Numeli 23 - Chiyawo Bible

¹ Balamu ŵamsalile Balaki kuti, “Andaŵile malo gakupelecela mbopesi msano ni gaŵili, nipo anjigalile ng'ombe sya mikambako msano ni siŵili pamo ni ngondolo msano ni siŵili.”

² Balaki ŵatesile mpela muŵasalilemo, nipo jwalakwe ni Balamu ŵapelece mbopesi ja ng'ombe ni ngondolo pa malo galigose gakupelecela mbopesi.

³ Kaneko Balamu ŵatite kwa Balaki, “Ajime apano ni mbopesi jawo jakutinisyajo, une ngwawula ngalole naga tingasimangane ni AMBUJE* kapena iyayi. Tinjasalila cilicose citacindosya une AMBUJE.” Myoyo ŵajawile jika penani pa litumbi.

⁴ Mlungu ŵawonegene najo. Balamu ŵasalile AMBUJE kuti, “Ndaŵile malo gakupelecela mbopesi msano ni gaŵili nipo mbelece mbopesi ja ng'ombe jimo ni ngondolo jimo pa malo gambopesi galigose.”

⁵ AMBUJE ŵamsalile Balamu utenga wakwe ni kumtuma kuti awujile kwa Balaki akamsalile.

⁶ Myoyo ŵawujile ni kuja kumsimana Balaki pamo ni acakulungwa ŵakwe ŵa ku Mowabu ŵala ali ajimi ciŵandika ni mbopesi jakutinisya jila.

⁷ Balamu ŵaŵecete ayi yakulocesyayi: “Balaki mwenye jwa ku Mowabu ambilasile kutyocela ku Siliya, ku matumbi ga kungopoko lyuŵa. Jwalakwe ŵatite, ‘Yikani lwesani ŵandu ŵa ku Isalaeli m'malo mwangu.’

⁸ Ana mpaka nalwese camtuli ŵele ŵimkaniŵalwesa Mlungu, kapena tinapakombole camtuli kwasosela yamtega ŵele ŵimkaniŵasosela yamtega AMBUJE?

⁹ Ngupakombola kwawona kutyocela penani pa litumbi. Ngupakombola kwalolecesya kutyocela penani pa matumbi. Jemanjajo ali lukosyo lwa pajika. Akumanyilila kuti ŵana upile kujipunda mitundu jine.

¹⁰ Lukosyo lwa Isalaeli luli mpela luwundu, ŵani ŵampakana apakombole kwaŵalanga? Andece une timbwe ndili mpela jumo jwa ŵandu ŵa Mlungu. Andece une timbwe mu mtendele mpela mwakuwila ŵandu ŵakulungama.”

¹¹ Kaneko Balaki ŵatite kwa Balamu, “Ana wawo andendele yamti uli? Ngati une najigele kuti ŵalwese amagongo ŵangu, nambo yatesile wawojo ni kwamba kwapa upile.”

¹² Jwalakwe ŵajanjile kuti, “Une ngupakombola kuŵeceta yele peyo yakusalila AMBUJE kuti mbecete.”

Kulocesya kwaŵili kwa Balamu

¹³ Kaneko Balaki ŵamsalile Balamu soni kuti, “Ayice ni une ku malo gane kuti apakombole kwawona ŵane ŵa Aisalaeliwo. Pitiŵawone ŵele ŵaŵandicilewo ŵalwese m'malo mwa une ali ajimi pelepo.”

¹⁴ Ŵajawile nawo ku mgunda wa Sofimu penani pa Litumbi lya Pisiga. Ŵataŵile soni malo gambopesi msano ni gaŵili pelepo ni kupeleka mbopesi ja ng'ombe ni ngondolo pa malo galigose.

¹⁵ Balamu ŵatite kwa Balaki, “Ajime apano ciŵandika ni mbopesi jawo jakutinisyaji, nipo tingasimangane ni Mlungu apo.”

¹⁶ AMBUJE ŵasimangene najo Balamu, ni ŵamsalile yakuŵajilwa kuŵeceta, nipo ŵamtumisye kwa Balaki kuti akasalile mtenga wakwe.

¹⁷ Myoyo ŵawujile ni kuja kumsimana Balaki ali ajimi ciŵandika ni mbopesi jakwe jakutinisya jila, pamo ni acakulungwa ŵa ku Mowabu. Balaki ŵawusisye kuti, “AMBUJE atite cici?”

¹⁸ Nipo Balamu ŵaŵecete maloŵe gakulocesya gakuti: “Yikani, Balaki mwanace jwa Sipola, nipo pikanani yinguti mbecete.

¹⁹ Mlungu nganaŵa mpela mundu, kuti mpaka alambusye. Nganaŵa mundu kuti mpaka apakombole kucenga nganisyo syakwe. Yiliyose yakutenda cilanga* akusayitendaga. Jwalakwe akusaŵecetaga, nipo yikasatendekaga.

²⁰ Une andamwile kuti mbelece upile. Nipo naga Mlungu apelece upile, une ngaŵa mkupitikusya kose.

²¹ Une nayiweni kala cile kuti sogolo ja Aisalaeli mwana upilepe basi, mwangali yisawusyo. AMBUJE Mlungu ŵawo ali nawo jemanjajo, nipo ali pasikati pa kugumila kuti jwalakwe ni mwenye jwawo.

²² Mlungu ŵakopwesye jemanjajo mcilambo ca Iguputo. Akwaputila ngondo jemanjaji mwamacili mpela njati.

²³ Pangali soni jwamatipwi julijose soni pangali msaŵi jwampaka atopolane mwakusisyana ni mtundu awu wa Aisalaeli. Sambano ŵandu pakuŵeceta ya Aisalaeli taciti kuti, ‘Alole yayitesile Mlungu.’

²⁴ Mtundu wa Aisalaeli uli mpela lisimba lyamacili: Lyangapumula mpaka lili liwuleje nyama ni kujitawuna, ni kumwa miasi ja nyama syasiwuleje.”

²⁵ Kaneko Balaki ŵatite kwa Balamu, “Wawojo akukana kwalwesa ŵandu ŵa ku Isalaeli, nambo akasiŵapa upile.”

²⁶ Balamu ŵajanjile kuti, “Ana nganinasalila kuti nguŵajilwa kutenda yosope yene yitasalile une AMBUJE?”

Kulocesya kwatatu kwa Balamu

²⁷ Balaki ŵatite, “Ayice ni une, nipo tinajigalile ku malo gane. Kapena Mlungu tacikunda kuti wawojo ŵalwese jemanjajo kutyocela kweleko.”

²⁸ Myoyo jwalakwe ŵamjigalile Balamu penani pa Litumbi lya Piyoli lyakulolegana ni cipululu ca mwiŵanda.

²⁹ Balamu ŵamsalile Balaki kuti, “Andaŵile malo gakupelecela mbopesi msano ni gaŵili apano ni anjigalile ng'ombe msano ni siŵili pamo ni ngondolo msano ni siŵili.”

³⁰ Balaki ŵatesile mpela muŵamsalilile Balamu, nipo ŵapelece mbopesi ja ng'ombe ja mkambako ni ngondolo pa malo galigose gakupelecela mbopesi.