Numeli 27 - Chiyawo Bible

Ŵanace ŵacakongwe ŵa Selofehadi

¹ Mala, Nowa, Hogila, Milika, ni Tilisa ŵaliji ŵanace ŵa Selofehadi mwanace jwa Hefele, mwanace jwa Giliyadi, mwanace jwa Makili mwanace jwa Manase, mwanace jwa Yosefe.

² Jemanjaji ŵajawile ni kuja kwima pasogolo pa Mose,* Eliyesa jwakutaga mbopesi, acakulungwa ni mpingo wosope pa mlango wakwinjilila mu tenti jakusimanilana ni AMBUJE.*

³ Nipo ŵatite kuti, “Baba ŵetu ŵawile mcipululu ngaleka ŵanace ŵaliwose ŵacalume. Ŵelewo nginaŵa mwikuga lya ŵandu ŵakumkuya Kola, pakwajimucila ni kusisyana nawo AMBUJE. Ŵele ŵawile ligongo lya ulemwa* wawo.

⁴ Ana lina lya baba ŵetu liwe ligongo nginakola mwanace jwamlume? Atupe cilambo cetu pasikati pa acalongo acimjawo ŵa baba ŵetu.”

⁵ Mose ŵagapelece magambogo kwa AMBUJE,

⁶ nipo AMBUJE ŵatite kwa jwalakwe,

⁷ “Ŵanace ŵacakongwe ŵa Selofehadiwo akuŵeceta yakuwona, mwapeni cilambo pasikati pa alongo acimjawo ŵa baba ŵawo. Mwape jwalijose mbali ja cilambo cakwe cicikaliji ca baba ŵawoco.

⁸ Mwasalile Aisalaeli kuti mundu jwalijose naga awile ngaleka mwanace jwamlume, mwanagwe jwamkongwe akusosekwa kupocela cilambo cakwe.

⁹ Naga nginakola mwanace jwamkongwe, acalongo acimjakwe apocele cilamboco kuti ciŵe cawo.

¹⁰ Naga nginakola acalongo acimjakwe, alongo acimjawo ŵa baba ŵawo apocele cilamboco kuti ciŵe cawo.

¹¹ Naga baba ŵakwewo nginakola acalongo acimjawo kapena acakwelume ŵawo, acalongo acimjakwe ŵa liŵasa lilyolyo apocele cilamboco nipo acipocele mpela cakwe cisyesyene. Aisalaeli agasunje gele malamusiga ni majiganyoga mpela une, AMBUJE, munamlamulile m'mwejo.”

Mlungu akumsagula Yoswa kuti ajinjile m'malo mwa Mose

¹² AMBUJE ŵatite kwa Mose, “Jawulani penani pa Matumbi ga Abalimu nipo mkacilole cilambo citinape Aisalaeli.

¹³ Mli mciweni timciwa, mpela muŵatendele akulu ŵenu Aloni.*

¹⁴ Ayi tiyicitendekwa kwa jemanja wosope ŵaŵili ligongo mwanjimucile kusisyana ni lilamusi lyangu mcipululu ca Sini. Mpingo wosope wene piŵadandawile kusisyana ni une ku Meliba, jemanja mwakanile kuti mgamanyilile macili gangu pameso pawo.” (Meliba ali nduluko ja mesi jili ku Kadeshi mcipululu ca Sini).

¹⁵ Mose ŵapopesile,

¹⁶ Jwalakwe ŵatite, “AMBUJE Mlungu, ndanda ja umi wosope, ngwajuga kuti asagule mundu jutiŵalongolele ŵanduŵa

¹⁷ nipo aŵe jwakupakombola kwalamulila pakwawula ku ngondo, kuti mpingo wawo ukaŵa mpela ngondolo syangali mkucinga.”

¹⁸ AMBUJE ŵatite kwa Mose, “Mumjigale Yoswa mwanace jwa Nuni, ni mumsajice magasa genu pa mtwe pakwe.

¹⁹ Mumjimice pasogolo pa Eliyesa jwakutaga mbopesi ni mpingo wosope, nipo wosope ŵene ali mkulola mumjinjisye m'malo mwenu pelepo.

²⁰ Mumpe jwalakwejo udindo wenu kuti mpingo wosope wa Aisalaeli umpikanileje.

²¹ Tacijawula kwa Eliyesa jwakutaga mbopesi jutacakamucisya kuti amanyilile yinguyisosa une pakulondola yisango ya Ulimu ni Tumimu.* Mwelemu ni mutacitendela Eliyesa pakumlongolela Yoswa ni mpingo wosope wa Isalaeli mu yitendo yawo yosope.”

²² Mose ŵatesile mpela yiŵatite AMBUJE pakumlamula. Ŵamjimice Yoswa pasogolo pa Eliyesa jwakutaga mbopesi ni mpingo wosope.

²³ Mose ŵasajice magasa gakwe pa mtwe pa Yoswa mpela muŵalamulile AMBUJE, nipo ŵampele udindo mpela jwakwinjila m'malo mwakwe.