Numeli 28 - Chiyawo Bible

Yakupeleka ya masiku gosope

¹ AMBUJE* ŵamlamwile Mose* kuti,

² ŵasalile Aisalaeli kuti apeleceje pa ndaŵi syakwe syakuŵajilwa yakulya yambopesi yayili yakoposya liwungo lyambone pameso pa AMBUJE.

³ Pana yakulya yakupeleka mbopesi yakusosekwa kuyipeleka kwa AMBUJE: mbopesi jakutinisya ja lisiku ni lisiku jiŵeje ja ŵanace ŵangondolo sya mikambako ŵaŵili ŵa caka cimo ŵangali liŵasi lililyose.

⁴ Apeleceje mbopesi ja ngondolo jandanda kundaŵi, nipo jaŵilijo ligulo lyakwe.

⁵ Ngondolo jilijose apwaticeje mbopesi ja utandi wakwana kilogalamu jimo, wewanganye ni mawuta ga olifi* gambone.

⁶ Jeleji ni mbopesi ja lisiku ni lisiku jijili jetinisye mnope, jijalamulidwe kupelecedwa Petumbi lya Sinayi mpela mbopesi ja yakulya, nipo liwungo lyakwe lili lyakwanonyela AMBUJE.

⁷ Apungulileje pa malo gakupelecela mbopesi finyo jwakwana lita jimo mpela mbopesi ja finyo pamo ni ngondolo jandanda.

⁸ Ligulo lyakwe soni apeleceje ngondolo jaŵilijo mpela muŵatendele ni mbopesi ja kundaŵi jila pamo ni mbopesi ja finyo jila. Nombe najo jili mbopesi ja yakulya, nipo liwungo lyakwe lili lyakwanonyela AMBUJE.

Yakupeleka ya pa lisiku lyakupumula lya Ayuda

⁹ Pa lisiku lyakupumula* apeleceje ŵanace ŵaŵili ŵangondolo sya mikambako sya caka cimo syangali liŵasi lililyose. Apwaticeje mbopesi ja utandi wa makilogalamu gaŵili wakuwanganya ni mawuta ga olifi ni mbopesi ja finyo.

¹⁰ Aji mbopesi jakutinisyaji apeleceje lisiku lyakupumula lililyose pakonjecesya pa mbopesi ja lisiku ni lisiku ni mbopesi ja finyo.

Mbopesi ja lisiku lyandanda lya mwesi

¹¹ Apeleceje mbopesi jakutinisya kwa AMBUJE kundanda kwa mwesi uliwose: ng'ombe syasinondi sya mikambako siŵili, ngondolo jimo ja mkambako, ngondolo sya mikambako sya caka cimo msano ni siŵili, syosopesyo syangali yilema.

¹² Mbopesi ja utandi, apeleceje utandi wewanganye ni mawuta ga olifi: ng'ombe jimo ja mkambako utandi wakwe uŵeje wakwanila makilogalamu gatatu. Ngondolo jimo ja mkambako utandi wakwe uŵeje wakwanila makilogalamu gaŵili.

¹³ Ngondolo jajinondi jilijose utandi wakwe uŵeje wakwanila kilogalamu jimo. Asi mbopesi syakutinisyasi sili mbopesi sya yakulya, nipo liwungo lyakwe lili lyakwanonyela AMBUJE.

¹⁴ Mbopesi ja finyo jiŵeje jakwanila malita gaŵili ga finyo pamo ni ng'ombe jakwe jilijose, lita jimo ni litika pamo ni ngondolo, nipo lita jimo ni mwanace jwangondolo jwalijose. Ayi ni yakuyikuya pakupeleka mbopesi syakutinisya sya lisiku lyandanda lya mwesi uliwose kwa caka cosope.

¹⁵ Pakonjecesya mbopesi jakutinisya ja lisiku ni lisiku ni mbopesi ja finyoji, apeleceje soni mbusi jimo mpela mbopesi jakupesya ulemwa.*

Mbopesi sya ku Cindimba ca mkate wangali cakusasaŵilisya

¹⁶ Cindimba ca Pasaka* ja AMBUJE citendecekweje pa lisiku lya 14 lya mwesi wandanda.

¹⁷ Pa lisiku lya 15 lya mwesi welewo ni lya cindimba cakusangalala cicikusajigala masiku msano ni gaŵili. Pa gele masikuga alyeje mkate wangali cakusasaŵilisya.*

¹⁸ Pa lisiku lyandanda lya cindimba asonganeje pamo ni kutenda mapopelo, nipo akapanganya masengo.

¹⁹ Apelece mbopesi jakutinisya mpela ja ya kulya kwa AMBUJE: ng'ombe siŵili syamkambako, ngondolo jamkambako jimo, ni ŵanace ŵa mkambako ŵangondolo ŵa caka cimo msano ni ŵaŵili ŵangali yilema.

²⁰ Apeleceje soni mbopesi ja yakulya ya utandi wewanganye ni mawuta ga olifi: wakwana makilogalamu gatatu pa ng'ombe jilijose, makilogalamu gaŵili pa ngondolojo,

²¹ nipo kilogalamu jimo pa mwanace jwangondolo jwalijose.

²² Apelece soni mbopesi ja mbusi jimo jatonde jakupesya ulemwa. Myoyo atendeje msyungu wakwaswejesya ŵandu wosope ŵene.

²³ Apeleceje syele mbopesisi pakonjecesya mbopesi syakutinisya sya kundaŵi sya masiku gosope.

²⁴ Atendeje yeleyi kwa masiku msano ni gaŵili kupeleka kwa AMBUJE mbopesi ja yakulya, lyele liwungoli lili lyakwanonyela AMBUJE. Apeleceje yeleyi konjocesya ku mbopesi jakutinisya ni ja finyo.

²⁵ Asimanganeje kukupopela pa lisiku lya msano ni gaŵili, ngapanganya masengo.

Yakupeleka ya pa Cindimba ca lisiku lya yakugowola

²⁶ Pa lisiku lyandanda lya Cindimba ca yakugowola, pakupeleka mbopesi ja mbeju syenu sya songolo syandanda kwa AMBUJE, ŵandu asonganeje kutenda mapopelo, nipo akapanganya masengo.

²⁷ Apelece mbopesi jakutinisya kuti jiŵe mpela ja liwungo lyakwanonyela AMBUJE: ng'ombe siŵili sya mkambako, ngondolo ja mkambako jimo, ni ŵanace ŵangondolo ŵacaka cimo ŵa mikambako ŵakwana msano ni ŵaŵili, wosope aŵe ŵangali yilema.

²⁸ Apelece mbopesi ja utandi wewanganye ni mawuta ga olifi: wakwana makilogalamu gatatu pa ng'ombe jilijose, makilogalamu gaŵili pa ngondolojo,

²⁹ ni kilogalamu jimo pa mwanace jwangondolo jwalijose.

³⁰ Apelece soni mbopesi ja mbusi jimo ja tonde jakupesya ulemwa. Myoyo atende msyungu wakwaswejesya ŵandu.

³¹ Apelece yeleyi pamo ni mbopesi ja finyo pakonjecesya ku mbopesi jakutinisya ja yakulya ja lisiku ni lisiku.