Numeli 33 - Chiyawo Bible

Ulendo wakutyoka ku Iguputo kwawula ku Mowabu

¹ Aga ni mena ga malo giŵataŵaga Aisalaeli masakasa gawo ali atyosile ku Iguputo m'makuga ga mitundu jawo piŵalongolelaga Mose* ni Aloni.*

² AMBUJE* ŵamlamwile Mose kuti alembeje lina lya malogo ndaŵi jilijose jiŵataŵaga m'masakasa.

³ Aisalaeli ŵatyosile ku Iguputo pa lisiku lya 15 lya mwesi wandanda wa caka, kundaŵi kwakwe lili lipite lisiku lya Pasaka.* AMBUJE ŵacinjilicisye nipo ŵakopwece mu msinda wa Lamusesi mu Iguputo ali ŵakusangalala Aiguputo wosope ali mkwawona.

⁴ Pa jele ndaŵiji Aiguputowo ŵaliji ali mkusika m'malembe malilo ga ŵanace ŵawo ŵandanda kupagwa ŵacalume ŵiŵaliji ali awulajidwe ni AMBUJE. Pakutenda yeleyi, AMBUJE ŵalosisye peswela kuti ŵaliji ŵamacili mnope kujipunda milungu ja mu Iguputo.

⁵ Aisalaeli ŵatyosile mu msinda wa Lamusesi ni kuja kutaŵa masakasa ku Sukoti.

⁶ Masakasa gane ali atyosile ku Sukoti ŵajile kugataŵa ku Etamu mumbali mwa cipululu.

⁷ Kaneko ŵawujile kwawula ku Pihahiloti, kungopoko lyuŵa kwa Baala Sefoni. Ni ŵajile kutaŵa masakasa gawo paciŵandika ni Migidoli.

⁸ Ŵatyosile ku Pihahiloti ni ŵajombwece pasikati pa Nyasa Jecejewu* kwinjila mcipululu ca Suli. Ali ajesile masiku gatatu ŵataŵile masakasa gawo ku Mala.

⁹ Kutyocela kweleko ŵajawile ku Elimu kuŵataŵile masakasa gawo, ligongo kwaliji kwana nduluko sya mesi 12 ni yitela ya migwalangwa 70.

¹⁰ Ŵatyosile ku Elimu ni kuja kutaŵa masakasa ciŵandika ni ku Nyasa Jecejewu ku Suwesi.

¹¹ Ŵajile kukutaŵa masakasa gawo ku cipululu ca Sini.

^12-14 Kaneko ŵataŵile ku Dofika, ku Alushi, ku Lefidimu kukwaliji kwangali mesi gakumwa.

^15-37 Piŵatyosile ku Lefidimu ŵajawile Kwitumbi lya Holi ni ŵataŵile masakasa gawo ku malo aga: Ku cipululu ca Sinayi, Kibuloti Hatafa (kapena “Malembe Gakusepa”), ku Haseloti, ku Litima, ku Limoni Pelesi, ku Libina, ku Lisa, ku Kehelata, Kwitumbi lya Shefela, ku Halada, ku Makeloti, ku Tahati, ku Tela, ku Mitika, ku Hashimona, ku Moseloti, ku Bene Yakani, ku Holi Hagigadi, ku Yotibata, ku Abulona, kutaŵa ku Esiyoni Geba, ku cipululu ca Sini (aku ni ku Kadeshi), ni Kwitumbi lya Holi, mumbali mwa cilambo ca Edomu.

^38-39 AMBUJE ŵamlamwile Aloni jwakutaga mbopesi nipo ŵakwesile Litumbi lya Holi. Ali akwesile ŵawilile kukoko ali ŵana yaka 123 pa lisiku lyandanda lya mwesi wa msano wa caka ca 40 Aisalaeli ali atyosile mcilambo ca Iguputo.

⁴⁰ Mwenye jwa ku Aladi kum'mwela kwa Kenani ŵapikene kuti Aisalaeli ŵaliji mkwisa.

^41-49 Kutyocela Kwitumbi lya Holi ŵajawile ku malambo ga Mowabu. Kweleko Aisalaeli ŵataŵile masakasa gawo ku malo aga: Salimona, kaneko ŵataŵile ku Punoni, kaneko ŵataŵile ku Oboti, ni ŵajile kutenda cigono ku Iyebalimu mu upande wa Mowabu, kaneko ŵajile kutaŵa ku Diboni, kaneko ŵajile kutaŵa ku Gadi, kaneko ŵajile kutaŵa ku Alimoni Dibulatayimu, kaneko ku Matumbi ga Abalimu ciŵandika ni Litumbi lya Nebo, nipo ku malambo ga Mowabu komboka Lusulo lwa Yolodani ku Yeliko, pasikati pa Abele Shitimu Yeshimoti ni Ciŵata ca Akesha.

Yakusosekwa kuyitenda mkanajomboce Lusulo lwa Yolodani

⁵⁰ M'Ciŵata ca Mowabu ciŵandika ni Lusulo lwa Yolodani, kutyocela ku Yeliko AMBUJE ŵamsalile Mose kuti,

⁵¹ “Mwasalile Aisalaeli kuti, pitajomboceje Lusulo lwa Yolodani kwinjila mcilambo ca Kenani,

⁵² ŵatoposye ŵandu wosope ŵene ŵakutama mwelemo. Ajonanje maganga gosope gakusepa mitembe ja yisyano josope ni malo gawo gakulambilago.

⁵³ Ajinjile mcilambomo ni kutamagamo, ligongo une ngucipeleka kwa jemanja.

⁵⁴ Mcigaŵanye cilamboco mwa mitundu josope ni maŵele gosope pakutenda yisango, mpeleceje cilambo cacikulungwa kwa liŵasa lyalikulungwa nipo cilambo cacinondi kwa liŵasa lyalinondi.

⁵⁵ Nambo naga ngamkwatoposya alukosyo ŵa mcilambowo, ŵawowo ŵitacisigalawo tacisanduka kwa jemanja ŵakusawusya kwakogoya mpela yisonga yakumsoma m'meso mwenu ni miŵa jakumsoma mumbali mwenu, nipo tacimenyana ni jemanja kwakogoya.

⁵⁶ Naga ngamkwatoposya, une tinjimjonanga, mpela muningajonanjile jemanjajo.”