Numeli 32 - Chiyawo Bible

Ngosyo sya kungopoko lyuŵa kwa Lusulo lwa Yolodani

¹ Mitundu ja Lubeni ni Gadi jakwete yilangwa yejinji. Piŵagaweni malo ga cilambo ca Yasa ni Giliyadi kuti galiji gakusoseka kwa yilangwa yawo,

² ŵajawile kwa Mose,* Eliyesa, ni acakulungwa ŵa m'musimo ni kwasalila kuti,

^3-4 “Upande awu ni wuŵatukamwisye AMBUJE* kuti uwe Aisalaeli tutameje m'misinda ja Ataloti, Diboni, Yasa, Nimila, Heshiboni, Eleyala, Sibima, Nebo, ni Beoni, cili cilambo cambone kulanjila yilangwa, nipo uwe tukwete yilangwa yejinji mnope.

⁵ Uwe tukuŵenda kuti conde atupe cele cilamboci kuti ciŵe cetu, nipo akatujawusya pesi komboka Lusulo lwa Yolodani kuti tukatame kweleko.”

⁶ Mose ŵajanjile kuti, “Ana akusosa kuti jemanja atame akuno kutendaga Aisalaeli acimjawo akwawula kukuputa ngondo?

⁷ Ligongo cici jemanja akusosa kwajasisya mtima Aisalaeli kuti akajomboka Lusulo lwa Yolodani kuja kwinjila mcilambo ciŵapele AMBUJE?

⁸ Yele ni yiŵatesile acinangolo ŵawo ndili natumile kuti akasonde cilambo kutyocela ku Kadeshi Baneya.

⁹ Jemanjajo ŵagambile kwawula ni kuja kwika ku Ciŵata ca Eshikolo, nipo ŵaciweni cilamboco, nambo piŵawusile, ŵajasisye mitima ŵandu kwalekasya kuja kwinjila mcilambo ciŵapele AMBUJE.

¹⁰ AMBUJE ŵapile mtima lyele lisikulyo nipo ŵalumbile kuti:

¹¹ ‘Pangali jumo mwa acalume ŵakwana yaka 70 kapena kupunda juŵatyocele mcilambo ca Iguputo jutacijinjila mcilambo cinaŵisile cilanga* kwa Abulahamu,* Isaki, ni Yakobo* ligongo nginanguya une mwakulupicika.’

¹² Pangali jutaciciwona cilamboco nambo Kalebu mwanace jwa Yefune Mkenisi ni Yoswa mwanace jwa Nuni. Ŵele ŵaŵili peŵa ni ŵiŵakulupicice kwa AMBUJE.

¹³ AMBUJE ŵapilile mtima Aisalaeli nipo ŵajendesye mcipululu kwa yaka 40, mpaka wele mpago wosope uwalemwecesye AMBUJE ula wamasile kuwa.

¹⁴ Nipo sambano jemanja ajinjile m'malo mwa acinangolo ŵawo, mpago wasambano wa ŵandu ŵa ulemwa ni akusosa kuti ajonjecesye nombe nawo kuyicisya kaŵili kutumbila kwa AMBUJE pa Aisalaeli.

¹⁵ Naga jemanja ŵandu ŵa Lubeni ni Gadi mkukana kwakuya AMBUJE sambano, jwalakwe tiŵalece soni kaŵili ŵandu wosopeŵa mcipululu muno, nipo jemanja ni ŵitimwajonanje.”

¹⁶ Myoyo jemanjajo ŵasejele kwa Mose ni ŵatite kuti, “Candanda, atukunde kuti tutaŵe akuno macinga ga ngondolo syetu ni misinda jakutama ŵanace ŵetu.

¹⁷ Kaneko tuciliŵicila cile kwawula ni Aisalaeli acimjetu ku ngondo ni kuja kulongolela ngondojo mpaka tukatamice ku cilambo citiciciŵa cawo. Pasambano jino, ŵanace ŵetu tatame akuno ku misinda jana malinga kogopa ŵandu ŵakutama mcilambo muno.

¹⁸ Uwe ngasituwujila kumangwetu mpaka Aisalaeli wosope ŵene ali ajigele cilambo cawo.

¹⁹ Uwe ngasitupocela cilambo cilicose pesi pa Lusulo lwa Yolodani, ligongo tupocele kala cilambo cetu lisi alino lya kungopoko lyuŵa kwa Lusulo lwa Yolodani.”

²⁰ Mose ŵajanjile kuti, “Naga yakuŵecetayo yili yakuwona, ni alilinganye kwawula ku ngondo pameso pa AMBUJE.

