Numeli 3 - Chiyawo Bible

Ŵanace ŵa Aloni

¹ Ali ni liŵasa lya Aloni* ni Mose* pa ndaŵi jiŵaŵecete AMBUJE* kwa Mose pa Litumbi lya Sinayi.

² Aloni ŵakwete ŵanace mcece: Nadabu, juŵaliji jwamkulungwa, Abihu, Eliyesa, ni Itamala.

³ Jemanjaji ŵasagwile pakwajitila mawuta pa mtwe ni kwasajika magasa mpela ŵakutaga mbopesi,

⁴ nambo Nadabu ni Abihu ŵawulajidwe ndaŵi jiŵapelekaga mbopesi ja moto wangajenela kwa AMBUJE mcipululu ca Sinayi. Jemanjajo nginakola ŵanace, myoyo Eliyesa ni Itamala ŵatumicile mpela ŵakutaga mbopesi mu ndaŵi jiŵaliji Aloni cijumi.

Alefi akwasagula kuti ŵatumicileje ŵakutaga mbopesi

⁵ AMBUJE ŵatite kwa Mose,

⁶ “Myice nalo lukosyo lwa Lefi nipo mwasagule kuti aŵe ŵakutumicila ŵa Aloni jwakutaga mbopesi.

⁷ Jemanjajo tacipanganya masengo ga jwalakwejo ni likuga lyosope lya ŵandu pasogolo pa citenti cakusimanilana.

⁸ Jemanjajo taciŵa ŵakulolela yida yosope ya mu citenti nipo tacapanganyicisya masengo Aisalaeli ŵane wosope.

⁹ Udindo wakwete Alefi ni ŵakwatumicila Aloni ni ŵanace ŵawo.

¹⁰ M'mwejo timcasagula Aloni ni ŵanace ŵawo kuti apanganyeje masengo ga ŵakutaga mbopesi, nipo jwine jwalijose jwakulinjilila kutenda yeleyo tacimwulaga.”

¹¹ AMBUJE ŵatite kwa Mose,

^12-13 “Alefi sambano taŵe ŵangune. Pinawuleje ŵandanda kupagwa wosope ŵa mu Iguputo, namsagwile mwanace jwamlume jwandanda kupagwa jwa liŵasa lililyose lya Aisalaeli kuŵa jwangune ni cinyama cilicose candanda kupagwa. Sambano, m'malo mwakola ŵanace ŵacalume ŵandanda kupagwa ŵa Aisalaeli mpela ŵangune, ngwete Alefi, taciŵa ŵangune. Une ndili AMBUJE.”

Kalembela jwa Alefi

¹⁴ Mcipululu ca Sinayi AMBUJE ŵamlamwile Mose

¹⁵ kuti ŵalembe Alefi mwa maŵele ni maŵasa gawo, amlembe jwamlume jwalijose jwakwanile mwesi umo kapena kupunda,

¹⁶ nipo Mose ŵatesile yeleyo.

^17-20 Lefi ŵakwete ŵanace ŵacalume ŵatatu: Geleshoni, Kohati, ni Melali, ŵiŵaliji acinangolo ŵa maŵele mpela mwa mena gawo: Geleshoni ŵakwete ŵanace ŵacalume ŵaŵili aŵa: Libini ni Shimeyi, Kohati ŵakwete ŵanace ŵacalume mcece: Amulamu, Isala, Hebuloni, ni Usiyele, nipo Melali ŵakwete ŵanace ŵacalume ŵaŵili aŵa: Mali ni Mushi. Jemanjaji ŵaliji acinangolo ŵa maŵasa mpela mwa mena gawo.

²¹ Liŵele lya Geleshoni lyakwete maŵasa ga Libini ni Shimeyi.

²² Ciŵalanjilo cosope cene ca acalume ŵakwana mwesi umope kapena kupunda ŵiŵalembile caliji 7,500.

²³ Lyele liŵasali lyaliji mkutaŵa masakasa gawo kungapilo lyuŵa kunyuma kwa citenti,

²⁴ Eliyasafu mwanace jwa Layeli ni juŵaliji mwenye jwa lyele liŵasalyo.

²⁵ Jemanjajo ni ŵiŵaliji ŵakulamulila ŵa citentico, yakuwunicila yakwe ya mkati, ya kusa, likatani lya pa mlango pakwinjilila,

²⁶ makatani ga malo gosope gakusyungulila citentico ni kumalo kwakupelecela mbopesi kwakwe, ni likatani lyakwinjilila ku malo ga mkati. Jemanjajo ŵakwete udindo wa masengo gosope gakwayana ni yele yinduyi.

²⁷ Liŵele lya Kohati lyakwete maŵasa ga Amulamu, Isala, Ahebuloni, ni Usiyele.

