Numeli 25 - Chiyawo Bible

Aisalaeli ku Piyoli

¹ Aisalaeli piŵataŵile masakasa gawo m'Ciŵata ca Akesha, acalume ŵatandite kutenda cikululu ni acakongwe ŵa ku Mowabu ŵaŵaliji kweleko.

² Acakongweŵa ŵaŵilangaga acalumewo ku yindimba ya mbopesi ja milungu ja Amowabu jiŵajilambilaga.

³ Aisalaeli ŵalile yakulyayo nipo ŵamlambile mlungu jwa Baala jwa ku Piyoli. Myoyo AMBUJE* ŵapile nawo mtima.

⁴ Ŵamsalile Mose* kuti, “Mwajigale ŵakulongolela wosope ŵa Aisalaeli, nipo mumbikanile une, mwawulaje lyuŵa lili mkuŵala, ni tinjileka kwapila mtima ŵanduwo.”

⁵ Mose ŵatite kwa ŵakulamula ŵa Aisalaeli, “Jwalijose mwa jemanja ŵawulaje ŵandu ŵakwe ŵamlambile Baala jwa ku Piyoli.”

⁶ Jumo jwa Aisalaeli ŵamjigele jwamkongwe jwa ku Midiyani ni kumjinjisya mwisakasa mwakwe Mose ali mkulola pamo ni mpingo wosope, piŵaliji mkulila jemanjajo pa mlango wakwinjilila mu tenti jakusimanilana ni AMBUJE.

⁷ Finihasi mwanace jwa Eliyesa jwali cisukulu ca Aloni* jwambopesi piŵayiweni yeleyi, ŵajimwice kuwuleka mpingo ni kuja kujigala lipanga.

⁸ Jwalakwe ŵamkuyisye mundu jula ni jwamkongwejo mwisakasa mula, nipo ŵasomile wosope ŵaŵiliwo. Myoyo mlili walesile pasikati pa Aisalaeli.

⁹ Nambope ŵandu ŵakwana 24,000 ŵaliji ali awile ni mliliwo.

¹⁰ AMBUJE ŵatite kwa Mose,

¹¹ “Ligongo lya cindu catesile Finihasi, ndesile kwapila mtima Aisalaeli. Jwalakwe nganakunda kuti ŵandu amlambile mlungu jwine nambo unepe basi, ni ligongo lyakwe ngininajonanga pinapile mtima.

¹² Myoyo mumsalile kuti ngutenda najo cilanga* cangakasika mpaka ndaŵi sya msogolo.

¹³ Jwalakwe ni yisukulu yakwe taciŵa ŵakutaga mbopesi mpaka kalakala, ligongo nginamkunda kunjimucila une Mlungu soni ŵagatesile masengo gakululucila ulemwa* wa Aisalaeli.”

¹⁴ Lina lya mundu juŵawulajidwe pamo ni jwamkongwe jwa ku Midiyani jula lyaliji Simuli mwanace jwa Salu, jwakulongolela jwa liŵasa lya mtundu wa Simiyoni.

¹⁵ Lina lya jwamkongwejo lyaliji Kosibi. Babagwe ŵaliji Suli, juŵaliji mwenye jwa likuga lya maŵasa ga Amidiyani.

¹⁶ AMBUJE ŵamlamwile Mose kuti,

¹⁷ “Mkatande Amidiyani nipo mkajonanje,

¹⁸ ligongo ŵamtendele yakusakala m'mwejo piŵamlambwisye ku Piyoli, soni ligongo lya Kosibi, juŵamwuleje pa ndaŵi ja mlili ku Piyoli.”