Numeli 24 - Chiyawo Bible

¹ Aji ndaŵiji Balamu ŵamanyilile kuti AMBUJE* ŵasosaga kuti jwalakwe ŵajaliwasye Aisalaeli, ni nginalilila soni kuja kukuwusya kuti amanyilile yakusosa Mlungu mpela muŵatendele kala mula. Ŵagalawucile ku cipululu,

² nipo ŵaweni Aisalaeli ali ataŵile masakasa gawo mtundu uliwose pajika. Msimu wa Mlungu ŵatulwice pa jwalakwe,

³ nipo ŵatandite kuŵeceta maloŵe gakulocesya kuti: “Utenga wa Balamu mwanace jwa Bewoli, Maloŵe ga mundu jwakupakombola kulolecesya cenenepe,

⁴ Jwakupakombola kupikana yakuŵeceta Mlungu. Ni kulolecesya m'mesomkulola gakutyocela kwa Mlungu Jwamaciligosope.

⁵ Masakasa ga Aisalaeli gali gakusalala,

⁶ mpela misela jajilewu ja yitela ya migwalangwa kapena migunda ja mu mbali mwa lusulo, mpela likanga liŵapandile AMBUJE kapena mikungusa ja mumbali mwa mesi.

⁷ Tacikola ula jejinji ni kupanda mbeju syawo m'migunda jejitilile cenene. Mwenye jwawo taciŵa jwamkulungwa kumpunda Agagi, nipo udindo wakwe tiwucijendelecela kwakutalika soni tiwucikula.

⁸ Mlungu ŵakopwesye mu Iguputo. Jwalakwe akwaputila ngondo mpela mujikutendela njati jamacili. Jemanjajo akwawulaga amagongo ŵawo, tacigakasa mawupa gawo, ni kutemangula mapanga gawo.

⁹ Mtunduwo ukulandana ni lisimba lyamacili. Pati ligonile, pangali jwampaka alimbe mtima kulijimusya. Jwakupeleka upile ku mtundu wa Isalaeli tacipocela upile, Jwakuwulwesa mtundu wa Isalaeli tacilweseka.”

¹⁰ Pele Balaki ŵampilile mtima Balamu ŵagombile m'myala ni ŵatite kuti, “Une naŵilasile wawojo kuti ŵalwese amagongo ŵangu, nambo sambano m'malo mwakwe wawojo ŵapele upile jemanjajo katatu.

¹¹ Sambano ajawuleje kumusi. Une naŵisile cilanga* kuti tinjapa mtuka, nambo AMBUJE ŵakanisye kuti akapocela mtukawo.”

¹² Balamu ŵajanjile kuti, “Nasalile ŵamitenga ŵiŵatumisye kwa une kuti

¹³ atamose akambe une silifa* ni golidi* josope jwa m'nyumba jawo ja ucimwene, ngamkaninapakombola kuti ngapikanila lilamusi lya AMBUJE pakutenda cilicose mwa une jika. Tinjiŵeceta cele peco candumile AMBUJE kuti naciŵecete.”

Kulocesya kwambesi kwa Balamu

¹⁴ Balamu ŵatite kwa Balaki, “Sambano nguwujila kwa ŵandu ŵangu, nambo mkaninjawule, ngusosa kumkalamusya yitacitenda ŵandu ŵa ku Isalaeli kwa ŵandu ŵenu panyuma pano.”

¹⁵ Kaneko jwalakwe ŵalocesye ayi: “Utenga wa Balamu mwanace jwa Bewoli, Maloŵe ga mundu jwakupakombola kulolecesya cenenepe.

¹⁶ Jwakupakombola kupikana yakuŵeceta Mlungu ni kupocela lunda lwakutyocela kwa Jwakwinani Mnopejo. Ni meso gakulolecesya m'mesomkulola gakutyocela kwa Mlungu Jwamaciligosope.

¹⁷ Ngulola kusogoloko, ni nguwuwona mtundu wa Isalaeli. Mwenye tacijimuka mu wele mtunduwo mpela ndondwa jeswela. Taciyika kutyocela ku Isalaeli mpela ndondwa ja kwinani. Tacaputa ŵakulongolela ŵa Mowabu ni kwapunda pa ngondo ŵandu wosope ŵa mtundu wa Seti.

¹⁸ Jwalakwe tacapunda amagongo ŵakwe mu Edomu ni kucisumula cilambo cawoco kuti ciŵe cakwe, pele ni kuti Aisalaeli ali mkupelenganya kupundape.

¹⁹ Mwenye jwa Isalaeli tacalamulila tacajonanga wosope ŵakusigala mu msinda.”

²⁰ Kaneko Balamu ŵaweni Aamaleki m'mesomkulola mwakwe ni ŵaŵecete ayi yakulocesyayi: “Amaleki waliji mtundu wakulimba mnope kujipunda mitundu jine josope, nambo pambesi pakwe tiwucijonasika mpaka kalakala.”

²¹ Kaneko ŵaweni Akeni m'mesomkulola mwakwe, ni ŵaŵecete ayi yakulocesyayi: “Atamose malo gamkutama gangali yakusawusya, mpela cisusi cetaŵe penani pa maganga,

²² nambope jemanja Akeni timcijonasika pitacimkamula Asiliya ni kumjigala ku ukapolo.”

²³ Balamu ŵaŵecete ayi yakulocesyayi: “Ana aŵa ŵanduŵa ŵani ŵakusongana kumpotoŵa?

²⁴ Yombo ya pa nyasa tiyiciyika ni ŵa ngondo kutyocela ku Saipulasi. Jemanjajo tacapunda Asiliya ni Eba, nambo kaneko, Saipulasi nombe najo tacijonasika mpaka kalakala.”

²⁵ Kaneko Balamu ŵanyakwice ni kuwujila kumangwakwe. Nombe najo Balaki ŵapite kumangwakwe.