²⁸ Ciŵalanjilo cosope ca acalume ŵakwana mwesi umo kapena kupunda ŵiŵalembile caliji 8,600.

²⁹ Lyele liŵeleli lyaliji lyakuja kutaŵa masakasa gawo ku mbali ja kum'mwela kwa Tenti,

³⁰ Elisafani mwanace jwa Usiyele ni juŵaliji mwenye jwa liŵasalyo.

³¹ Jemanjaji udindo wawo waliji ŵakulolela Libokosi lya Cilanga,* tebulo, cakuŵikapo nyali, kumalo kwakupelecela mbopesi, yida yakupanganyicisya masengo ŵakutaga mbopesi ku Malo Gamaswela, ni likatani lya pa mlango pakwinjilila ku Cipinda Ceswela Mnope. Jemanjaji ŵakwete udindo wakwayana ni yele yinduyi.

³² Jwamkulungwa jwa Alefi ŵaliji Eliyesa mwanace jwa Aloni ŵakutaga mbopesi. Jwalakwe ŵalolelaga ŵiŵatendaga masengo ku Malo Gamaswela.

³³ Liŵele lya Melali lyakwete maŵasa ga Mali ni Mushi.

³⁴ Ciŵalanjilo cosope ca ŵanace ŵacalume ŵakwana mwesi umo kapena kupunda ŵiŵalembile caliji 6,200.

³⁵ Lyele liŵeleli lyaliji lyakuja kutaŵa masakasa gawo ku mbali ja kumpoto kwa Tenti, nipo Suliyeli mwanace jwa Abihayilo ni juŵaliji mwenye jwa liŵasalyo.

³⁶ Jemanjaji ŵapele masengo gakulinganya mafelemu ga Tenti, yisyano, njalamila, pasi pakwe, pamo ni yakutaŵila yakwe yosope. Udindo wawo waliji wa masengo gosope gakwayana ni yeleyi.

³⁷ Nambo soni masengo gawo gane galiji gakulinganya sici, pasi, yicili, ni ngonji sya malo gakusa.

³⁸ Mose ni Aloni ni ŵanace ŵawo ŵaliji ŵakutaŵa masakasa kusogolo kwa Tenti kungopoko lyuŵa. Jemanjaji masengo gawo galiji gakupanganya masengo m'malo mwa ŵandu ŵa Aisalaeli M'malo Gamaswela. Jwalijose juŵalinjilile kutenda yeleyo ŵamwuleje.

³⁹ Ciŵalanjilo cosope cene ca Alefi ŵacalume ŵakwana mwesi umo kapena kupunda ŵiŵalembile Mose mwa maŵasa gawo mpela muŵalamulile AMBUJE, caliji 22,000.

Alefi akwinjila m'malo mwa ŵanace ŵacalume ŵandanda kupagwa

^40-41 AMBUJE ŵamsalile Mose kuti, “Ŵanace ŵacalume wosope ŵandanda kupagwa ali ŵangune. Myoyo mwalembe mena, jwamlume jwalijose jwandanda kupagwa jwa Aisalaeli jwakwanile mwesi umo kapena kupunda. Nambo m'malo mwa jemanjajo une ngwatenda Alefi wosope ŵangune! Une ndili AMBUJE! Yilangwa yosope yandanda kupagwa ya Alefi nguyitenda soni yangu m'malo mwa yilangwa yandanda kupagwa yosope.”

⁴² Mose ŵapikanile, ni ŵalembile ŵanace wosope ŵacalume ŵandanda kupagwa

⁴³ ŵakwanila mwesi umo kapena kupunda, ciŵalanjilo cosope caliji 22,273.

⁴⁴ AMBUJE ŵamsalile Mose kuti,

⁴⁵ “Sambano mwasagule Alefi kuti aŵe ŵangune m'malo mwa ŵanace ŵacalume wosope ŵa Aisalaeli ŵandanda kupagwa, nipo soni myisagule yilangwa ya Alefi m'malo mwa yilangwa ya Aisalaeli yandanda kupagwa.

⁴⁶ Pakuŵapo ŵanace ŵacalume ŵandanda kupagwa ŵa Aisalaeli akwapunda Alefi pakutupa ni 273, jemanja akuŵajilwa kwawombola ŵanace ŵajonjecesyewo.

⁴⁷ Alipileje mbiya sya masilifa* msano pa jwalijose malinga ni mlingo wakwiticika,

⁴⁸ ni kusipeleka mbiyasyo kwa Aloni ni ŵanace ŵawo.”

⁴⁹ Mose ŵapikanile ni ŵajigele

⁵⁰ masilifa 1,365 gala

⁵¹ ni ŵapele Aloni.