Numeli 29 - Chiyawo Bible

Yakupeleka ya pa Cindimba ca caka casambano

¹ Pa lisiku lyandanda lya mwesi wa msano ni jiŵili msonganeje pamo ni kutenda mapopelo, nipo mkapanganya masengo. Pa lyele lisikuli lisyeje malipenga.

² Mpelece mbopesi jakutinisya kwa AMBUJE,* nipo liwungo lyakwe likusanonyelesya. Yakupeleka yakwe yiŵe: mwanace jwa ng'ombe ja mkambako, ngondolo jamkambako, ni ŵanace ŵa mikambako ŵangondolo ŵa caka cimo msano ni ŵaŵili, yinyama yosopeyo yiŵe yangali liŵasi.

³ Mpelece mbopesi ja utandi wambone wakuwanganya ni mawuta ga olifi:* wakwana makilogalamu gatatu pa ng'ombejo, makilogalamu gaŵili pa ngondolojo,

⁴ nipo kilogalamu jimo pa mwanace jwangondolo jilijose.

⁵ Apelece soni mbopesi ja mbusi jimo ja tonde jakupesya ulemwa,* myoyo atende msyungu wakwaswejesya ŵandu.

⁶ Apelece yeleyi pakonjecesya mbopesi jakutinisya ja lisiku lyandanda lya mwesi wa masiku gosope ga yakulya, ni mbopesi ja lisiku ni lisiku jakutinisya ja yakulya ni ja finyo. Syele mbopesi sya yakulyasi syana liwungo lyakwanonyela AMBUJE.

Yakupeleka ya pa lisiku lyakupesya ulemwa

⁷ Msonganeje ni kutenda mapopelo pa lisiku lya likumi lya mwesi wa msano ni jiŵili, mkalya cakulya cilicose soni akapanganya masengo.

⁸ Mpelece mbopesi jakutinisya kwa AMBUJE, pakuŵapo liwungo lyakwe likusilyanonyelaga: mwanace jwa ng'ombe jumo, ngondolo jimo ja mkambako, ni ŵanace ŵangondolo msano ni ŵaŵili ŵa mikambako ŵa caka cimo, wosopewo aŵe ŵangali yilema yiliyose.

⁹ Mpelece mbopesi ja utandi wambone wakuwanganya ni mawuta ga olifi: wakwanila makilogalamu gatatu ni ng'ombejo, ni wakwanila makilogalamu gaŵili ni mwanace jwangondolo,

¹⁰ ni kilogalamu jimo pa mwanace jwangondolo jwalijose.

¹¹ Mpelece soni mbopesi ja tonde jakupesya ulemwa, pakonjecesya pambopesi jakutendela msyungu wakwaswejesya ŵandu, ni mbopesi jakutinisya ja lisiku ni lisiku ni mbopesi ja yakulya pamo ni ja finyo.

Yakupeleka ya pa lisiku lya Cindimba ca masakasa

¹² Asongane ni kutenda mapopelo pa lisiku lya 15 mwesi wa msano ni jiŵili. Atendeje cindimba cakwacimbicisya AMBUJE kwa masiku msano ni gaŵili nipo akapanganya masengo.

¹³ Pa lyele lisikuli apeleceje mbopesi ja yakulya kwa AMBUJE, pakuŵa liwungo lyakwe likusilyanonyela: ŵanace ŵa ng'ombe 13, ngondolo siŵili, ni ŵanace ŵangondolo 14 ŵamikambako ŵa caka cimo, wosopewo aŵe ŵangali yilema.

¹⁴ Apelece mbopesi ja utandi wambone jakuwanganya ni mawuta ga olifi: makilogalamu gatatu ga utandi pa ng'ombe jilijose, pa ngondolo jilijose makilogalamu gaŵili ga utandi,

¹⁵ ni kilogalamu jimo pa mwanace jwangondolo jwalijose, pamo ni mbopesi jakusosekwa ja finyo.

