ŵamkwakwe nginakulupicika kwa jwalakwejo ni kuti alijonasile pakutenda cikululu ni jwamlume jwine, naga jwamlumejo akukayicila, ligongo lyakuti ŵamkwakwewo ŵasisile soni paliji pangali mboni, nipo nginamkamula ali mkutenda, kapena kuti jwamlumejo akwasimonga ŵamkwakwe, atamose jwamkongwejo aŵele jwangakulupicika

¹⁵ jwamlumejo akuŵajilwa kumjigala jwamkongwejo kwawula najo kwa ŵakutaga mbopesi. Jwalakwe tacijigala soni utandi wa mbeju ja balele* wakwanila kilogalamu jimo wakupeleka mbopesi nambo ngatagamo mawuta kapena ubani* ligongo jiŵele mbopesi ja jwamlume jwa wiwu, jitendekwe pakusosa kuti amsisye mundujo, kuti ulemwa wakwe umanyice.

¹⁶ Jwakutaga mbopesi taciyika najo jwamkongwejo pasogolo ni kumjimika pasogolo pa malo gakupelecela mbopesi.

¹⁷ Tacikusulila mesi gamaswela mu mpika ni kujigala litaka lya pasi pa Tenti ja AMBUJE jakusimanilana ni kulitaga m'mesimo kuti gasanduce gakuŵaŵa.

¹⁸ Kaneko tamgopole jwamkongwejo umbo syakwe ni kumpa m'magasa mwakwe utandi wa mbopesi ula. Jwakutaga mbopesijo tanyakule m'myala mwakwe mpika wa mesi gakuŵaŵa gakuyicisya malweso gala.

¹⁹ Kaneko jwakutaga mbopesijo tacimlumbilisya jwamkongwejo kuti: “Naga nganimtenda cikululu, ngagampweteka kose malweso ga aga mesiga.

²⁰ Nambo naga mtesile,

²¹ AMBUJE alilwese lina lyenu pasikati pa ŵandu ŵa mtundu wenu. Agandisye mciwunu mwenu nipo lutumbo lwenu luyimbe.

²² Aga mesi ga malwesoga gajinjile m'matumbo mwenu ni lutumbolo luyimbe nipo mciwunu mwenu mugande.” Jwamkongwejo tacijitika kuti, “Ngwiticisya, AMBUJE atende myoyo.”

²³ Kaneko jwakutaga mbopesijo tacigalemba malwesogo ni kuyisimasya yakulembayo pakuyiloŵeka mu mpika wa mesi gakuŵaŵago.

²⁴ Mkanam'mwesye jwamkongwejo mesigo, gakuti kaneko mpaka gampwetece mnope.

²⁵ Jwakutaga mbopesijo taciwutyosya utandi wa mbopesi ula m'myala mwa jwamkongwejo ni kuwunyakula ni kuwupeleka kwa AMBUJE, ni kwika nawo ku malo gakupelecela mbopesi.

²⁶ Kaneko tacisapula utandi wa panandi mwigasa mpela mbopesi jakukumbucila ni kuwujoca pakupelecela mbopesi. Pambesi pakwe, tacimpa jwamkongwejo mesigo kuti amwe.

²⁷ Naga ŵatesile cikululu, mesigo tigacimpweteka mnope, lutumbo lwakwe tiluciyimba nipo mciwunu mwakwe timuciganda. Lina lyakwe tiliciŵa lyakulweseka pasikati pa ŵandu ŵa mtundu wakwe.

²⁸ Nambo naga ali jwakulupicika soni jwangali ulemwa, ngasigampweteka nipo tacipakombola kuŵeleka ŵanace.

^29-30 Ali ni lilamusi lya wiwu naga jwamlume asimonjile kuti ŵamkwakwe atesile cikululu. Jwamkongwe tacimjimika pasogolo pa malo gakupelecela mbopesi, nipo jwakutaga mbopesi tacitenda wele msyunguwu.

³¹ Jwamlume ngisakola magambo, nambo jwamkongwe, naga akusimanika ni gele magamboga tacicipocela cilango.