Numeli 30 - Chiyawo Bible

Malamusi gakwamba yakulumbila

¹ Mose* ŵasalile acakulungwa ŵa ngosyo sya ku Isalaeli

² kuti naga mundu jwamlume alumbile kuti tacipeleka cindu kwa AMBUJE* kapena alumbile kuti tacitendadi cindu akakasa kulumbila* kwakweko. Nambo kuti atende yosope yiŵalumbileyo.

³ Pati jwamkongwe jwali mwali jwakutama m'nyumba ja babagwe alumbile kuti tacipeleka cindu kwa AMBUJE kapena alumbile kuti tacitendadi cindu,

⁴ jwalakwejo akuŵajilwa kutenda yosope yene yiŵalumbileyo kapena kusalayo. Naga babagwewo akupikana ni ngaŵeceta cilicose akuŵajilwa kutenda yiŵalumbileyo.

⁵ Nambo naga babagwewo akumlekasya kukwanilisya yiŵalumbileyo ali apikene, pangali lilamusi lyakumkanganicisya mwanacejo kutenda yiŵalumbileyo kapena yiŵasasileyo. AMBUJE tacimkululucila ligongo babagwe ŵamlekasisye.

⁶ Naga jwamkongwe jwangalombedwa akulumbila mwangaganicisya cenene kapena mwamele, panyuma pakwe ni akulombedwa,

⁷ akusosekwa kukwanilisya yosope yiŵalumbileyo kapena yiŵasasileyo. Naga ŵamkwakwewo akupikana ni ngaŵeceta cilicose akuŵajilwa kukwanilisya yiŵalumbileyo.

⁸ Nambo naga akumlekasya kukwanilisya kuyitenda yiŵalumbileyo apo pangali lilamusi lyakumkanganicisya kutenda yiŵalumbileyo. AMBUJE tacimkululucila jwalakwejo.

⁹ Jwamkongwe jwamasije kapena juŵamlesile ulombela ŵamkwakwe naga alumbile kapena kutenda cilanga* kuti tacitenda cindu cilicose, akuŵajilwa kucitendadi.

¹⁰ Naga jwamkongwe jwamlombele akulumbila ni kutenda cilanga cakutenda cindu cilicose, akuŵajilwa kutenda cindu ciŵalumbile kapena kutenda cilangaco kuti tacicitenda.

¹¹ Naga ŵamkwakwe akupikana ni ngaŵeceta kandu, jwamkongwejo akuŵajilwa kutenda yosope yiŵalumbileyo kapena kutenda cilangayo.

¹² Nambo naga ŵalumewo akwalekasya kutenda yiŵalumbileyo ali apikene, pangali lilamusi lyakumkanganicisya kutenda yiŵalumbileyo. AMBUJE tacimkululucila ligongo ŵamkwakwewo amlekasisye kusunga malumbilo gakwego.

¹³ Ŵalume ŵawo akwete macili gakwalimbikasya ŵamkwakwewo atende yiŵalumbileyo kapena kumlekasya.

¹⁴ Nambo lisiku lyapikene ya malumbilogo naga ngakulekasya, jwamkongwejo akuŵajilwa kutenda yosope yiŵalumbileyo kapena kutenda cilanga. Ni kuti jwamlumejo ajiticisye malumbilogo naga ngakulekasya pa lisiku lyapikenelyo.

¹⁵ Nambo naga panyuma pakwe akulekasya malumbilogo kutendaga ŵaliji ali apikene kala, jwamlumejo ni jutaŵe jwa ulemwa* m'malo mwa jwamkongwejo.

¹⁶ Gelega ni malamusi giŵapelece AMBUJE kwa Mose gakwamba ya kulumbila kwa jwamkongwe jwali jwangalombela nambo jwakutama m'nyumba ja babagwe kapena jwamkongwe jwali peŵasa.