¹⁶ Apelece soni tonde jwa mbusi mpela mbopesi jakupesya ulemwa. Apelece yeleyi pakonjecesya ku mbopesi jakutinisya ja masiku gosope pamo ni mbopesi ja yakulya ni ja finyo.

¹⁷ Pa lisiku lyaŵili apelece ŵanace ŵa ng'ombe ŵa mikambako 12, ngondolo siŵili sya mikambako, ni ŵanace ŵangondolo ŵa mikambako ŵakwana caka cimo 14, wosopewo aŵe ŵangali maŵasi.

^18-19 Apelece yosopeyi pamo ni mbopesi sine syosope syakusosekwa sya lisiku lyandanda.

²⁰ Pa lisiku lyatatu apelece ŵanace ŵa ng'ombe 11, ngondolo siŵili, ni ŵanace ŵangondolo ŵa mikambako ŵakwana caka cimo 14, wosopewo aŵe ŵangali yilema.

^21-22 Apelece yosopeyi pamo ni mbopesi sine syosope syakusoseka sya lisiku lyandanda.

²³ Pa lisiku lya mcece mpelece ŵanace ŵa ng'ombe sya mikambako likumi, ngondolo siŵili sya mikambako, ni ŵanace ŵangondolo ŵa mikambako ŵakwana caka cimo 14, wosopewo aŵe ŵangali maŵasi.

^24-25 Mpelece yeleyi pamo ni mbopesi sine syosope syakusoseka pa lisiku lyandanda.

²⁶ Pa lisiku lyamsano mpelece ŵanace ŵa ng'ombe msano ni mcece, ngondolo siŵili sya mikambako, ni ŵanace ŵangondolo ŵa mikambako ŵakwana caka cimo 14, wosopewo aŵe ŵangali maŵasi.

^27-28 Mpelece yosopeyi pamo ni mbopesi sine syosope syakusoseka pa lisiku lyandanda.

²⁹ Pa lisiku lyamsano ni limo mpelece ŵanace ŵa ng'ombe msano ni ŵatatu, ngondolo siŵili sya mikambako, ni ŵanace ŵangondolo ŵa mikambako ŵakwana caka cimo 14, wosopewo aŵe ŵangali yilema.

^30-31 Mpelece yosopeyi pamo ni mbopesi sine syosope syakusoseka pa lisiku lyandanda.

³² Pa lisiku lyamsano ni gaŵili apelece ŵanace ŵa ng'ombe sya mikambako msano ni siŵili, ngondolo siŵili sya mikambako, ni ŵanace ŵangondolo ŵa mikambako ŵakwana 14 ŵa caka cimo, wosopewo aŵe ŵangali maŵasi.

^33-34 Mpelece yeleyi pamo ni mbopesi sine syosope syakusoseka pa lisiku lyandanda.

³⁵ Pa lisiku lya msano ni gatatu asongane pamo kumapopelo nipo akapanganya masengo.

³⁶ Mpelece mbopesi jakutinisya kwa AMBUJE mpela ja yakulya, liwungo lyakwe likusilyanonyelaga: mwanace jumo jwa ng'ombe ja mkambako, ngondolo ja mkambako jimo, ni ŵanace ŵangondolo ŵa mikambako ŵakwana caka cimo msano ni ŵaŵili, wosopewo aŵe ŵangali maŵasi.

^37-38 Mpelece yosopeyi pamo ni mbopesi sine syosope syakusoseka pa lisiku lyandanda.

³⁹ Yeleyi ni yakusosekwa kuyitenda pakupeleka mbopesi kwa AMBUJE yakwamba mbopesi syakutinisya, sya yakulya, sya finyo, ni sya mkamulano pa masiku gakusagulidwa ga yindimba ya mapopelo. Yeleyi yili yakonjecesya ku mbopesi syakupeleka pakwanilisya yiŵalumbile kapena yakupeleka ya ŵandu ya mtendele.

⁴⁰ Myoyo Mose* ŵasalile Aisalaeli yosope yene yiŵamlamwile AMBUJE.