²¹ Ŵa ngondo ŵawo wosope ajomboce Lusulo lwa Yolodani nipo mwakwalongolela AMBUJE, jemanjajo akatande amagongo ŵetu mpaka AMBUJE akapunde wosopewo,

²² mpaka akasumule cilamboco. Panyuma pakwe akawujileje, ligongo taciŵa ali akwanilisye masengo gawo kwa AMBUJE ni kwa Aisalaeli ŵakwe. Kaneko AMBUJE tacijiticisya kuti aci cilambo ca kungopoko lyuŵa kwa Lusulo lwa Yolodani cili cawo.

²³ Nambo naga ngakusunga malangano gawo, ngwakalamusya kuti, tacitenda ulemwa pameso pa AMBUJE, nipo ulemwa wawo tiwucawujila.

²⁴ Myoyo ataŵe misinda ja ŵanace ŵawo ni macinga ga ngondolo syawosyo, nambo atende yatesile cilangayo.”

²⁵ Ŵandu ŵa Gadi ni ŵa Lubeni ŵatite kuti, “Bwana, uwetu tucitenda mpela mwatulamulile wawojo.

²⁶ Acakongwe ŵetu, ni ŵanace ŵetu tasigale, pamo ni ng'ombe syetu ni ngondolo syakwe tucisileka kunokuno m'misinda ja Giliyadi.

²⁷ Nambo uwe wosope ŵene tuli cile kwawula kumenyana ngondo pameso pa AMBUJE. Tucijomboka Lusulo lwa Yolodani nipo tuciputa ngondo mpela mwaŵecetele wawojo.”

²⁸ Myoyo Mose ŵalamwile Eliyesa, Yoswa ni acakulungwa ŵane ŵa ku Isalaeli kuti:

²⁹ “Naga ŵandu ŵa Gadi ni ŵa Lubeni akomboka Lusulo lwa Yolodani ali ŵacile kuputa ngondo pameso pa AMBUJE nipo naga ni cikamucisyo cawo jemanja akupakombola kupunda ni kusumula cilamboco, kaneko akuŵajilwa kuti tiŵape cilambo ca Giliyadi kuti ciŵe cawo.

³⁰ Nambo naga ngakomboka Lusulo lwa Yolodani ni kulongana ni jemanja ku ngondo, akuŵajilwa kupocela cilambo cawo ku Kenani mpela mutatendele jemanja.”

³¹ Ŵandu ŵa Gadi ni ŵa Lubeni ŵajanjile kuti, “Bwana, uwe tucitenda mpela mwalamulile AMBUJE.

³² Uwe tucijomboka kwawula ku Kenani ku ngondo pameso pa AMBUJE, kuti cilambo ca kungopoko lyuŵa kwa Lusulo lwa Yolodani ciŵe cetu.”

³³ Myoyo Mose ŵapelece kwa mitundu ja Gadi, ni Lubeni ni kwa litika lya mtundu wa Manase cilambo cosope ca Mwenye Sihoni jwa Aamoli ni Mwenye Ogi jwa ku Bashani konjecesya misinda josope ni cilambo cosope cakujisyungulila.

³⁴ Lukosyo lwa Gadi lwataŵile misinda ja malinga ja Diboni, Ataloti, Aloeli,

³⁵ Atiloti Shofani, Yasa, Yogibeha,

³⁶ Beti Nimila, ni Beti Halani.

³⁷ Lukosyo lwa Lubeni lwataŵile misinda ja Heshiboni, Eleyala, Kiliyataimu,

³⁸ Nebo, Baala Meoni (Linali lyacenjile), ni Sibima. Jemanjajo ŵajipele misinda jiŵataŵilejo mena gasambano.

³⁹ Liŵele lya Makili mwanace jwa Manase ŵajawile kukusumula cilambo ca Giliyadi, ni kutama mwelemo. Jemanjajo ŵatopwele Aamoli ŵiŵaliji mcilambomo.

⁴⁰ Myoyo Mose ŵapele cilambo ca Giliyadi ŵandu ŵa liŵasa lya Makili, nipo ŵatemi kweleko.

⁴¹ Yaili jwa mtundu wa Manase, ŵajile kukujitanda ni kusumula misi jine jakwe ni kujipa lina lyakuti “Misi ja Yaili.”

⁴² Noba ŵajawile kukuwutanda ni kuwusumula msinda wa Kenati ni misi jwakwe, nipo ŵajipele lina lya asyene pewo lyakuti Noba.